New Testament in a Year

12 Donn sas Doag fer Pasa kjeem Jesus no Betanean, wua Latsarus wea, daem hee haud fomm Doot oppjewakjt.

² Doa muake see am en Owentkost, en Marta bedeend; oba Latsarus wea eena fonn dee, dee bie am aum Desch saut.

³ Donn neemm Marie een Punt seeha dearet, reinet Nardeneelj en goot daut aewa Jesus siene Feet, en dreajd am de Feet met aere Hoa; en daut gaunse Hus wea foll fonn daem Jeruech.

⁴ Donn saed eena fonn sien Jinja, Judas Iescharijot, dee am nohaea ferode deed;

⁵ "Wuaromm wort dise Saulweelj nich fa dartich Punnt fekofft, en daut Jelt dee Oame jejaeft?"

⁶ Dit saed hee nich daut hee omm dee Oame waut drommjeef, oba wiel hee en Deef wea, en druach de Jelttausch, en neem fa sikj selfst fonn daut waut doa enenn jelajcht wort.

⁷ Donn saed Jesus, "Lot aea tofraed! Dit haft see to mien Bejrafnesdach jedone.

⁸ Dan dee Oame ha jie emma bie ju; oba mie woa jie nich emma habe."

⁹ Doa weare fael Jude waut daut wiste daut hee doa wea, en see kjeeme nich bloos waeajen Jesus, oba uk Latsarus to seene daem hee fomm Doot oppjewakjt haud.

¹⁰ Oba dee Huagapriesta worde sikj eenich see wudde Latsarus uk doot moake;

¹¹ wiel waeajen am feleete fael Jude en jleewde aun Jesus.

¹² De naeakjste Dach, es fael Follkj dee tom Fast jekome weare, heade daut Jesus no Jeruslaem kjeem,

¹³ neeme see Palmasta en jinje am entjaeajen en schrieeje: "Hoosauna! Jesaeajent es dee, dee emm Herr sien Nome kjemt! Iesrael aea Kjeenich!"

¹⁴ En Jesus funk en Aeseljoalinkj en sad sikj doa enopp; soo auset jeschraewe steit:

¹⁵ "Fercht die nich, du Dochta Tsions! Kjikj! dien Kjeenich kjemt no die jeraede opp en Aeseljoalinkj!"

¹⁶ Dee Jinja festunnde dit nich emm aunfank, oba aus hee eascht feharlicht wea, dochte see doaraun daut soont fonn am jeschraewe wea, en daut see daut to am jedone haude.

¹⁷ Daut Follkj oba daut bie am wea aus hee Latsarus fomm Grauf rut roopt en am oppwakjt fom Doot jeewe am Zeichnes.

¹⁸ Doaromm jinkj daut Folkj am to trafe, wiel see haude jeheat daut hee dit Wunndateakjen jedone haud.

¹⁹ Donn saede de Farisaea eena tom aundre: "Jie seene daut jie nusscht jewenne; Kjikt; de Welt es am hinjaraun jegone!"

²⁰ Nu weare doa uk waltje Jrieche unja dee, dee nom Fast jinja doa auntobaede.

²¹ Dee kjeeme no Filip, dee fonn Betseede enn Galilaea wea, en saede to am: "Herr, wie wudde jearen Jesus seene."

²² Filip jinkj en saed Aundrees daut, en Filip en Aundrees jinja en saede Jesus daut.

²³ Jesus auntwuad an en saed: "Dee Stunnd es jekome daut de Menschesaen sull feharlicht woare.

²⁴ Enn Woarheit, enn Woarheit saj ekj ju, wan en Weitkuarn nich enne Ead felt en stoaft, bliftet auleen. Wan daut oba stoaft, dan brinjt daut fael Frucht.

²⁵ Waea sien Laewe leef haft woat daut feleare; waea sien Laewe en dise Welt haust, woat daut hoole tom eewjet Laewe.

²⁶ Wan mie waea deent, lot daem mie no folje; en wua ekj sie doa saul mien Deena uk senne. Wan waea mie deent, daem woat mien Foda eare.