M’Cheyne Bible Reading Plan

17 Donn kjeem eena fonn dee Enjel dee de saewen Komme haud, en raed met mie en saed: "Komm, ekj woa die daut Jerecht wiese aewa dee groote Hua dee opp fael Wotasch set,

² met waem dee Kjeenije oppe Ead Huararie jedraewe ha, en sent met aea Huarawien bedrunke jeworde."

³ En hee druach mie wajch em Jeist no ne Wiltnes. En ekj sach ne Fru opp en schoarlock roodet Tia sette, daut foll Lasta Nomes wea, en saewen Kjap en tean Heana haud.

⁴ En dee Fru wea enn purpur en schoarlock aunjekjleet, en utjeputtst met Golt en deare Steena en Parle, en haud en goldnet Kuffel enn aeare Haunt daut foll Aeakeljet, en Onnreinet, en Huararie wea,

⁵ en opp aea Stearn wea en Nome jeschraewe, en Jeheemnes: BABIELOON DEE GROOTE, DEE MUTTA AEWA AULE HUARE, EN AUL DAUT AEAKELJET OPPE EAD.

⁶ En ekj sach daut dee Fru bedrunke wea met dee Heilje aea Bloot, en daut Bloot fonn Jesus siene Zeij. En ekj wunndad mie seeha aus ekj aea sach.

⁷ En dee Enjel saed to mie: "Wuaromm wunndascht du die? Ekj woa die daut Jeheemnes fonn dee Fru saje, en daut Tia daut aea drajcht daut saewen Kjap en tean Heane haft.

⁸ Daut Tia daut du sachst wea, en es nich, en es bott doa daut hee fonn dee Aufgrunnt kjemt, en woat enne Fedaumnes enenn gone; en aul dee, dee oppe Ead wone woare sikj fewunndre, daen aeare Nomes nich enn daut Laewesbuak jeschraewe sent fonn aunfank de Welt, wan see daut Tia seene daut wea, en nich es, en nu oba es.

⁹ Hia es dee Senn dee Weisheit haft. Dee saewen Kjap sent saewen Boaj, opp dee de Fru set, en doa sent saewen Kjeenije;

¹⁰ Fief sent jefolle, eena es, dee aundra es noch nich jekome, en wan hee kjemt, mott he en kortet Stoot bliewe.

¹¹ En daut Tia daut wea, en nich es, dee jrod es dee achta, oba es fonn dee saewen, en jeit enn Fedaumnes enenn.

¹² En dee tean Heana dee du sachst, sent tean Kjeenije dee noch nich en Kjeenichrikj jekjraeaje ha, oba kjriehe Follmacht aus Kjeenije met daut Tia fa eene Stunnd.

¹³ Dise ha een Senn, en jaewe daut Tia aeare Krauft en Follmacht.

¹⁴ Dise woare met daut Laum Kjrich moake, en daut Laum woat jewenne, wiel hee Herr es aewe aule Herre, en Kjeenich aewa aule Kjeenije es, en dee, dee met am sent, sent beroope en jewaelt en Tru."

¹⁵ En hee saed to mie: "Dee Wotasch dee du sachst, wua dee Hua set, sent Mensche, en Menje fonn Mensche, en Natsjoone, en Sproake.

¹⁶ En dee tean Heane dee du sachst, en daut Tia, woare dee Hua hause, en woare aea to Grunnt brinje, en noaktich moake, en woare aea Fleesch aete, en woare aea met Fia febrenne.

¹⁷ Dan Gott haft an daut enn aeare Hoate jejaeft sien Wele to doone, en met een Senn aea Kjeenichrikj daut Tia to jaewe, bott Gott siene Wead sulle foadich jebrocht woare.

¹⁸ En dee Fru dee du sachst es dee groote Staut dee en Kjeenichrikj haft aewa aule Kjeenije oppe Ead.

16 "Dise Dinje hab ekj junt jesajcht daut jie nich sele beleidicht senne.

² Dee woare ju ut dee Sienagoog rut stoppe; en doa kjemt ne Stund wan waeaemma ju woat doot moake woat jleewe daut hee doamet Gott en Deenst deit.

³ En daut woare see doone wiel see daem Foda uk mie nich kjanne.

⁴ Oba ekj hab ju dit jesajcht daut wan dee Stunnd kjemt, jie dan doaraun denke daut ekj ju daut jesajcht hab. Em Aunfank saed ekj ju daut nich wiel ekj bie ju wea.

⁵ Nu oba go ekj trigj no daem dee mie jeschekjt haft, en kjeena fonn ju fracht mie: Wua jeist du han?

⁶ Oba wiel ekj ju dit jesajcht hab, es jun Hoat foll Trua.

⁷ Oba ekj saj ju de Woarheit: fa ju eset baeta daut ekj wajch go; Wiel wan ekj nich wajch go, kjemt dee Treesta nich no ju. Oba wan ekj go, woa ekj daem no ju shekje.

⁸ En wan hee kjemt woat hee de Welt aewafeare fonn Sind, fonn Jerajchtichkjeit, en fonn Jerecht;

⁹ Fonn Sind wiel see nich aun mie jleewe;

¹⁰ Fonn Jerajchtichkjeit, wiel ekj trigj nom Foda go, en jie mie nich meeha seene woare;

¹¹ Fonn Jerecht wiel de Welt Harscha es jerecht worde.

¹² Ekj ha ju noch fael to saje, oba jie kjenne daut nu nich fedroage.

¹³ Oba wan dee Jeist de Woarheit kome woat, dee woat ju enne Woarheit ennen leide. Hee woat nich fonn sikj selfst raede; oba hee woat daut raede waut hee heat, en hee woat junt bekaunt moake waut noch kome woat.

¹⁴ Hee woat mie feharliche, wiel hee woat fonn daut mienje naeme en woat ju daut bekaunt moake.

¹⁵ Aules waut de Foda haft es uk mient. Doaromm saed ekj daut hee wudd daut mienje naeme en wudd junt daut bekaunt moake.

¹⁶ Noch ne kjleene Tiet en dan woa jie mie nich meeha seene; en wada omm ne kjleene Tiet woa jie mie wada seene."

¹⁷ Donn saede eenje fonn siene Jinja eene tom aundre: "Waut es dit waut hee onns sajcht: 'Noch ne kjleene Tiet en dan woa jie mie nich meeha seene,' en wada: 'omm ne kjleene Tiet woa jie mie wada seene'; uk, 'Wiel ekj trig nom Foda go'?"

¹⁸ Doaromm saede see: "Waut es dit waut hee sajcht: 'Ne kjleene Tiet'? Wie weete nich waut hee sajcht."

¹⁹ Jesus wist duat see am jearen froage wulle, en saed to an: "Froag jie ju unjarenaunda waeajen daut waut ekj saed: Noch ne kjleene Tiet en dan woa jie mie nich seene; en wada, omm ne kjleene Tiet dan woa jie mei seene?

²⁰ Enn Woarheit, enn Woarheit saj ekj ju: Jie woare hiele en jaumareare, en de Welt woat sikj freie; jie woare truare, oba jun Trua woat Freid woare.

²¹ Wan ne Fru en Kjint to Welt brinjt haft see Trua en Weedoag, wiel aeare Tiet es jekome; oba wan daut Kjint jebuare es, fejat see aeare Not aeawe dee Freid daut en Mensch enne Welt jebuare es.

²² Doawaeajen ha jie nu uk Trua, oba ekj woa ju wada seene, en dan woa jie fonn hoate fro seene, en kjeena woat dee Freid fonn junt wajch naeme.

²³ Aun daem Dach woa jie mie kjeene Froag froage. Enn Woarheit, enn Woarheit saj ekj ju: Wautemma jie daem Foda baede woare, daut woat hee ju enn mien Nome jaewe.

²⁴ Bet nu ha jie omm nuscht enn mien Nome jebaet; froagt! en jie woare kjriehe, daut june Freid mucht foll senne.

²⁵ Dit hab ekj junt en Sprechwead jesacht. Doa kjemt ne Tiet wan ekj nich meeha woa enn Sprechwead to ju raede, oba woa ju kloa en dietlich fom Foda fetale.

²⁶ Wan dee Dach kjemt woa jie en mien Nome baede; en ekj saj nich daut ekj enn june Staed daem Foda Baede woa,

²⁷ dan de Foda selfst haft ju doaromm leef wiel jie mie leef habe, en ha jejleeft daut ekj fomm Foda jekome sie.

²⁸ Ekj kjeem fom Foda en sie enn dise Welt enenn jekome; ekj felot wada dise Welt en go trigj nom Foda."

²⁹ Siene Jinja saede to am: "See; nu raedst du kloa en dietlich, en nich en Sprechwead.

³⁰ Nu weet wie daut du aules weetst, en hast nich needich daut die wea utfracht; doaromm jleew wie daut du fonn Gott jekome best."

³¹ Jesus auntwuad an: "Jleew jie nu?

³² Kjikt! doa kjemt ne Tiet, en es aul hia daut jie woare festreit woare, en jiedra no daut sienje, en woare mie auleen lote, en doch sie ekj nich auleen, dan de Foda es bie mie.

³³ Dit ha ekj ju nu jesacht daut jie enn mie Fraed habe. Enn dise Welt woa jie Not habe: oba siet jetroost, ekj hab aewe dise Welt jewonne."