M’Cheyne Bible Reading Plan

3 Seet emol waut fonne Leew de Foda onns jewaese haft daut wie sulle Gott siene Kjinje jenant woare: en daut es waut wie werkjlich sent! Doaromm kjant de Welt onns nich wiel see am nich kjant.

² Leefsta Frind, wie sent nu Gott siene Kjnja; oba daut es noch nich jeoppenboat waut wie nohaea selle senne. Wie weete oba daut wan hee woat jeoppenboat woare, dan woa wie soo senne es hee es, wiel wie woare am seene so aus hee es.

³ En jiedra dee dise Hopninj en sikj haft, woat sikj reinje, jrod so aus hee rein es.

⁴ Waea doa sindicht, feschulldicht sikj jaejen daut Jesats, wiel aule Sind es jaeajen Gott sien Jesats.

⁵ En jie weete daut Jesus Christus jekome es de Sind wajch to naeme; en enn am es kjeene Sind.

⁶ Waea en am blift woat nich enn Sind laewe; waea enn Sind laeft haft am nich jeseene uk nich jekjant.

⁷ Leefste Kjinja, lot ju fonn kjeenem fefeare! Waea daut racht eeft es jeracht, jrod so es hee jeracht es.

⁸ Waea enn Sind laeft es fom Deewel, dan de Deewel haft fonn Aunfank aun jesindicht. En Gott sien Saen es jekome daut hee daut hee daem Deewel siene Woakje fenichte wudd.

⁹ Waea fonn Gott jebuare es laeft nich en Sind, wiel sien Sot blift en am, en hee kaun nich sindje wiel hee fonn Gott jebuare es.

¹⁰ Doarenn es et kloa jemoakt woont Gott siene Kjinja sent en woont daem Deewel siene Kjinja sent: wea nich Jerachtichkjet eeft es nich fonn Gott, uk nich wea sien Brooda nich leef haft.

¹¹ Dit es dan dee Norecht dee wie fonn Aunfang aun jeheat ha, daut wie onns unjarenaunda seele leef habe;

¹² nich so aus Kain dee fonn daem Beesa wea, en schluach sien Brooda doot. En wuaromm schluach hee am doot? Wiel siene eajne Woakje onnjeracht weare, en sien Brooda siene weare jeracht.

¹³ Doot ju nich wunndre, Breeda, wan junt de Welt haust.

¹⁴ Wie weete daut wie fom Doot toom Laewe jekome sent wiel wie de Breeda leef habe. Waea dee Leew nich haft blift em Doot.

¹⁵ En jiedre dee sien Brooda haust es en Merda, en jie weete daut en Merda nich daut eewje Laewe enn sikj haft.

¹⁶ Wie weete waut woare Leew es doabie daut Jesus sien Laewe dol laed fa onns, en wie saele onns Laewe uk dol laeje fa de Breeda.

¹⁷ Oba waea enn dise Welt goot auf es, en sit sien Brooda faelt daut needich, en deit sien Hoat tooschluete jaejen am, woo kaun Gott siene Leew en am sene?

¹⁸ Leewe Kjinja, wel wie nich bloos met Wead oda met waut wie saeje onnse Leew bewiese, oba enn Woarheit daut met Woakje bewiese.

¹⁹ Doaraun woa wie weete daut wie fonne Woarheit sent, en woare aewazeijt senne fer Gott,

²⁰ en wan onns Hoat onns aundasch sajcht, Gott es jrata aus onns Hoat, en weet aules.

²¹ Leefste Frind, wan onns Hoat onns nich fekloacht, dan ha wie follet Fetruhe fer Gott,

²² en wautemma wie am no froage woa wie kjriehe, wiel wie siene Jeboote hoole en daut doone waut am jefelt.

²³ En dit es sien Jeboot, daut wie aun sien Saen Jesus Christus sien Nome jleewe, en onns unjeranuande leef habe jrod so aus hee onns daut befoole haft.

²⁴ En dee, dee siene Jeboote helt blift enn am, en hee enn am. En dit es woo wie weete daut hee enn onns blift wiel hee onns daen Jeist jejaeft haft.

18 Jesus bruckt en Jlikjnes an to saje daut see emma baede sulle, en nich mootloos woare,

² en saed: "Enn ne jewesse Staut wea en jewesse Rechta dee Gott nich fercht en fa Mensche kjeen Respakjt haud.

³ En enn dee Staut wea ne Waetfru, en see kjeem no am en saed: 'Rad mie fonn mien Jaeajna.'

⁴ Fa ne lange Tiet wull hee nich; oba nohaea docht hee bie sikj selfst soo: 'Wan ekj Gott uk nich fercht en ha nich Respakjt fa Mensche,

⁵ oba wiel dise Waetfru mie so fael Trubbel moakt, woa ekj aea rajchtfoadje, daut see mie nich aum Enj gauns februckt.'"

⁶ En de Herr saed: "Horcht waut dee onnjerajchte Rechta sajcht.

⁷ En woat Gott nich siene Uterwaelde rajchtfoadje dee Dach en Nacht am aunroope? en lang aewa an Jedult ha?

⁸ Ekj saj ju daut hee woat an haustich rajchtfoadje. En doch, wan de Menschesaen kome woat, woat hee oppe Ead Gloowe finje?"

⁹ Hee raed uk derch en Jlikjnes to daen dee sikj opp sikj selfst feleete daut see jerajcht weare, en fe-achte aundre.

¹⁰ "Twee Mana jinje em Tempel enenn to baede; eena wea en Farisaea en dee aundra en Takskollakjta.

¹¹ Dee Farisaea stunnt en baed to sikj selfst: 'Gott, en dank die daut ekj nich so sie aus dee aundre: Reiba, onnjerachte, Eehebraeakja, oda sogoa aus dis Takskollakjta.

¹² Ekj faust twee mol de Waeakj, ekj jaew daut Teande fonn aules waut ekj enn naem.'

¹³ Oba dee Takskollakjta stunnt wiet auf, en wudd nich mol siene Uage nehecht haewe, oba schluach sikj oppe Brossst en saed: "Gott erboarm die aewa mie, en Sinda.'

¹⁴ Ekj saj ju, dis maun, leewa aus jana, jinkj jerajchtfoadicht no sien Hus. Dan waea sikj selfst erhaeft woat jedeemueticht woare, en waea sikj selfst deemueticht woat nehecht jehowe woare."

¹⁵ See brochte am uk kjleene Kjinje daut hee daen mucht aunreare, oba aus dee Jinje daut sage, deede see daen schelle.

¹⁶ Oba Jesus roopt dee Kjinje no sikj selfst en saed: "Lot dee Kjinje no mie kome, en waeat daen nich, dan daen jeheat daut Gottesrikj.

¹⁷ Enn Woarheit saj ekj ju, waea daut Gottesrikj nich so aunemt aus en Kjint, woat opp kjeen Wajch doa enenn kome."

¹⁸ En jewesse Rejiera fruach am: "Gooda Leara, waut mott ekj doone daut eewje Laewe to oawe?"

¹⁹ Jesus saed to am: "Wuaromm nanst du mie 'Goot'? Kjeene es goot buta eena - Gott.

²⁰ Du weetst dee Jeboote: Du saust nich eehebraeakje, du saust nich doot moake, du saust nich staele, du saust nich faulschet Zeichness jaewe, du saust dien Foda en diene Mutte eare."

²¹ En hee saed: "Daut ha ekj aules jehoole fonn Jugend opp."

²² Aus Jesus daut head, saed hee to am: "Die faelt noch een Dinkj - fekjeep aules waut du hast en fedeel daut mank dee Oame; dan woascht du en Schats ha em Himel, en kom, folj mie no."

²³ Aus hee daut head, wea hee seeha betriebt, dan hee wea seeha rikj.

²⁴ Jesus kjikjt am aun en saed: "Woo schwoa eset fa daen, dee fael Eajendom ha, enn Gott sien Rikj enenn to kome.

²⁵ Daut es leichta fa en Kamel derch en Noteluag to gone, aus fa en rikja Maun en Gott sien Rikj enenn to kome."

²⁶ Dee daut heade, saede: "Waea kaun dan seelich woare!"

²⁷ Hee saed: "Waut bie Mensche ommaeajlich es, es bie Gott maeajlich."

²⁸ Peeta saed: "Kjikj, wie ha aules felote en sent die nojefolcht."

²⁹ Hee saed to an: "Enn Woarheit saj ekj ju, doa es nich eena dee Hus oda Fru oda Breeda oda Elre oda Kjinje felote haft omm Gott sien Rikj,

³⁰ dee nich fael meeha enn dit Laewe woat kjriehe, en enn dee komende Welt, daut eewjet Laewe."

³¹ Hee neem donn dee Twlaw en saed to an: "Kjikjt, wie gone no Jerusalem, en aules waut dee Profeete fonn daem Menschesaen jeschraewe ha woat jefoadicht woare.

³² Dan dee woare am aun dee Heide aewajaewe, en dee woare am spotte, en beleidje, en woare am bespiehe,

³³ dee woare am feheiwe, en am dootmoake, en aum dredda Dach woat hee fom Doot oppstone."

³⁴ Oba see festunde nusscht doafonn, en dise raed wea fonn aea Festaunt festoake, en see wiste nich fonn waut hee raed.

³⁵ Nu pasead daut aus hee dicht bie Jieriko kjeem daut en blinja Maun biesiedem Wajch saut en prachad.

³⁶ En aus dee head daut Follkj febie gone, fruach hee waut daut bedied.

³⁶ See leeta am weete daut Jesus fonn Natsaret doa febie jinkj.

³⁸ Donn schreach hee en saed: "Jesus, Doft sien Saen; erboarm die aewa mie."

³⁹ Dee doa feropp jinje deede am beschwichte daut hee stell sull senne, oba hee schreach bloos luda: "Doft sien Saen, erboarm die aewa mie!"

⁴⁰ Jesus stunt stell en befool daut see daem sulle no am brinje; en aus hee dicht bie wea, fruach hee am:

⁴¹ "Waut west du daut ekj fa die saul doone?" Hee saed: "Herr, daut ekj wada seene kaun."

⁴² En Jesus saed to am: "Dan see wada! Dien Gloowe haft die jeheelt."

⁴³ En platslich kunn hee wada seene, en foljd am no en feharlicht Gott. En aule Mensche dee daut sage jeewe Gott Ea.