M’Cheyne Bible Reading Plan

परमेस्सर दाऊद क बचन दिहस

17 दाऊद अपने घरे चले जाइ क पाछे नातान नबी स कहेस, “लखा, मइँ देवदारु स बने घरे मँ रहत हउँ, मुला यहोवा क करार क सन्दूख तम्बू मँ धरा अहइ। मइँ परमेस्सर बरे एक मन्दिर बनावइ चाहत अहउँ।”

² नातान दाऊद क जवाब दिहस, “तू जउन कछू करइ चाहत अहा, कइ सकत अहा। परमेस्सर तोहरे संग अहइ।”

³ मुला परमेस्सर क संदेसा उ रात नातान क मिला। ⁴ परमेस्सर कहेस,

“जा अउर मोर सेवक दाऊद स इ कहा: यहोवा इ कहत ह, ‘दाऊद, तू उ नाहीं अहइ जउन मोर बरे एक घर बनाइ। ^5-6 जब स मइँ इस्राएल क मिस्र स बाहेर लिआएउँ तब स अब तलक, मइँ घरे मँ नाहीं रहा हउँ। मइँ एक तम्बू स दूसर तम्बू क चरिहुँ कइँती घूमत रहा हउँ। जउने समइ मइँ इस्राएल मँ विभिन्न जगहन पइ चारिहुँ कइँती घूमत रहेउँ, मइँ कउनो प्रमुख स जेनका मइँ आपन लोगन क अगवाइ करइ बरे आदेस दिहेउँ रहा इ नाहीं कहेउँ: तू मोरे बरे देवदारु बृच्छ क काठे स घर काहे नाहीं बनाया ह?’

⁷ “अब तू मोरे सेवक दाऊद स कहा: सर्वसक्तीमान यहोवा तोहसे कहत ह, ‘मइँ तोहका चरागाह स अउर भेड़िन क देखरेख करइ स लिएउँ। मइँ तोहका अपने इस्राएली लोगन क सासक बनाएउँ। ⁸ तू जहाँ गवां, मइँ तोहारे संग रहेउँ। मइँ तोहरे अगवा-अगवा चलेउँ अउर मइँ तोहरे दुस्मनन क मारेउँ। अब मइँ तोहका पृथ्वी पइ सब स जियादा मसहूर मनइयन मँ स एक बना रहेउँ। ⁹ मइँ इ जगह अपने इस्राएल क लोगन क दइ देत अहइँ। मइँ ओनका उ जगह पइ स्थापित करब, अउर उ पचे हुवाँ सान्तिपूवर्क रइहीं। उ पचे अब आगे अउर परेसान नाहीं कीन्ह जइहीं। बुरे लोग ओनका वइसे चोट नाहीं पहोंचाइही जइसा उ पचे पहिले पहोंचाए रहेन। ¹⁰ उ समइ स जब मइँ आपन लोग इस्राएल क अगुवाइ अउ रच्छा करइ बरे निआवधीसन क नियुक्त किहा, मइँ तोहार सबइ दुस्मनन क हराएस हउँ।

“‘मइँ तोहसे कहत हउँ कि यहोवा तोहार परिवार क एक सही परिवार बनाई। ¹¹ जब तू मरब्या अउर अपने पुरखन स जाइ भेंटब्या, तब मइँ तोहरे निज पूत क नवा राजा होइ देब। नवा राजा तोहरे पूतन मँ स एक होइ अउर मइँ ओकर राज्ज क सक्तीसाली बनाउब। ¹² तोहार पूत मोरे बरे एक ठु घर बनाई। मइँ तोहारे पूत क परिवार क सदा बरे सासक बनाउब। ¹³ मइँ ओकर बाप बनब अउर उ मोर पूत होइ। साऊल तोहसे पहिले राजा रहा। मइँ ओह प स आपन पिरेम अउर मदद हटाइ लिएउँ। किन्तु मइँ तोहारे पूत स पिरेम क नाहीं हटाउब। ¹⁴ मइँ ओका सदा बरे अपने घर अउर राज्ज क संरच्छक बनाउब। ओकर सासन सदा ही चलत रही।’”

¹⁵ नातान अपने इ दर्सन अउर परमेस्सर जउन सबहिं बातन कहे रहा ओकरे बारे मँ दाऊद स कहेस।

दाऊद क पराथना

¹⁶ तब दाऊद पवित्तर तम्बू मँ गवा अउर यहोवा क समन्वा बइठा। दाऊद कहेस,

“यहोवा परमेस्सर, तू मोरे बरे अउर मोरे परिवार बरे ऍतना जियादा किहा ह अउर मइँ नाहीं समुझत कि काहे ¹⁷ अउर माना कि इ काफी नाहीं रहा, किन्तु, ओ परमेस्सर, तू मोका मोरे परिवार क भविस्स बताएस ह। तू मोरे बरे एक बहोत महत्वपूर्ण मनई जइसा बेउहार किहा ह। ¹⁸ मइँ अउर जियादा का काहि सकत हउँ? तू मोरे बरे ऍतना जियादा किहा ह अउर तू मोका बहोत सम्मान दिहेस ह अउर मइँ सिरिफ तोहार सेवक हउँ। तू मोका जानत ह। ¹⁹ यहोवा, तू इ अजूबा कार्य मोरे बरे किहा ह अउर इ तू किहा काहेकि तू इ महान कार्य क बतावइ चाहत ह। ²⁰ यहोवा, तोहरे समान अउर कउनो नाहीं अहइ। तोहरे अलावा कउनो परमेस्सर नाहीं अहइ। हम लोग कबहुँ कउनो देवता क अइसे अजूबा कार्य करत नाहीं सुना ह। ²¹ का इस्राएल क समान दूसर कउनो रास्ट्र अहइ? इस्राएल ही पृथ्वी पइ एकमात्र रास्ट्र अहइ जेकरे बरे तू इ अजूबा कार्य किहा। तू हम क महान अउर चमत्कारवाला अद्भुत कार्य कइ के मिस्र स बाहेर निकार्या अउर हमक आजाद किहा। तू अपने लोगन क समन्वा गया अउर दूसर लोगन क हमरे बरे भुइँया छोड़ेइ क मजबूर किहा। अउर इ महान कार्य कइके तू मसहूर होइ गवा। ²² तू इस्राएल क सदा बरे आपन लोग बनाया अउर यहोवा तू ओकर परमेस्सर भया।

²³ “यहोवा, तू इ प्रतिग्या मोहसे अउर मोरे परिवार स किहा ह। अब स तू सदा बरे इ प्रतिग्या क बनाए राखा। उ करा जउन तू करइ कहया। ²⁴ अपनी प्रतिग्या क पूरा करा, जेहसे लोग तोहरे नाउँ क सम्मान सदा बरे कइ सकइँ। तब लोग कहिहीं, ‘सर्वसक्तीसाली यहोवा इस्राएल क परमेस्सर अहइ।’ मइँ तोहार सेवक अहउँ। कृपा कइके मोरे परिवार क सक्तीसाली होइ द्या अउर उ तोहार सेवा सदा करत रहइ।

²⁵ “मोरे परमेस्सर, तू मोहसे, अपने सेवक कहया, कि तू मोरे परिवार क एक ठु राजपरिवार बनउब्या। एह बरे मइँ तोहारे समन्वा ऍतना निडर होत हउँ, एह बरे मइँ तोहसे इ सबइ चिजियन करइ बरे कहत हउँ। ²⁶ यहोवा तू परमेस्सर अहा अउर परमेस्सर तू एन नीक चिजियन क वचन मोरे, आपन सेवक बरे किहा ह। ²⁷ यहोवा, तू मोरे परिवार क आसीस देइ मँ ऍतना जियादा दयालु रहा ह। तू प्रतिग्या किहा, कि मोरे परिवार तोहार सेवा सदा सदा ही करत रही। यहोवा तू मोर परिवार क आसीस दिहा ह, एह बरे मोरे परिवार सदा आसीस पाई।”

परमेस्सर क अर्पित होइ जा

4 तोहरे बीच लड़ाइ-झगड़ा क का कारन बाटेन? का ओनकर कारण तोहरे अपने ही भित्तर का वासना नाहीं बाटइ? तोहार उ भोग बिलासपूर्ण इच्छा भी जउन तोहरे भित्तर हमेसा द्वन्द करत रहत हीं? ² तू लोग चाहत अहा परन्तु तोहे मिल नाहीं पावत। तोहमाँ ईर्सा बा अउर तू दुसरे क हतिया करत हया फिन जउन चाहत अहा, पाइ नाहीं सकत्या। अउर इही बरे तू लड़त-झगड़त रहत अहा अउर युद्ध करत अहा। आपन इच्छित चीजन क तू पाइ नाहीं सकत्या काहेकि तू ओन्हे परमेस्सर स नाहीं मँगत्या। ³ अउर जब मांगत भी अहा लेकिन पउत्या नाहीं काहेकि तोहार उद्देस्स पवित्तर नाहीं होत। काहेकि तू ओन्हे अपने भोग-बिलास मँ ही नस्ट करइ क बरे माँगत अहा।

⁴ अरे, बिसवास बिहीन लोगो! का तू नाहीं जानत अहा कि संसार स पिरेम करइ का मतलब होत ह परमेस्सर स घिना करब जइसेन ही बाटइ? जउन कउनउ एह दुनिया स दोस्ती रखइ चाहत ह, उ अपने आपके परमेस्सर क सत्रु बनावत ह। ⁵ का तू अइसेन सोचत ह कि पवित्तर सास्तर अइसेन बेकारइ मँ कहत ह, “परमेस्सर तउ हमरे भित्तर जउन आतिमा दिहे अहइ, उ आतिमा केवल अपने बरे ही सोचत ह।” ⁶ परन्तु परमेस्सर तउ हम पे बहुत जियादा अनुग्रह दरसाए अहइ, इही बरे पवित्तर सास्तर मँ कहा गवा बा, “परमेस्सर घमंडियन क विरोधी अहइ जबकि विनम्र जनन पे आपन अनुग्रह दरसावत ह।”^(A)

⁷ इही बरे अपने आपके परमेस्सर क अधीन कइ द्या। सइतान क विरोध करा। उ तोहरे सामने स भागि खड़ा होइ। ⁸ पममेस्सर क लगे आवा, उहउ तोहरे लगे आवइ। अरे पापियन, आपन हाथ सुद्ध करा अउर अरे संदेह करइवालन, अपने हिरदइ क पवित्तर करा। ⁹ सोक करा, बिलाप करा अउर रोवा। होइ सकत ह तोहरे इ हँसी सोक मँ बदलि जाइ अउर तोहरे इ खुसी बिसाद मँ बदलि जाइ। ¹⁰ पर्भू क सामने खुद क नवावा। उ तोहे ऊँचा उठाई।

निआवकर्ता तू नाहीं अहा

¹¹ भाइयो तथा बहिनियो, एक दुसरे क विरोध मँ बुरा बोलब बन्द करा। जउन अपने ही भाई क विरोध मँ बुरा बोलत हीं, अउर ओका दोसी ठहरावत हीं, उ व्यवस्था क दोसी ठहरत ह। अउर उ व्यवस्था प दोस लगावत अहा अउर यदि तू व्यवस्था प दोस लगावत अहा तउ व्यवस्था क पालन करइवाला नाहीं रहत्या बरन स्वयं ओकरे निआवकर्ता बन जात अहा। ¹² लेकिन व्यवस्था क देइवाला अउर ओकर निआव करइवाला तउ बस एक्कइ बा। अउर उहइ रच्छा कइ सकत ह अउर उहइ खतम करत अहइ। तू फिन अपने साथी क निआव करइवाला तू कउन होत ह्या?

आपन जीवन परमेस्सर क चलावइ द्या

¹³ अइसेन कहइवाले सुना, “आजु या काल्हि हम एह या ओह नगर मँ जाइके एक साल भर उहाँ व्यपार मँ धन लगाइके बहुत स पइसा बनाइ लेबइ।” ¹⁴ परन्तु तू त एतनउ नाहीं जनत्या कि काल्हि तोहरे जीवन मँ का होइ! देखा! तू त ओह धुंध क समान अहा जउन रचिके देर बरे देखॉत ह अउर फिन खोइ जात ह। ¹⁵ तउन एकरे स्थान प तोहका तउ हमेसा इहइ कहइ चाही, “यदि पर्भू की इच्छा होइ तउ हम जीवित रहबइ अउर इ या उ काम भी करबइ।” ¹⁶ परन्तु स्थिति तउ इ बा कि तू तउ अपने आडम्बर पइ खुदइ गरब करत ह्या। अइसेन सब गरब बुरा बाटइ। ¹⁷ तउ फिन इ जानत भए इ उचित बा, ओका न करब पाप बा।

परमेस्सर क बोलाउब अउ योना क भागब

1 अमित्तै क पूत योना स यहोवा कहेस। यहोवा कहेस, ² “नीनवे^[a] एक ठु बड़का नगर अहइ। हुआँ क लोग जउन पाप करम करत अहइँ, ओनमाँ बहोत स पापन क बारे मँ मइँ सुनेउँ ह। एह बरे तू उ सहरे मँ जा अउर हुआँ क लोगन्क बतावा कि उ पचे ओन बुरे पापन करब तजि देइँ।”

³ योना परमेस्सर क बात नाहीं मानइ चाहत रहा, तउ योना परमेस्सर स कहूँ दूरि पराइ बरे जतन किहेस। तउ योना यापो^[b] कइँती चला गवा। योना एक ठु नाव लिहेस जउन सुदूर सहर तर्सीस^[c] कइँती जात रही। योना आपन जात्रा बरे धन दिहस अउर उ नाव पइ जाइके चढ़ा। योना चाहत रहा कि इ नाव पइ उ लोगन्क संग तसीर्स चला जाइ अउर कहूँ दूरि पराइ जाइ।

खउफनाक तूफान

⁴ मुला यहोवा सागरे मँ एक ठु खउफनाक तूफान उठाइ दिहस। आँधी सागरे क बहोत असान्त कइ दिहेन इ अइसा लागत रहा कि जहाज क टूका-टूका होइ जाब्या। ⁵ तूफान ऍतना प्रबल रहा कि नाव क बूड़इ स बचावइ बरे ओका तनिक हलका कइ दीन्ह जाइके निर्णय कीन्ह गएस। तउ मल्लाह नाव क सामान क उठाइके सागरे मँ बहावइ लागेन। उ पचे बहोतइ ससाइ ग रहेन। हर मनई अपने अपने देवतन स पराथना करइ लागेन।

योना सोवइ बरे नाव मँ खाले तलघरा चला गवा रहा, अउर उ सोवत रहा। ⁶ नाव क प्रमुख खेवइया योना क इ रूपे मँ लखिके कहेस, “उठा! तू काहे सोवत अहा? आपन परमेस्सर स पराथना करा। होइ सकत ह, तोहार परमेस्सर तोहार पराथना सुनि लेइ अउर हम पचन्क बचाइ लेइ।”

इ तूफान काहे आवा?

⁷ मनइयन फुन आपुस मँ कहइ लागेन, “हम पचन्क इ जानइ बरे कि हम पचन्पइ बिपदा कउने कारण पड़ति अहइँ, हम पचन्क पाँसन लोकाँवइ चाही।”

तउ लोगन पासन्क लोकाँएन। पाँसन्स इ परगट भवा कि बिपदन योना क कारण आइ अहइँ। ⁸ एह पइ मनइयन योना स कहेन, “इ केकर दोख अहइ, जेकरे कारण इ सबइ बिपदन हम पचन पइ पड़ी अहइँ? हम पचन्क बतावा तोहार काम धंधा का अहइ? तू कहाँ स आवत अहा? तोहार देस कउन स बाटइ? तोहार आपन लोग कउन अहइँ?”

⁹ योना मनइयन स कहेस, “मइँ एक ठु हिब्रू अहउँ अउर सरगे क परमेस्सर यहोवा क उपासना करत हउँ, उ उहइ परमेस्सर अहइ, जउन सागरे अउ धरती क दुइनउँ क रचेस ह।”

¹⁰ योना मनइयन स कहेस कि उ यहोवा स दूरि भागत अहइ। जब मनइयन क इ क पता लगि तउ उ पचे बहोतइ ससाइ गएन। मनइयन योना स कहेन, “तू इ पाप आपन परमेस्सर क खिलाफ काहे किह्या ह”^[d]

¹¹ ओहर आँधी अउ तूफान अउर समुद्दर क लहरियन तेज स तेज होत भइ जात रहिन। तउ मनइयन योना स कहेन, “समुद्दर क सान्त करइ बरे हम पचन्क तोहरे संग का करइ चाही?”

¹² योना मनइयन स कहेस, “मइँ जानत हउँ कि मोरे कारण ही समुद्दर मँ इ तूफान आवा ह। तउ तू पचे मोका समुद्दरे मँ लोकाइ द्या। एहसे तूफान सान्त होइ जाइ।”

¹³ मुला उ पचे योना क समुद्दर मँ लोकावइ नाहीं चाहत रहेन। मल्लाह नइया क किनारे वापस लिआवइ बरे ओका खेवइ क जतन करइ लागेन। मुला उ पचे वइसा नाहीं कइ पाएन, काहेकि आँधी, तूफान अउ समुद्दर क लहरियन बहोत ताकतवर रहिन। अउर उ सबइ तेज स तेज होत जात रहिन।

योना क सजा

¹⁴ तउ मनइयन यहोवा क गोहँरावत भए कहेस, “हे यहोवा, इ मनई क हम पचे एकर ओन बुरे करमन बरे समुद्दर मँ लोकावत अही, जउन इ किहेस ह। किरपा कइके, तू हम पचन्क कउनो बेकसूर मनई क हत्तियारा जिन कहया। एकरे हत्तिया बरे तू हम पचन्क जिन मारि डाया। हम पचे जानित ह कि तू यहोवा अहा अउर तू जइसा चहब्या, वइसा ही करब्या। मुला किरपा कइके तू हम पचन्प दयालु ह्वा।”

¹⁵ तउ मनइयन योना क समुद्दरे मँ लोकाँइ दिहन। तूफान थम गवा, समुद्दर सान्त होइ गवा। ¹⁶ जब मनइयन इ लखेन, तउ पचे यहोवा स डेराइ लागेन अउ ओकर सम्मान करइ लागेन। मनइयन एक ठु बलि दिहन, अउर यहोवा स बिसेस मन्नतन क माँगेन।

¹⁷ योना जब समुद्दर मँ गिरा, तउ यहोवा योना क लील जाइ बरे एक ठु बहोत बड़की मछरी पठएस। योना तीन दिन अउ तीन राति तलक ओ मछरी क पेटे मँ रहा।

सबित क पर्भू ईसू

(मत्ती 12:1-8; मरकुस 2:23-28)

6 अब अइसा भवा कि सबित क एक दिन ईसू जब अनाजे क खेतन्स जात रहा तउ ओनकर चेलन अनाजे क बलिया तोड़तेन, हथेली प रगड़ितेन अउर ओनका चबात जात रहेन। ² तबहीं कछू फरीसियन कहेन, “जेका सबित क दिन कीन्ह जाब नीक नाहीं बा, ओका तू पचे काहे करत अहा?”

³ जवाब देत भवा ईसू ओनसे पूछेस, “का तू पचे नाहीं पढ़्या जब दाऊद अउर ओकर साथी भुखान रहेन, तब दाऊद का किहेस? ⁴ का तू नाहीं बाँच्या कि उ परमेस्सर क घरे मँ घुसिके, परमेस्सर क चढ़ाई गइ रोटिन क उठाइके खाइ लिहस अउर ओनका भी दिहेस जउन ओकरे संग रहेन? जब कि याजकन क तजिके ओकर खाब कउनो बरे नीक नाहीं।” ⁵ उ अगवा फिन कहेस, “मनई क पूत सबित क दिन क भी पर्भू अहइ।”

ईसू सबित क दिन रोगी क चंगा किहेस

(मत्ती 12:9-14; मरकुस 3:1-6)

⁶ दूसर सबित क दिना अइसा भवा कि उ आराधनालय मँ जाइके उपदेस देइ लाग। हुवँई एक अइसा मनई रहा जेकर दाहिन हाथ सुखंडी होइ गवा रहा। ⁷ हुवँई धरम सास्तिरियन अउर फरीसियन इ ताक मँ रहेन कि उ सबित क दिन कउनो चंगा किहे होइ तो ओह प दोख लगावइ क कउनो कारण पाइ जाइँ। ⁸ उ ओनके बिचारन क जानत रहा। यह बरे उ सुखंडी हथवावाले मनई स कहेस, “उठा अउर सबन क समन्वा खड़ा होइ जा।” उ उठि गवा अउर हुवाँ खड़ा होइ गवा। ⁹ तब ईसू मनइयन स कहेस, “मइँ तोहसे पूछत हउँ-सबित क दिन कउनो क भला करब चंगा अहइ या कउनो क नोसकान करब, कउनो क जिन्नगी बचाउब नीक बा या कउनो क जिन्नगी क नास करब।”

¹⁰ ईसू चारिहुँ कइँती ओन सबन क निहारेस अउर फिन ओसे कहेस, “आपन हथवा सोझ फइलावा।” उ वइसा ही किहेस अउर ओकर हाथ फिन स चंगा होइ ग। ¹¹ मुला ऍह पइ उ पचे आपुस मँ तहत्तुक करत कोहाइ गएन अउर बिचारइ लागेन, “ईसू क का कीन्ह जाइ?”

ईसू बारह प्रेरितन क चुनेस

(मत्ती 10:1-4; मरकुस 3:13-19)

¹² उ दिनन मँ अइसा भवा कि ईसू पराथना करइ बरे एक पहाड़े प गवा अउर सारी राति परमेस्सर क पराथना करइ मँ बिताएस। ¹³ फिन मोर भवा तउ उ आपन मनवइयन क लगे बोलॉएस। ओहमाँ स उ बारहु क चुनेस, जेनका उ “प्रेरितन” क नाउँ दिहस।

ईसू क मनइयन क उपदेस अउर चंगा करब

(मत्ती 4:23-25; 5:1-12)

¹⁷ फिन ईसू ओनके संग पहाड़ी स तरखाले उतरिके समथर भुइयाँ प खड़ा भवा। हुवँई ओकरे चेलन क भारी जमघट रहा। एकरे साथ समूचइ यहूदिया, यरूसलेम, सूर अउर सैदा क समुद्दर किनारे स अनगिनत आलम हुवाँ आइके ऍकट्ठा भवा। ¹⁸ उ पचे ओका सुनइ अउर बेरामी स छुटकारा पावइ हुवाँ आए रहेन। जउन दुस्ट आतिमा स सतावा रहेन, उ पचे भी हुवाँ आइके चंगा भएन। ¹⁹ समूची भीड़ ओका छुइ भरि लेइ क जतन मँ रही काहेकि ओहमाँ स सक्ती निकरत रही अउर ओन सबन क बेरामी स दूर करत रही।

²⁰ फिन उ आपन चेलन क निहारत भवा बोला,

²² “धन्य अहा तू, जब मनई क पूत क कारण लोग तोहसे घिना करइँ, अउर तोहका निकारि देइँ; अउर करइँ तोहार बुराई, नाउँ तलक क दुस्ट कहिके, काटि देइँ उ पचे। ²³ तब उहइ दिन तू मगन होइके खुसी मँ उछर्या काहकेइ सरग मँ तोहार प्रतिफल महान अहइ। काहेकि ओनके पूर्वजन भी नबियन क संग अइसा ही किहन ह।

²⁶ “बा धिक्कार तोहका, जब सबन दुआरा तोहार बड़कई होइ काहेकि ओनके पूर्वजन भी इही ब्यौहार झूठे नबियन क संग किहे रहेन।

आपन बैरी स पिरेम करा

(मत्ती 5:38-48; 7:12a)

²⁷ “ओ सुनवइया लोगो, मइँ तोहसे कहत हउँ आपन बैरी स भी पिरेम करा। जउन तोहसे घिना करत हीं ओनके संग भलाई करा। ²⁸ ओनका भी आसीर्बाद द्या जउन तोहका सरापत हीं। ओनके बरे पराथना करा जउन तोहरे संग नीक ब्यौहार नाहीं करतेन। ²⁹ जदि कउनो तोहरे एक गाले प थप्पड़ियावइ तउ तू दूसर गाल भी ओकरे अगवा कइ द्या। जदि कउनो तोहार कोट तोहसे लइ लेइ तउ ओहका कुर्ता भी लइ लेइ द्या। ³⁰ जदि कउनो तोसे माँगइ, ओका द्या। जदि कउनो तोहार कछू राखि लेइ तउ ओसे ओका वापस जिन माँगा। ³¹ तू आपन बरे जइसा ब्यौहार दूसरन स चाहत बाट्या, तोहका वइसा ही दूसर क संग ब्यौहार करइ चाही।

³² “जदि तू बस ओनही क पिआर करत ह, जउन तोहका पिआर करत हीं, तउ ऍहमा तोहार कउन बड़कई? काहेकि आपन स पिरेम करइवालन स पिरेम तउ पापी मनई तलक करत हीं। ³³ जदि तू बस ओनहीं क भला करत ह, जउन तोहार भला करत हीं, तउ तोहार कउन बड़कई? अइसा तउ पापी तलक करत हीं। ³⁴ जदि तू सिरिफ ओनही क उधार देत ह, जेनसे तोहका वापस मिल जाइ क आसा बा, तउ तोहार कउन बड़कई? अइसे तउ पापी भी पापी मनइयन क देत हीं कि ओनका ओनकी पूरी रकम वापस मिलि जाइ।

³⁵ “मुला आपन दुस्मन स भी पिआर करा, ओनके संग भलाई करा। कछू भी वापस मिलि जाइके आसा तजिके उधार द्या। इ तरह तोहार फल महान होइ जाई अउर तू सर्वोच्च (परमेस्सर) क संतान बनब्या काहेकि परमेस्सर एहसाने क मानइवालन अउर दुस्ट मनइयन प भी दाया करत ह। ³⁶ जइसे तोहार परमपिता दयालु बा, वइसे ही तू दयालु बना।

आपन क पहिचाना

(मत्ती 7:1-5)

³⁷ “कओ क दोखी जिन कहा तउ तोहका भी दोखी नाहीं कहा जाइ। कओ क नोक्तचीनी जिन करा तउ तोहार भी नोक्ताचीनी नाहीं कीन्ह जाइ। छमा करा, तोहका छमा मिली। ³⁸ द्या तोहका भी दीन्ह जाइ। उ पचे तोहरे झोरी मँ पूरा नाप दबाइ दबाइ के, हलाइके बाहेर निकसत भइ उड़ेरिहीं काहेकि जउने नापे स तू दूसरन क नापत ह, उहइ स तोहका नापा जाइ।”

³⁹ उ ओनसे एक ठु दिस्टान्त कथा अउर कहेस: “का कउनो आँधर कउने दूसरे आँधर क राह देखाइ सकत ह? का उ सबइ दुइनउँ ही कउनो गड़हा मँ नाहीं भहरइहीं? ⁴⁰ कउनो भी पढ़वइया आपन पढ़ावइवालन स बड़वार नाहीं होइ सकत, मुला जबहिं कउनो मनई पूरी तरह हुसियार होइ जात ह तउ उ आपन गुरु क नाई होइ जात ह।

⁴¹ “तू आपन भाई क आँखी मँ कउनो ढेंढ़ा काहे लखत ह अउर आपन आँखी क लट्ठा भी तोहका नाहीं चोंधरात। ⁴² तउ आपन भाई स तू कइसे कहि सकत ह ‘भाई तू अपन आँखी क तिनका मोका निकारइ द्या।’ जब तू आपन आँखी क लट्ठा क नाहीं निहरत्या। अरे कपटी, पहिले आपन आँखी क लट्ठा दूर करा, तब तोबका आपन भाई क आँखी क ढेढ़ा बाहेर निकारइ बरे देखॉइ पड़ी।

दुइ किसिम क फर

(मत्ती 7:17-20; 12:34b-35)

⁴³ “कउनो भी अइसा उत्तिम बृच्छ नाहीं अहइ जेह पइ बुरा फर लागत होइ। न ही कउनो अइसा बुरा बृच्छ बाटइ, जेइ पइ उत्तिम फर आवति होइ। ⁴⁴ हर बृच्छ आपन फर स पहिचाना जात ह। मनइयन कँटेहरी झारी स अंजीर नाहीं बटोरतेन। न ही कउनो झरबेली स मनई अंगूर बटोरत हीं। ⁴⁵ एक नीक मनई क मन मँ अच्छाइ क भंडार बाटइ। अउर एक खोटा मनई, जउ ओकरे मने मँ बुराई बाटइ, उहइ स बुराई पइदा करत ह। काहेकि एक मनई मुँहना स उहइ बोलत ह, जउन ओकरे हिरदइ मँ उफनाइ के बाहेर आवत ह।

आपन क पहिचाना

(मत्ती 7:24-27)

⁴⁶ “तू मोका, ‘पर्भू पर्भू’ काहे पुकारत ह अउर जउन मइँ कहत हउँ, ओह प नाहीं चलत्या। ⁴⁷ हर कउनो जउन मोरे लगे आवत ह अउर मोर उपदेस सुनि लेत ह अउर ओह पर आचरण करत ह, उ कउने तरह क होत ह, मइँ तोहका बताउब। ⁴⁸ उ उहइ मनई क नाई अहइ जउन मकान बनावत बाटइ। उ गहिर खुदाई किहेस अउर चट्टानें प नेंव डाएस। फिन जब बाढ़ आइ अउर नदी मकाने प टकरान तउ ओका हलाइ नाहीं पाएस, काहेकि उ बहोत अच्छी तरह स बना रहा।

⁴⁹ “मुला जउन मोर उपदेस सुनत ह अउर ओहॅ प चलत नाहीं उ ओ मनई क नाई अहइ जउन बे नेंव धरे धरती प मकान बनाएस। नदी ओसे टकरान अउर उ फउरन ढहाइ गवा अउर पूरी तरह बरबाद होइ गवा।”