M’Cheyne Bible Reading Plan
Jesustaca Getsemanipimi japishcacuna
18 Jesusca chaicunata nishca q'uipaca, Paipaj yachacujcunandijmi, Cedrón shuti yacu huaicu ch'imbanijman rirca. Chaipica shuj huertami tiyarca. Jesusca paipaj yachacujcunandijmi chaiman yaicurca.
2 Tauca cutin Paipaj yachacujcunahuan chaipi tandanacuj cashcamantami, Jesusta japichij Judaspish chai huertataca rijsirca. 3 Judasca achca soldadocunatapish, pushaj curacuna, fariseocuna cachashca chapajcunatapish pushashpami shamurca. Chaicunaca linternacunahuan, nina sindicunahuan, macanacunacunahuanmi shamurcacuna.
4 Ashtahuanpish Jesusca, tucui imalla tucuna cashcata ña yachashcamantami, Pairaj c'uchuyamushpaca:
–¿Pitataj mashcacunguichij?– nirca.
5 Shina nijpi:
–Nazaretmanta Jesustami mashcacunchij– nijpimi, Jesusca:
–Ñucamari cani– nirca.
Paita japichij Judaspish chaicunahuanmi carca.
6 «Ñucami cani» nijpica, paicunaca huashaman tigrashpami, pambaman urmarcacuna. 7 Jesús cutinllataj:
–¿Pitataj mashcacunguichij?– nishpa tapujpimi, paicunaca:
–Nazaretmanta Jesustami mashcacunchij– nircacuna.
8 Chashna nijpi Jesusca:
–Illu, ‘Ñucamari cani’ ninica. Ñucata mashcacushpaca, Ñucahuan cajcunataca richun saquichijlla– nircami.
9 Yaya Diosta: «Can Ñucaman cushcacunataca, shujllatapish mana chingachircanichu» nishca pajtachunmi, chashna tucurca. 10 Chaipimi Simón Pedroca, pai charicushca espadata surcushcahuan, curacunata mandaj curata servij, Malco shuti runataca, alli lado rinrinta p'itirca.
11 Chashna rurajpimi Jesusca, Pedrotaca:
–Cambaj espadataca, huaquichinallapitaj huaquichilla. Yaya Ñucaman cushca jayaj ubyanataca, ubyanatajmi cani– nircami.
Jesusta japishpaca Anás shuti curapajmanmi pushashcacuna
12 Chashna nijpica, chai mirga soldadocunapish, paicunata mandajpish, judiocuna cachashca chapajcunapishmi Jesusta japishpa huatarcacuna. 13 Chaimantaca, curacunata chai huata mandacuj Anás shuti curapajmanrajmi pusharcacuna. Paica, Caifaspaj suegromi. 14 Caifasmi judiocunamanca: “Tucui israelcunamantaca, shuj runalla huañunamari ashtahuan alli” nishpa yuyaita cushca carca.
Pedroca Jesustaca ‘Mana rijsinichu’ nishcami
15 Simón Pedrohuan, shuj yachacujhuanmi Jesustaca catishpa rircacuna. Chai yachacujca, curacunata mandaj curapaj rijsishcami carca. Chaimantami paica, chai curacunata mandaj curapaj huasi canllamanca, Jesusdij yaicurcalla. 16 Ashtahuanpish Pedroca, canlla pungullapimi saquirirca. Chaimantami curacunata mandaj curapaj rijsishca yachacuj llujshimushpaca, pungupi ricujhuan rimashpa, Pedrotapish yaicuchirca.
17 Pedro yaicujpica, pungupi ricuj solterami:
–Canpish cai runapaj yachacujllatajmari yuyachingui– nijpi, Pedroca:
–Mana chaichu cani– nircami.
18 Chiri cajpimi servijcunapish, chapajcunapish ninata japichishpa, cunushpa shayacurcacuna. Pedropish paicunallahuantajmi, cunushpa shayacurca.
Jesustaca Anaspaj huasipimi tapushcacuna
19 Curacunata mandaj curami Jesustaca, Paipaj yachacujcunamantapish, Pai imallata yachachicushcatapish tapurca. 20 Chaicunata tapujpimi, Jesusca cashna nirca:
–Ñucaca, cai pachapi causajcunamanca, tucuicunamanmi rimarcani. Tandanacuna huasipi, Diospaj huasipi, tucui judiocuna tandanacushcapimi yachachij carcani. Imata mana pacalla rimarcanichu. 21 ¿Ima nishpataj Ñucataca tapungui? Ñuca imalla nishcata uyajcunata tapuilla, paicunami Ñuca imallata nishcataca yachancuna– nircami.
22 Jesús chashna nijpica, chapajcunamanta shujmi:
–Curacunata mandaj curataca, ¿chashnachu c'ariyangui, imamí?– nishpa, quijadospi huajtarca.
23 Chaimantami Jesusca:
–Ima mana allita rimashca cajpica, huillaiari. Allillatataj rimashca cajpica, ¿imamantataj huajtangui?– nishpa tapurca.
24 Chaimantaca, curacunata mandaj Anasca Caifaspajmanmi, Jesustaca huatashcallatataj cacharca.
Pedroca Jesustaca cutinmi ‘Mana rijsinichu’ nishca
25 Chaicamaca Pedroca, cunushpallatajmi shayacurca. Chaipimi:
–Canpish Paipaj yachacujllatajmari yuyachingui– nishpa tapurcacuna.
Shina tapujpi Pedroca:
–¡Mana chaichu cani!– nircami.
26 Curacunata mandaj curapaj servijcunapuramanta shujmi:
–Ñuca quiquinmari cantaca chai runahuan huertapi cajta ricurcani– nirca.
Chashna nij runaca, rinrinta Pedro p'itishca runapaj huasi ucupurami carca.
27 Pedro cutinllataj ‘Mana rijsinichu’ nicujpica, galloca ñapish cantarcallami.
Jesustaca Pilatopajmanmi pushashcacuna
28 Tutamanta utcatami Jesustaca, Caifaspaj huasimantaca Pilato mandashpa tiyana huasiman pushashpa rircacuna. Pascua micuita micungapaj ama jarca tiyachunmi, ama mapayangapaj, chai ucumanca mana yaicurcacuna. 29 Chaimantami Pilatoca, paicunapajman llujshishpa:
–Cai runataca, ¿imata juchachishpataj apamunguichij?– nirca.
30 Chashna nijpi paicunaca:
–Mana jatun millai cashca cajpica, mana cambajman pushamunchijmanchu carca– nircacunami.
31 Chashna nijpi, Pilatoca:
–Shinashpaca, cancunallataj Paitaca pushashpa, cancunapaj Mandashcapi nishca shina juchachichijlla– nircami.
Chashna nijpi judiocunaca:
–Ñucanchijca, pita huañuchingapaj mandashcataca mana charinchijchu– nircacunami.
32 Ima shina huañuna cashcata Jesusllataj ña huillashca pajtachunmi, chashnaca tucurca. 33 Pilatoca, mandashpa tiyana ucuman cutin yaicushpa, Jesusta cayashpaca:
–¿Canchu judiocunapaj Jatun Mandaj cangui?– nircami.
34 Shina nijpi Jesusca:
–¿Cambaj yuyaillamantatajchu chashnaca ningui, mana cashpaca shujtajcunachu Ñucamanta chashna nircacuna?– nircami.
35 Chashna nijpi, Pilatoca:
–¿Ñucaca judiochari caniari? Cambaj llajtapuracunallatajmi, pushaj curacunahuan tucushpa, Cantaca ñuca maquipi churarcacuna. ¿Imatataj rurarcanguiari?– nishpami tapurca.
36 Chashna nijpi Jesusca:
–Ñucaca, mana cai pachapichu mandana cani. Ñuca mandana caillapitaj cajpica, judiocuna Ñucata ama japichun, Ñucata servijcuna Ñucamanta macanacunmanmi. Ashtahuanpish Ñuca mandanaca, manamari cai pachapajchu– nircami.
37 Chaimantami Pilatoca:
–Shinashpaca canca, ¿jatun mandajchu cangui?– nijpi Jesusca:
–Canllatajmi Ñucataca, jatun mandaj ningui. Ñucaca cai pachamanca, chaipajllatajmari shamurcani, chaipajmi huacharircani, cashcatataj huillangapajpishmi shamurcani. Pipish, cashcatataj huillajpaj cashpallami, Ñuca imalla nishcataca uyan– nircami.
38 Shina nijpi, Pilatoca:
–¿Imataj, cashcatataj huillanaca?– nircami.
Chashna nishca q'uipaca, judiocunapajman canllaman cutin llujshishpami, cashna nirca:
–Ñucaca, ima millaita rurashcata mana japinichu. 39 Shina cajpipish cancunaca, Pascuapica shuj preźutamari cacharichun munanguichij. Cunanca ¿maijantataj cacharichun ninguichij? ¿“Judiocunapaj Jatun Mandajtachu” cacharichun ninguichij?– nircami.
40 Chashna nijpica:
–¡Chaitaca mana cacharichun ninchijchu! ¡Barrabastami cacharichun ninchij!– nishpami, tucuicuna caparirca. Barrabasca, jatun shuhuami carca.
Cristotaca tucuita yallimi jatunyachishca
2 Chaimanta, Cristomi cancunataca cushichicun. Paipaj c'uyaimi, cancunataca samachicun. Diospaj Espiritupish cancunahuanmi, tucui shunguhuan llaquinacunguichij, c'uyanacunguichij. 2 Chaimanta tucuicuna llaquinacushpaca, tucuicunallataj shujlla shina yuyashpa, shujlla shina c'uyanacushpa shujlla munai, shujlla yuyai tucushpa, ñuca cushicusha nicushca shinataj cushichihuaichij. 3 Imata rurashpapish p'iñanacushpa jatun tucushpaca, ama ruraichijchu. Ashtahuanpish mana jatun tucushpa, caishujcunami ñucata yalli alli nishpa, yuyanacuichij. 4 Pipish quiquinpajllaca, ama yuyaichijchu. Ashtahuanpish tucuicunallataj, shujtajcunapaj allita ruranata yuyaichij.
5 Cancunapish Cristo Jesús yuyashca shinallataj, cashna yuyaichigari:
6 Paica, Diosllatajmi carca.
Shina cashpapish, ‘Taita Dios shinallatajmi cani’ nishpa,
chaita cacharishca canataca mana munarcachu.
7 Ashtahuanpish Cristoca, Paipaj quiquin munaihuanmi,
Pai ima cashcata ladoman saquishpa shamurca.
Chaimantaca, ñucanchij shinallataj aichayuj tucushpami, servij runa tucurca.
8 Paica, chashna aichayuj runa tucushca jahuapish,
ashtahuan yangamanmi uriyarca.
Tucuipi Diosta caźushpami chacatashca,
pinganayajta huañuna tucurca.
9 Chaimantami Taita Diosca, Paitaca tucuicunata yalli jatunyachirca.
Shutitapish tucui shuticunamanta yalli,
jatun shutitami curca.
10 Chaimantami Jesuspaj shutita uyashpaca,
jahua pachapi cajcunapish, cai pachapi cajcunapish, allpa ucupi cajcunapish
tucuicuna Paipaj ñaupajpi cunguringa.
11 Chaipimi, tucuicunallataj Jesucristotaca, ‘Mandajmi’ nishpa,
Taita Diosta sumajyachingacuna.
Cai pachata achijyachij luźerocuna shinami canguichij
12 Chaimanta ñuca c'uyashcacuna, ima shinami cancunahuan cajpi ñucata alli caźurcanguichij, cunan ñuca mana cancunahuan cajpicarin, ashtahuan alli caźuichij. Cancuna chasquishca quishpirinataca, manchaihuan, chujchuihuan alli catiraichij. 13 Diosmari cancunamanca, allita rurana yuyaitapish, chai yuyashcata Pai munashca shina rurachunpish yachachicun.
14 Imata rurashpapish ama huashalla rimanacushpa, ama p'iñanacushpa ruraichijchu. 15 Caitaj millai juchasapa runacunapaj chaupipica, cancunataca pipish ima juchachinata ama charichun. Taita Diospaj huahuacuna cashcamantaca, alli shungu, chuya runacunami cana canguichij. Paicunapajca, cai pachata achijyachicuj luźerocuna shinami canguichij. 16 Causaita cuj cai shimicunata catinataca, amataj saquinguichijchu. Chashna catijpitajca, Cristo shamui punllapica, ñucaca mana yanga yachachishcata, mana yanga huillashcata ricushpa, jatunta cushicushami. 17 Cancuna crishcamanta, Diosman cushpa rupachishca jahuapi ñucata huañuchijpi pajtachinata yachashpapish, tucui cancunahuanmi achcata cushicuni. 18 Cancunapish shinallataj cushicuichij, tucuicunallataj ñucahuan cushicushunchij.
Timoteohuan Epafroditohuanmi Filiposman ñaupachishca
19 Apunchij Jesús munajpica, Timoteotami cancunata ricunaman ña cachanata yuyacuni. Pai tigramushpa cancuna imanalla cashcata huillajpimi, ñucapish achcata cushicusha. 20 Timoteoca, ñuca shinallataj cancuna yuyaimi purin. Pi mana pai shinaca tiyanchu. 21 Tucui caishujcunaca, paicuna quiquinpajllami yuyancuna, Cristo Jesús imata rurachun nishcatatajca, mana rurashun nincunachu. 22 Ashtahuanpish Timoteoca churi, paipaj yayahuan tandalla imatapish ruraj shinami, alli huillaita ñucahuan huillashpa purin. Chaitaca, cancunallataj yachanguichijmi. 23 Chaimanta paitami, cancunapajman cachanataj cani. Ñucata charicujcuna imata nijllatami shuyacuni. 24 Ashtahuancarin Apunchij Jesusca, ñuca quiquinllatataj cancunata ricunaman pushangami yuyacunimi.
25 Chashna yuyacushpapish ñucahuan huillaj, ñucahuan purij, soldado shina Diospajta ñucahuan ruraj, ñuca huauqui Epafroditotaca, cachanataj yuyachijpimi cachani. Paitaca cancunamanta, ñucaman parlachunpish, ñucapaj imata rurana cajpipish, chaita rurachunpishmi cachashca carcanguichij. 26 Epafroditoca, tucui cancunata ricugrina yuyaillami carca. Pai ungushca cashcata cancuna yachashcamantapish, paica achca llaquillami. 27 Paica ancha ungushca, huañunallatajmari tucurca. Ashtahuanpish ñuca ama ashtahuan jahuanpi jahuanpi llaquita charichunmi, Taita Diosca paitapish, ñucatapish achcata llaquirca. 28 Cunanca, cancuna paita cutin ricushpa cushicuchunmi cachani. Cancunahuan pai cutin tupajpica, ñuca shungupish samaringami. 29 Pai chayajpica, Apunchij Jesusmanta tucui shunguhuan cushicushpa chasquipaichij. Pai shina alli cajcunahuanpish alli caichij. 30 Paica Cristopaj ruracushcamantami, ashamanta mana huañurca. Cancuna carupi cashpa, ñucapaj imata mana rurai tucujpimi, cancunapaj randi ñucata ayudacushpa, huañunata quishpirirca.
Mushuj Testamento Diospaj Shimi (Quichua‐Chimborazo New Testament) Copyright © 2010 by Biblica, Inc.™ Used by permission. All rights reserved worldwide.