M’Cheyne Bible Reading Plan
Mana ricuj huacharishca runatami Jesús alliyachishca
9 Chaimanta llujshishpa ricushpaca Jesusca, mana ricuj huacharishca shuj runatami ricurca. 2 Chaita ricushpami, yachacujcunaca:
–Rabí, cai runa chashna huacharichunca, ¿paillatajchu, mana cashpaca, paipaj yaya mamachu juchallishca canga imashi?– nishpami tapurcacuna.
3 Jesusca, cashnami cutichirca:
–Pai, mana cashpaca paipaj yaya mama juchallishcamantaca, mana chashna huacharircachu. Ashtahuanpish Diosllataj tucuita rurai tucuj cashcata cai runapi ricuchichunmi, chashnaca huacharirca. 4 Punlla tiyajpirajmi, Ñucata Cachaj ‘Rurai’ nishcataca rurana cani. Tutayajpica pi mana imata rurai tucunchu. 5 Cai pachapi cashcacamaca, cai pachapi achijyachij Luzmi cani– nircami.
6 Chashna nishpaca Jesusca, allpata ch'ucahuan nuyuchishpa chapushpami, mana ricujpaj ñahuipi llutarca. 7 Chai q'uipaca:
–Ri, Siloé yacu tandarishcapi maillarigri– nircami.
Chai yacupi maillarigrishpaca, ricuj ñahuiyuj tigramurcallami (Siloé shimica: “Cachashca” nisha ninmi). 8 Chaimantami c'uchullapi causajcunapish, mana ricuj cashcata rijsijcunapish: «Caica, ¿mañashpa tiyaj runa shiná?» ninacurca.
9 Maijancunaca: «Paitajmari» nircacunami.
Cutin shujtajcunaca: «Paimi yuyachin» nircacunami.
Chaimantami paica: «Ñucatajmari cani» nirca.
10 Shina nijpica:
–¿Ima shinataj cambaj ñahuicunaca pascarirca?– nishpa tapujpimi,
11 cashna cutichirca:
–Jesús shuti runamari allpata chapushpa, ñuca ñahuicunapi llutarca. Chaimantaca: “Ri, Siloé yacupi maillarigri” nircami. Pai nishca shina chai yacupi maillarigrishpaca, ricurcanillamari– nircami.
12 Shina nijpica:
–¿Maipitaj chai runaca?– nishpa tapujpi, paica:
–Imatajshiari, mana yachanichu– nircami.
Fariseocunami ñahuita pi alliyachishcata tapushca
13 Mana ricuj cashca runataca, fariseocunapajmanmi pusharcacuna. 14 Ch'ucahuan allpata chapushpa ñahuicunapi llutashpa, Jesús alliyachi punllaca sabadomi carca. 15 Chai alliyaj runataca fariseocunapishmi, paipaj ñahuicuna ima shina pascarishcata tapurcacuna. Chaipimi paica:
–Allpa chapushcata ñuca ñahuicunapi llutajpi maillarigrishpaca, ricurcanillami– nirca.
16 Chashna nijpimi, maijan fariseocunaca: «Sabadota mana huaquichij chai runaca, mana Diosmanta shamunchu» nircacunami. Cutin shujtajcunaca: «¿Ima shinataj juchayuj runa cashpaca, chashna señalcunataca rurai tucungari?» nircacunami.
Chashnami paicunapurallataj shujta, shujta nishpa rimanacurcacuna.
17 Chaimantami, mana ricuj cashca runataca:
–Canca, ñahuicunata pascajtaca, ¿ima ninguitaj?– nishpa, cutin tapujpica:
–Paica, Dios ima nishcata huillajmari– nirca.
18 Shina nijpipish judiocunaca, mana ricuj runata alliyachishcataca, chai runapaj yaya mamata cayashpa tapungacama manataj crircacunachu. 19 Yaya mamataca:
–¿Caichu mana ricuj huacharishca, cancunapaj churi? ¿Ima shinataj cunanca ricucun?– nishpami tapurcacuna.
20 Chashna nijpi paipaj yaya mamaca, cashnami cutichirca:
–Mana ricuj huacharishca ñucanchij churi cashcataca yachanchijmi. 21 Ashtahuanpish cunanca ima shina pai ricucushcata, pi paipaj ñahuicunata pascashcataca mana yachanchijchu. Paica juilluyujmi, paillatataj tapuichijlla, huillangallami– nircacunami.
22 Judiocunata manchashcamantami, yaya mamaca chashna nirca. Judiocunaca pipish Jesusta ‘Mesiasmi’ nishpa purijtaca, tandanacuna huasimanta llujshichishpa cachanatami yuyarinacushca carca. 23 Chaimantami yaya mamaca: «Juilluyujmi, paillatataj tapuichijlla» nircacuna. 24 Shina nijpimi mana ricuj cashca runata cutin cayashpaca:
–¡Taita Diosta jatunyachi! Ñucanchijca chai runataca, juchayuj cashcatami yachanchij– nircacuna.
25 Chashna nijpica:
–¿Paica juchayujchu manachu juchayuj imachari? Chaitaca mana yachanichu. Ñucaca mana ricuj cashca cashpapish, cunanca Paimanta ricucushcallatami yachani– nircami.
26 Shina nijpipish cutinmi:
–¿Imatataj cantaca rurarca? ¿Ima shinataj cambaj ñahuicunataca pascarca?– nishpa tapurcacuna.
27 Shina nijpica:
–Ñamari huillarcani, mana uyashun nircanguichijca. ¿Ima nishpataj cutintaj tapunguichij? ¿Cancunapishchu Paipaj yachacujcuna tucushun ninguichij?– nircami.
28 Chashna nijpica p'iñarishpami, maipish cachun rimashpa cashna nirca:
–¡Canchari Paipaj yachacuj cangui! ¡Ñucanchijca Moisespaj yachacujcunamari canchij! 29 Moiseshuan Taita Dios rimashcataca, allimari yachanchij. Ashtahuanpish chai runataca, maimanta shamushcata mana yachanchijchu– nircacunami.
30 Shina nijpi chai runaca, cashnami nirca:
–Cunantajca mancharinimi. Paica, maimanta shamushcata cancuna mana yachajpipish, ñuca ñahuicunataca pascarcamari. 31 Taita Diosca juchayujcunata mana uyaj cashcataca yachanchijmi. Ashtahuanpish Paita manchaj, Paipaj munaita rurajllatami uyan. 32 Mana ricuj huacharishcata pi alliyachin nijtaca, cunancama manataj uyashcanchijchu. 33 Paica mana Taita Diospajmanta shamushca cashpaca, imata mana rurai tucunmanchu– nircami.
34 Chashna nijpica:
–Canca huacharipachamantami juchasapa cashcangui. ¿Chai jahuachu, ñucanchijtaca yachachisha ninguiari?– nishpami, llujshichishpa cacharcacuna.
Fariseocunaca yuyai huichcashcami cashca
35 Jesusca, Pai alliyachishca runata llujshichishpa cachashcata uyashpami, mashcashpa paihuan tupashpaca:
–Canca, ¿Diospaj Churitaca cringuichu?– nirca.
36 Chashna nijpica:
–Amitolla, ¿pitaj Paica, ñuca Paita cringapaj, huillahuai?– nircami.
37 Shina nijpi Jesusca:
–Paitaca ricucunguillatajca, cunan canhuan rimacujllatajmari cani– nircami.
38 Chashna nijpica:
–Crinimari, Amito– nishpami, Paitaca adorarca.
39 Chaipimi Jesusca:
–Ñucaca, cai pachapi causajcuna ima shina cashcata ricuchingapajmi shamurcani. Mana ricujcunaca ricuchun, ricujcunaca ama ricuchunmi shamurcani– nircami.
40 Shina nijta paihuan caj maijan fariseocuna uyashpaca:
–¿Ñucanchijpish mana ricujcunachari canchigari?– nircacunami.
41 Chashna nijpi Jesusca, cashnami nirca:
–Cancuna mana ricujcuna cashpaca, jucha illajmari canguichijman. Ashtahuanpish cunanca: “Ricujcunamari canchij” nishpapish, juchapimari causanguichij.
Cristomantami cacharirina tiyan
5 Cristomi ñucanchijtaca, huatashca shinamanta cacharichirca. Chashna cacharichishcamantaca, c'ari c'arita catiraichij. Ama cutin chai yugopi huatarinaman tigraichijchu.
2 Uyahuaichij, Pablomari cancunamanca cashna nini: Cancuna charishca aicha punta carata p'itichishpaca, Cristomantaca ima allita mana japinguichijchu. 3 Cutintaj alli uyaichij: Pipish charishca aicha punta carata p'itichishpaca, Mandashcapi nishcataca callarishpami, tucuita pajtachina tucun. 4 Cancunapuramanta maijancunaca, Mandashcata pajtachishpalla, ima juchachina illaj tucunatami yuyarcanguichij. Chashna yuyashpamari, Cristomanta ch'icanyashcanguichij. Mana c'uyaipaj cajpipish Dios cushca c'uyashcamantapishmi urmashcanguichij. 5 Ñucanchijca, Diospaj Espíritu yuyachijpimi, crishcallamanta ima juchachina illaj tucushcanchij. Chaitamari japina yuyai shuyacunchij. 6 Cristo Jesushuan shujlla cajpica, charishca aicha punta carata p'itichishca cashcapish, chaita mana rurashca cashcapish, ima mana canchu. Ashtahuanpish crishcamantaca, c'uyashpa allita ruranamari alli.
7 Cancunaca, allimari caticurcanguichij. Cashcatataj yachachishcataca, ¿pitaj mana caźunata yachachircari? 8 Chai mana caźuna yuyaitaca, cancunata cayaj Diosca mana curcachu.
9 «Ashalla levadurami, tucui chapushcata p'unguillichin.» 10 Ñucaca tucui shunguhuanmi, cancunataca, ‘Apunchij Jesucristoca, mana pandarishpa catichun saquingachu’ yuyani. Shina cajpipish chai pandachishpa purij runataca pi cajpipish, Paimari jatunta llaquichinga. 11 Huauquicuna, c'ari charishca aicha punta carata p'itichinamanta cunancama huillacushcalla cajpica, israelcunaca mana cashna p'iñashpa llaquichicunmanchu carca. Cristota chacatashpa huañuchishcata huillashcapish, mana paicunataca p'iñachinmanchu carca. 12 ¡‘Quishpirinapajca, charishca aicha punta carata p'itishcami cana canguichij’ nishpa, cancunata p'iñachijcunaca, paicunapajtaca tucui p'itirishpachari alli canman!
13 Huauquicuna, cancunaca mana huatashcallataj catichun Dios cayashca canguichijchu. ‘Huatashcamanta Dios cacharishcami canchij’ nishpa, ama aicha munashcata ruranataca yuyaichijchu. Ashtahuanpish c'uyanacushpa, caishuj chaishujpaj allita ruraichij. 14 Tucui Mandashcatami, cai shimicunallapi tandachishca: «Can quiquinta c'uyarij shinallataj, shujtajcunatapish c'uyangui» nishcami. 15 Ashtahuanpish cancunaca, caishuj chaishuj caninacushpamari micunacucunguichij. Chashnalla catishpaca, ñataj caishuj chaishuj tucuchinacunguichijman.
Diospaj Espirituta caźushpa causaichij
16 Chaimantami cancunataca, cashna nini: Diospaj Espíritu yuyachishcapi purichij. Chashnami quiquin aicha munashcataca, ña mana ruranguichij. 17 Aichaca, Diospaj Espíritu p'iñashcatami mashcan. Cutin Diospaj Espirituca, aicha munashcatami jarcan. Chashna caishuj chaishuj quichunacui tiyajpimi, quiquinllamantatajca ima allita ruraiman yuyashpapish, mana rurai tucunguichij. 18 Ashtahuanpish Diospaj Espíritu yuyaita cushcata cancuna catijpica, Mandashcaca ña mana ima ricunata charinchu.
19 Quiquin aicha munaicunaca, rijsinallami: Caźarashcacuna huainayana, manaraj caźarashpa chayarinacuna, ima mapatapish rurana, cacharishca cana, 20 rurashcalla dioscunata adorana, brujiana, p'iñana, c'aminacuna, quichunacuna, imamantapish p'iñarijlla cana, quiquinlla ashtahuan alli cashcata yuyana, p'iñarina, macanacuna, 21 shujtajcunapajta munana, huañuchina, machana, mashnatapish micuna, chai shina shujtaj mana alli ruraicunapishmi. Cancunataca, ña nishca cashpapish, cutinllatajmi yuyachini: Chashna mana alli ruraicunapi causajcunaca, Taita Dios mandacunpica, imata mana charingacunachu.
22 Ashtahuanpish Diospaj Espirituca, cashna canatami cun: C'uyaj canata, cushi canata, sumajta causanata, mana p'iñarij alli shungu canata, llaquij canata, cuj canata, imatapish pajtachij canata, 23 mana jatun tucushca canata, quiquinllataj jarcarij canatapishmi cun. Tucui caicunata rurajcunataca, mandashcacunapish mana jarcanchu. 24 Cristopaj cajcunaca, quiquin aichataca, tucui millai munaicunandijtami ña chacatashcacuna. 25 Diospaj Espiritumanta ñucanchij causacushpaca, Diospaj Espiritullataj ñucanchijta yachachichun saquishunchigri.
26 Ama imamantapish jatun tucushpa, caishuj chaishuj llaquichinacushunchu. Ama caishuj chaishuj ima charishcacunata munanacushpa huañuricushunchu.
Mushuj Testamento Diospaj Shimi (Quichua‐Chimborazo New Testament) Copyright © 2010 by Biblica, Inc.™ Used by permission. All rights reserved worldwide.