Read the Gospels in 40 Days

Li Jesús quixkˈuseb laj tzˈi̱b ut eb laj fariseo

23  Tojoˈnak li Jesús quixchˈolob li xya̱lal chiruheb li qˈuila tenamit joˈqueb ajcuiˈ lix tzolom ut quixye reheb: ² ―Eb laj tzˈi̱b ut eb laj fariseo, qˈuebileb xcuanquil chixchˈolobanquil xya̱lal li chakˈrab li quiqˈueheˈ re laj Moisés. ³ Joˈcan nak chixjunil li teˈxye e̱re, checˈu̱la saˈ e̱chˈo̱l ut cheba̱nu. Abanan me̱ba̱nu joˈ nequeˈxba̱nu eb aˈan xban nak yal riqˈuin xtzˈu̱mal reheb nequeˈxye ut incˈaˈ nequeˈxba̱nu li cˈaˈru nequeˈxye. ⁴ Kˈaxal a̱l li i̱k nequeˈxqˈue saˈ xbe̱neb li cristian ut kˈaxal chˈaˈaj xcˈambal. Aˈut eb aˈan chi moco riqˈuin ruˈuj rukˈeb nequeˈraj xchˈeˈbal. ⁵ Chixjunil li cˈaˈak re ru nequeˈxba̱nu, aˈan yal re nak teˈilekˈ xbaneb li cristian. Nequeˈxyi̱b chi ni̱nk ru li cocˈ ca̱x filacterias xcˈabaˈ bar nacuan cuiˈ li chakˈrab ut nequeˈxbacˈ saˈ xpe̱quemeb ut saˈ xteleb. Ut nacuulac chiruheb li rakˈeb chi ni̱nk lix sahob ru chire. ⁶ Ut nak nequeˈxic chi cuaˈac saˈ eb li ninkˈe nequeˈxsicˈ li cha̱bil naˈajej bar teˈqˈuehekˈ xlokˈal, ut nequeˈraj cˈojla̱c saˈ li naˈajej kˈaxal lokˈ nak cuanqueb saˈ li cab bar nequeˈxchˈutub cuiˈ ribeb laj judío. ⁷ Eb aˈan nequeˈraj nak teˈoxlokˈi̱k ut teˈqˈuehekˈ xsahil xchˈo̱leb saˈ eb li be. Ut nequeˈraj nak li tenamit teˈxye “tzolonel” reheb. ⁸ Abanan la̱ex me̱rahi ru nak li tenamit teˈxqˈue e̱lokˈal ut teˈxye “tzolonel” e̱re xban nak jun ajcuiˈ laj tzolol e̱re cuan. La̱in li Cristo laj tzolol e̱re ut che̱junilex la̱ex e̱ri̱tzˈin e̱rib. ⁹ Ut ma̱ ani te̱qˈue chokˈ e̱ka̱cuaˈ saˈ ruchichˈochˈ, xban nak jun ajcuiˈ li Ka̱cuaˈ cuan. Aˈan cuan saˈ choxa. ¹⁰ Chi moco checˈabaˈin aj cˈamol be, xban nak jun ajcuiˈ laj cˈamol e̱be. Aˈan la̱in li Cristo. ¹¹ Li ani nacˈanjelac che̱ru, aˈan li kˈaxal nim xcuanquil saˈ e̱ya̱nk. ¹² Li ani naxqˈue xcuanquil xjunes rib, li jun aˈan ta̱cubsi̱k xcuanquil. Ut li ani naxcubsi rib, li jun aˈan ta̱qˈuehekˈ xcuanquil. ¹³ Ra cha̱lel saˈ e̱be̱n, la̱ex aj tzˈi̱b ut la̱ex aj fariseo, ex aj caˈpacˈal u. Incˈaˈ nequecˈut li xya̱lal chiruheb li tenamit ut nequeram chiruheb lix cuanquil li Dios. La̱ex incˈaˈ nequeraj xkˈaxtesinquil e̱rib rubel xcuanquil li nimajcual Dios ut incˈaˈ ajcuiˈ nequecanabeb chixkˈaxtesinquileb rib li ani nequeˈraj. ¹⁴ Ra cha̱lel saˈ e̱be̱n, la̱ex aj tzˈi̱b ut la̱ex aj fariseo, ex aj caˈpacˈal u. Nequemakˈ li rochocheb li xma̱lcaˈan ut nequeyal xmukbal le̱ ma̱usilal riqˈuin nak najt rok nequextijoc. Ut xban aˈan kˈaxal cuiˈchic ra li tojbal ma̱c li ta̱cha̱lk saˈ e̱be̱n. ¹⁵ Ra cha̱lel saˈ e̱be̱n la̱ex aj tzˈi̱b ut la̱ex aj fariseo, ex aj caˈpacˈal u. Nequesuti li ruchichˈochˈ joˈ ajcuiˈ li palau re xsicˈbal ani ta̱pa̱ba̱nk re le̱ tijleb. Ut nak ac xeˈxkˈaxtesi rib saˈ e̱ya̱nk, kˈaxal cuiˈchic yibru xnaˈlebeb che̱ru la̱ex ut e̱ma̱c la̱ex nak teˈxic saˈ xbalba. ¹⁶ Ra cha̱lel saˈ e̱be̱n, la̱ex mutzˈ aj cˈamol be. La̱ex nequeye: ―Li ani tixba̱nu xjuramento saˈ xcˈabaˈ lix templo li Dios, incˈaˈ tento tixba̱nu li quixye. Abanan li ani tixba̱nu xjuramento saˈ xcˈabaˈ li oro li cuan saˈ lix templo li Dios, li jun aˈan tento nak tixba̱nu li cˈaˈru xye saˈ xjuramento, chanquex. ¹⁷ Ma̱cˈaˈ e̱naˈleb ut mutzˈex xban nak incˈaˈ nequetau xya̱lal. ¿Bar cuan li kˈaxal nim xcuanquil? ¿Ma li oro, malaj aˈ lix templo li Dios li nasantobresin re li oro? ¹⁸ Ut nequeye ajcuiˈ: ―Li ani naxba̱nu xjuramento saˈ xcˈabaˈ li artal, li jun aˈan incˈaˈ tento tixba̱nu li cˈaˈru quixye. Abanan li ani naxba̱nu xjuramento saˈ xcˈabaˈ li mayej cuan saˈ xbe̱n li artal, tento nak tixba̱nu li cˈaˈru quixye saˈ lix juramento, chanquex. ¹⁹ Ma̱cˈaˈ e̱naˈleb ut mutzˈex xban nak incˈaˈ nequetau xya̱lal. ¿Bar cuan li kˈaxal nim xcuanquil? ¿Ma li mayej malaj aˈ li artal li nasantobresin re li mayej? ²⁰ Joˈcan nak li ani tixba̱nu xjuramento saˈ xcˈabaˈ li artal, naxye xjuramento saˈ xcˈabaˈ aˈan ut saˈ xcˈabaˈ ajcuiˈ chixjunil li cˈaˈru cuan saˈ xbe̱n. ²¹ Ut li ani naxba̱nu lix juramento saˈ xcˈabaˈ lix templo li Dios, naxba̱nu saˈ xcˈabaˈ lix templo li Dios ut saˈ xcˈabaˈ ajcuiˈ li Dios li nacuan chi saˈ. ²² Ut li ani naxba̱nu xjuramento saˈ xcˈabaˈ li choxa, naxba̱nu xjuramento saˈ xcˈabaˈ lix cˈojariba̱l li Dios ut saˈ xcˈabaˈ ajcuiˈ li Dios li cˈojcˈo saˈ xbe̱n. ²³ Ra cha̱lel saˈ e̱be̱n la̱ex aj tzˈi̱b ut ex aj fariseo, ex aj caˈpacˈal u. Nequemayeja lix laje̱tkil li isquiˈij, li eneldo ut li comino. Ut nequetzˈekta̱na li kˈaxal cuan xcuanquil saˈ li chakˈrab. Incˈaˈ nequeba̱nu li ti̱quilal. Incˈaˈ nequex‑uxta̱nan u ut incˈaˈ nequexpa̱ban. Us nak nequemayeja lix laje̱tkil abanan incˈaˈ raj nequecanab xba̱nunquil li kˈaxal cuan xcuanquil. ²⁴ Ex mutzˈ aj cˈamol be, nequeyal e̱kˈe chixba̱nunquil li cˈaˈak re ru li ma̱cˈaˈ xcuanquil, abanan li nim xcuanquil incˈaˈ nequeba̱nu. Chanchan nak nequetzˈil ru le̱ haˈ re nak incˈaˈ te̱nukˈ li cocˈ suk ut aˈ chic li ni̱nki xul camello nequenukˈ. ²⁵ Ra cha̱lel saˈ e̱be̱n la̱ex aj tzˈi̱b ut aj fariseo, ex aj caˈpacˈal u, xban nak aˈ chic li rix le̱ secˈ ut le̱ plato nequechˈaj, aban lix saˈ numtajenak chi tzˈaj xban le̱ ma̱usilal ut li elkˈac nequeba̱nu. ²⁶ Ex mutzˈ aj fariseo, chˈajomak xbe̱n cua lix saˈ le̱ secˈ ut le̱ plato re nak chˈajbilak ajcuiˈ li rix. ²⁷ Ra cha̱lel saˈ e̱be̱n la̱ex aj tzˈi̱b ut la̱ex aj fariseo, ex aj caˈpacˈal u. Chanchanex li nequeˈmukeˈ cuiˈ li camenak. Bonbileb rix ut cˈajoˈ xchakˈal eb ru, aˈut chi saˈ nujenak chi tzˈaj ut chi xbakel camenak. ²⁸ Joˈcan ajcuiˈ la̱ex. Relic chi ya̱l nak cha̱bil nequexcˈutun chiruheb li tenamit. Abanan le̱ chˈo̱l nujenak chi ma̱usilal ut la̱ex aj caˈpacˈal u. ²⁹ Ra cha̱lel saˈ e̱be̱n la̱ex aj tzˈi̱b ut la̱ex aj fariseo, ex aj caˈpacˈal u. Nequeyi̱b li queˈmukeˈ cuiˈ li profetas ut nequerutzˈuˈuji chak ru li queˈmukeˈ cuiˈ li ti̱queb xchˈo̱l. ³⁰ Ut la̱ex nequeye: ―Cui ta la̱o ac cuanco chak saˈ li cutan nak xeˈcuan li kaxeˈ kato̱n, incˈaˈ raj xkaba̱nu joˈ queˈxba̱nu eb aˈan. Incˈaˈ raj xkacamsiheb li profetas, chanquex. ³¹ Abanan riqˈuin li ma̱usilal li nequeba̱nu la̱ex, nacˈutun nak juntakˈe̱tex riqˈuineb le̱ xeˈto̱nil yucuaˈ, li queˈcamsin reheb li profetas. ³² Choyomak biˈ xba̱nunquil li incˈaˈ us li queˈxtiquib xba̱nunquil le̱ xeˈto̱nil yucuaˈ. ³³ Chanchanex cˈantiˈ, chanchanex ralex cˈambolay, ¿chan ta cuiˈ ru nak texcolekˈ chiru lix tojba ma̱c saˈ xbalba? ³⁴ La̱in tintaklaheb e̱riqˈuin li profeta ut li cuanqueb xnaˈleb ut eb laj tzolonel. Abanan la̱ex incˈaˈ te̱rabi. Ut saˈ xya̱nkeb aˈan, cuan te̱camsiheb, cuan te̱qˈueheb chiru cruz, ut cuan cuiˈchic li te̱rahobtesiheb saˈ li cab li nequechˈutub cuiˈ e̱rib chixtzolbal ra̱tin li Dios. Ut cuan cuiˈchic te̱ta̱keheb saˈ li junju̱nk chi tenamit re xchapbaleb. ³⁵ Xban le̱ ma̱usilal aˈan, ta̱tˈanekˈ saˈ e̱be̱n lix camiqueb li cha̱bileb xnaˈleb riqˈuin xcamic laj Abel li ti̱c xchˈo̱l ut toj riqˈuin xcamic li ralal laj Berequías laj Zacarías xcˈabaˈ li quecamsi chiru neba̱l chixcˈatk li rochoch li Dios ut li artal. ³⁶ Relic chi ya̱l tinye e̱re nak chixjunil li camsi̱nc queˈxba̱nu chak junxil, joˈ ajcuiˈ li yo̱quex chixba̱nunquil anakcuan, ta̱tˈanekˈ ajcuiˈ saˈ e̱be̱n la̱ex li cuanquex anakcuan xban nak yo̱quex chixba̱nunquil joˈ queˈxba̱nu eb aˈan.

Quiyotˈeˈ xchˈo̱l li Jesús chirilbaleb aj Jerusalén

³⁷ Ex aj Jerusalén, ex aj Jerusalén, neque‑camsiheb li tzˈakal profeta ut nequecuti chi pec eb li nequeˈtakla̱c e̱riqˈuin xban li Dios. Nabal sut raj xcuaj e̱colbal joˈ nak naxchˈutubeb li ral li caxlan rubel lix xicˈ. Abanan la̱ex incˈaˈ xeraj. ³⁸ Ut anakcuan le̱ tenamit joˈ ajcuiˈ li templo ta̱cana̱k chi naqˈuirnac aj chic ru. ³⁹ Tinye ut e̱re chalen anakcuan incˈaˈ chic te̱ril cuu toj nak te̱ye, “Osobtesinbilak aˈan li xchal saˈ xcˈabaˈ li Ka̱cuaˈ”. Toj aran chic te̱ril cuu, chan li Jesús.

Li Jesús quixye nak tixtau xkˈehil nak ta̱juqˈuekˈ li rochoch li Dios

24  Qui‑el saˈ li templo li Jesús, ut nak yo̱ chi xic, queˈcuulac lix tzolom riqˈuin ut queˈxcˈut chiru li ni̱nki cab xcue̱nt li templo. ² Quichakˈoc li Jesús ut quixye reheb: ―Us ajcuiˈ nak te̱ril chi us chixjunil aˈin xban nak ta̱cuulak xkˈehil nak ma̱ jun chic reheb li pec aˈan ta̱cana̱k saˈ xnaˈaj chi incˈaˈ ta ta̱juqˈuekˈ, chan. ³ Ut chirix aˈan, co̱ chiru li tzu̱l Olivos ut nak li Jesús quicˈojla aran xjunes, lix tzolom queˈcuulac riqˈuin ut queˈxye re: ―Ye ke jokˈe ta̱cˈulma̱nk li yo̱cat chixyebal. ¿Cˈaˈru talajcˈulma̱nk nak ta̱cuulak xkˈehil la̱ cˈulunic? Ut ¿cˈaˈru retalil li rosoˈjiqueb li cutan aˈin?― ⁴ Quichakˈoc li Jesús ut quixye reheb: ―Cheqˈuehak retal re nak ma̱ ani chibalakˈi̱nk e̱re. ⁵ Nabal teˈcha̱lk chi balakˈi̱nc, ut teˈxye nak saˈ incˈabaˈ xeˈchal, abanan moco ya̱l ta. Toleˈxye, “La̱in li Cristo”, chaˈkeb. Ut nabal teˈbalakˈi̱k xbaneb. ⁶ Nak te̱rabi nak yo̱ li ple̱t ut nak te̱rabi resil nak ticla̱c re li ple̱t yalak bar, mexxucuac xban nak tento nak ta̱cˈulma̱nk chi joˈcan. Abanan moco ac aˈan ta rosoˈjiqueb li cutan aˈin. ⁷ Nabal li tenamit teˈpletik chi ribileb rib. Ut eb li acuabej teˈxpleti ribeb. Talajcua̱nk li cueˈej ut ta̱cua̱nk li yajel ut ta̱cua̱nk li hi̱c saˈ nabal chi naˈajej. ⁸ Abanan chixjunil aˈan yal xticlajic li raylal li ta̱cha̱lk. ⁹ Tojoˈnak texkˈaxtesi̱k ut texrahobtesi̱k ut texcamsi̱k. Ut xicˈ tex‑ilekˈ xbaneb chixjunileb li tenamit saˈ incˈabaˈ la̱in. ¹⁰ Ut saˈ eb li cutan aˈan nabaleb teˈxcanab lix pa̱ba̱leb. Ut aˈanakeb chic li teˈqˈuehok reheb laj pa̱banel saˈ raylal. Ut xicˈ chic teˈril ribeb. ¹¹ Ut nabaleb li profeta aj balakˈ teˈcha̱lk ut nabaleb teˈbalakˈi̱k xbaneb. ¹² Ut xban nak ta̱numta̱k li ma̱usilal, nabaleb teˈxcanab xra̱baleb li ras ri̱tzˈin. ¹³ Ut li ani tixcuy xnumsinquil li raylal aˈin toj saˈ rosoˈjic lix yuˈam, aˈan ta̱colekˈ. ¹⁴ Ut li resil lix nimajcual cuanquilal li Dios ta̱yema̱nk yalak bar jun sut rubel choxa re nak chixjunileb li tenamit teˈrabi resil li colba‑ib. Tojoˈnak ta̱cha̱lk li rosoˈjiqueb li cutan. ¹⁵ Chetzolak rix chi us li cˈaˈru quixye li profeta Daniel re nak te̱tau ru li cˈaˈru ta̱cˈulma̱nk. Aˈan quixye nak eb laj balakˈ teˈrocsi saˈ li rochoch li Dios bar ma̱cuaˈ xcˈulub cuiˈ cua̱nc li kˈaxal yibru ut xucuajel rilbal xban lix ma̱usilal, ut riqˈuin aˈan teˈxmux ru lix templo li Dios. ¹⁶ Nak te̱ril aˈan, la̱ex li cuanquex Judea, chex‑e̱lelik saˈ junpa̱t ut texxic toj saˈ li tzu̱l. ¹⁷ Li ani cua̱nk chak saˈ xbe̱n li rochoch nak ta̱cˈulma̱nk aˈan, chi cubec chak ut ti̱c ta̱e̱lelik ut incˈaˈ chic ta̱oc saˈ rochoch chirisinquil li cˈaˈru cuan re. ¹⁸ Ut li ani cua̱nk chak saˈ xcˈaleba̱l incˈaˈ chic chisukˈi̱k saˈ rochoch chixxocbal li rakˈ. ¹⁹ Tokˈobak ruheb li yaj aj ixk ut li yo̱queb chi tuˈresi̱nk saˈ eb li cutan aˈan xban nak kˈaxal cuiˈchic chˈaˈaj li e̱lelic chokˈ reheb. ²⁰ Chextijok ut chetzˈa̱ma chiru li Dios re nak incˈaˈ ta̱cˈulma̱nk li raylal aˈin saˈ habalkˈe chi moco saˈ li hiloba̱l cutan. ²¹ Saˈ eb li cutan aˈan ma̱ caˈchˈin li raylal ta̱cˈulma̱nk. Ma̱ jun cua quicˈulman chi joˈcan chalen chak saˈ xticlajic li ruchichˈochˈ, chi moco ta̱cˈulma̱nk junak chic joˈcan mokon. ²² Cui ta ma̱cˈaˈ saˈ xchˈo̱l li Ka̱cuaˈ xrakbal ruheb li cutan aˈan, ma̱ ani raj ta̱cana̱k chi yoˈyo saˈ ruchichˈochˈ. Joˈcan nak li Ka̱cuaˈ tixse̱ba xrakbal ruheb li cutan aˈan saˈ xcˈabaˈeb li sicˈbileb ru. ²³ Joˈcan nak cui ani ta̱yehok e̱re, “Cueˈ li Cristo,” malaj, “leˈ cuan li Cristo,” me̱pa̱b li cˈaˈru tixye. ²⁴ Nabaleb aj balakˈ teˈcˈulu̱nk ut teˈxye nak aˈaneb li Cristo. Ut cuan teˈxye nak aˈaneb profeta. Nabal li cˈaˈak re ru teˈxcˈutbesi ut sachba chˈo̱lej telajeˈxba̱nu re xyalbal xbalakˈinquileb li tenamit, joˈqueb ajcuiˈ li sicˈbileb ru xban li Dios. ²⁵ Abanan cheqˈuehak retal. Ac xinye e̱re li cˈaˈru talajeˈcˈulma̱nk. ²⁶ Cui ut nequeˈxye e̱re, “Leˈ saˈ li chaki chˈochˈ cuan li Cristo,” mexxic chirilbal. Cui ut nequeˈxye e̱re, “Arin cuan saˈ cab,” me̱pa̱b li cˈaˈru teˈxye. ²⁷ La̱in li Cˈajolbej tincˈulu̱nk saˈ junpa̱t. Chanchan lix repom li ca̱k na‑el chak saˈ releb sakˈe ut naxcˈut rib toj saˈ roqueb sakˈe. ²⁸ Ya̱l li nequeˈxye nak bar cua̱nk junak camenak, aran teˈxtu̱b rib li soˈsol.

Nak tol‑e̱lk cuiˈchic li Cˈajolbej Dios

²⁹ Ut saˈ eb li cutan aˈan nak acak xrakeˈ li raylal aˈan, ta̱kˈojyi̱nokˈ ru li sakˈe ut li po incˈaˈ chic ta̱cutanokˈ ru. Ta̱ecˈa̱nk chak ru li choxa ut li chahim talajeˈtˈanekˈ chak. ³⁰ Tojoˈnak ta̱cˈutu̱nk saˈ choxa li cuetalil la̱in li Cˈajolbej. Ut teˈyotˈekˈ ut teˈya̱bak chixjunileb li cuanqueb saˈ ruchichˈochˈ. Ut teˈril cuu la̱in li Cˈajolbej nak yo̱kin chak chi cha̱lc saˈ li chok riqˈuin lix nimal incuanquil ut inlokˈal. ³¹ Ut nak ta̱ecˈa̱nk chak chi cau li trompeta, tintaklaheb lin ángel. Ut teˈxchˈutub li sicˈbileb ru inban li cua̱nkeb yalak bar jun sut rubel choxa jun sut saˈ ruchichˈochˈ. ³² Cheqˈuehak retal cˈaˈru naxba̱nu li jun to̱n chi higo. Nak nakˈunkˈut chak li xak chi e̱lc, riqˈuin aˈan te̱nau nak yo̱ chak chi nachˈoc li sakˈehil. ³³ Joˈ nak li higo naxcˈutbesi retalil li sakˈehil, joˈcan ajcuiˈ chixjunil li cˈaˈak re ru aˈan talajeˈcˈulma̱nk, naxcˈutbesi retalil nak yo̱ chi cuulac xkˈehil nak toline̱lk cuiˈchic la̱in li Cˈajolbej. ³⁴ Relic chi ya̱l tinye e̱re nak toj talajeˈcˈulma̱nk chixjunil li cˈaˈak re ru aˈin chi toj ma̱jiˈ nequeˈosoˈ li tenamit aˈin. ³⁵ Li choxa ut li ruchichˈochˈ talajeˈosokˈ. Abanan li cua̱tin incˈaˈ ta̱cana̱k yal chi joˈcan chi incˈaˈ ta ta̱cˈulma̱nk chixjunil li cˈaˈak re ru xinye. ³⁶ Abanan ma̱ ani nanaˈoc re jokˈe lix kˈehil ut lix ho̱nal incˈulunic. Eb li ángel saˈ choxa incˈaˈ nequeˈxnau chi moco la̱in li Cˈajolbej ninnaˈoc re. Caˈaj cuiˈ li Dios Acuabej nanaˈoc re jokˈe ta̱cˈulma̱nk aˈin. ³⁷ Joˈ quicˈulman saˈ xcutan laj Noé, joˈcan ajcuiˈ ta̱cˈulma̱nk nak toline̱lk cuiˈchic la̱in li Cˈajolbej. ³⁸ Saˈ eb li cutan aˈan nak toj ma̱jiˈ quicuan li butˈi haˈ, eb li tenamit yo̱queb chak chi cuaˈac ut yo̱queb chi ucˈac, ut yo̱queb chi sumla̱c ut chi sumuba̱nc toj saˈ li cutan nak qui‑oc laj Noé saˈ li jucub cab. ³⁹ Ut incˈaˈ queˈxtau xya̱lal toj quichal li butˈi haˈ ut quilajeˈcˈameˈ chixjunileb xban li butˈ. Chanchan ajcuiˈ aˈan nak toline̱lk cuiˈchic la̱in li Cˈajolbej. ⁴⁰ Saˈ li cutan aˈan cuib li cui̱nk cua̱nkeb saˈ cˈaleba̱l, jun aj pa̱banel ut jun li ma̱cuaˈ aj pa̱banel. Ut laj pa̱banel, aˈan li ta̱cˈamekˈ xban li Dios ut li jun chic li ma̱cuaˈ aj pa̱banel, aˈan ta̱canaba̱k. ⁴¹ Ut cuib li ixk yo̱keb chi queˈec saˈ jun chi queˈleb, jun aj pa̱banel ut jun li ma̱cuaˈ aj pa̱banel. Ut laj pa̱banel, aˈan li ta̱cˈamekˈ xban li Dios ut li jun chic li ma̱cuaˈ aj pa̱banel, aˈan ta̱canaba̱k. ⁴² Joˈcan nak yoˈon cua̱nkex xban nak incˈaˈ nequenau jokˈe ho̱nal toline̱lk la̱in li Ka̱cuaˈ. ⁴³ Chenauhak aˈin: nak cui ta naxnau li yucuaˈbej saˈ li cab jokˈe ho̱nal re li kˈojyi̱n tol‑e̱lk laj e̱lkˈ, ta̱yoˈlek raj ut incˈaˈ raj tixcanab chi elkˈac xsaˈ li rochoch. ⁴⁴ Joˈcan ajcuiˈ la̱ex yoˈon cua̱nkex chi oybeni̱nc xban nak incˈaˈ nequenau jokˈe ho̱nal tincuulak la̱in li Cˈajolbej. Tincuulak chi ma̱cˈaˈ saˈ e̱chˈo̱l.

Li cha̱bil aj cˈanjel ut li incˈaˈ cha̱bil aj cˈanjel

⁴⁵ ¿Ani ut laj cˈanjel cha̱bil ut cuan xnaˈleb? Aˈan li quiqˈueheˈ xcuanquil xban lix patrón saˈ xbe̱neb li rech mo̱sil ut aˈan ta̱qˈuehok re xtzacae̱mkeb saˈ x‑o̱ril. ⁴⁶ Us xak re laj cˈanjel aˈan li yo̱k chixba̱nunquil chi joˈcan nak tol‑e̱lk lix patrón. ⁴⁷ Relic chi ya̱l tinye e̱re nak lix patrón tixkˈaxtesi saˈ rukˈ, chixjunil lix juncablal. ⁴⁸ Aban cui laj cˈanjel aˈan incˈaˈ us lix naˈleb, tixye saˈ xchˈo̱l, “Lin patrón ta̱ba̱yk chak chi cˈulu̱nc.” ⁴⁹ Ut ta̱oc chixsacˈbaleb li rech aj cˈanjelil, ut ta̱oc chi cuaˈac ut chi ucˈac rochbeneb li calajenak. ⁵⁰ Ut ma̱cˈaˈak saˈ xchˈo̱l nak tol‑e̱lk lix patrón. ⁵¹ Ut ta̱cˈajtesi̱k ru ut ta̱qˈuehekˈ saˈ xya̱nkeb laj caˈpacˈal u. Ut aran ta̱cua̱nk li ya̱bac ut li cˈuxuxi̱nc ruch e.