Read the Gospels in 40 Days
Nemi pal timuyulpatat
13 Né nemituyat sejse ká taketzket ipanpa sejse pal Galilaya wan ken tik uni tujtunal Pilatus kimalij ne inhesyu iwan ne intejtetakulis ipal ne Teut. 2 Wan yaja nankilij:
—Anmejemet tay inat? Ka uni takamet ipal Galilaya kichijket mas inteyek que muchi ne Galilayajchanejket, ika inwan muchijki uni? 3 Nimetzinhilwia ka inte. Asu inte anmuyulpatat, anwilewisket ijkiuni muchi. 4 Wan ne kashtul-yey, ká inhijpak wetzki ne tepekal tik Shilo wan mikiket: tay anhinat, ka yejemet tawikiliat katka mas que muchi ne Yerushalemchanejket? 5 Nimetzinhilwia ka inte. Asu inte anmuyulpatat, muchi anwilewisket ken yejemet.
6 Inak ini casoj:
—Kipiatuya sé se kuyu tzaput tukatuk tik ne imil wan ajsik kitemua ne itakil wan te kiajsik. 7 Wan yaja kilwij ne itakaw ne tekiti tik ne mil:
"Nikan niajsituk itech ini kuyu shaput yey shiwit niktemua itakil wan te kanaj. Shiktzinkutuna tel, te tatka ipatiw."
8 Ne itakaw kilwia:
"Tajtzin, ma naka nusan ini shiwit; shikajkawa ma nitawawana inawak, wan ma niktamutili kwitat, 9 wan asu tamaka, yek; wan asu inte, san tiktzinewas."
Kwalanit ika tapajtia tik ne sewilis
10 Nemituya tamachtia tik se kalsennemit ne sewilis, 11 wan né nemik se siwat ká kukuya ne iijiu kashtul-yey shiwit, ishpilka wan te welituya muketza. 12 Kwak Yeshu kitak ne siwat, kalnutzki wan kilwij:
—Siwat, timusutuntuka; tamik ne mukukulisyu.
13 Wan kitalij ijpak ijimey, wan yaja mumelawki nemanhachin wan inak ka wey ne Teut. 14 Kwalanik ne sennemituktiani ika ijtik ne sewilis tapajtij Yeshu, wan kilwij ne miaktal:
—Chikwasen tunal nemit pal titekitit; shiwi titapajtia tel tik uni tujtunal, wan tesu tik ne tunal ipal sewilis!
15 Ne Tajtzin nankilij, kilwij:
—Tensasalmet! Anka muchi anmejemet, tik ne sewilis, inte kishtiat ne anmuwakash ush anmuburroj ma ati? 16 Uni isiwapil ipal Abraham kipiaya kashtul-yey shiwit ilpituk ipanpa ne Tenewani. Tay ankinekit, ma inte muishtilikan uni ijilpika tik ne tunal ipal ne sewilis?
17 Uni inak wan ishpinawket muchi ká ne kitejtenewat. Wan pakiket muchi ne takamet wan siwatket ipanpa muchi tay yaja kichiwa katka.
18 Yajika inak:
—Ken ne itatekimakalis ne Teut? Ken niaw nina? 19 Yaja ken se iish culantroj ne kikwij se takat wan kitamutilij ne imil wan weyki wan kiski se kwawit, wan ajsit ne tujtutut mutaliat tik imajmajtzal.
20 Wan ukseujti inak:
—Ken ne itatekimakalis ne Teut? 21 Yaja ken ne shukutishti, ne kikwij se siwat wan kishtukilij yey almun tishti hasta muchi shukukiski.
Ne ume ujti
22 Wan pashaluj yajki nujme tamachtia tik ne ujti hasta Yerushalem. 23 Ajaka kilwij:
—Tajtzin, chiujchiupi ne mupalewiat?
Yaja kinhilwij:
24 —Shimutatejtemuilikan pal ankalakit tik ne uchulnaj tenkal, ika nimetzinhilwia ka miak tatejtemusket kalakit wan te welisket. 25 Kwak tami ne itekuyu ne kal muketza kitentzakwa ne tenkal wan anmejemet tatenpan pewat kitujtunwiat ne tenkal inat "Tajtzin, shitechtapuili!", wan yaja metzinhilwis "Inte nimetzinhishmati!", 26 ikuka anyawit pewat inat: "Munawak tisentakwajket wan tiatiket wan titamachtij tik ne tutechan!", 27 wan yaja yawi metzinhilwia: "Inte nimetzinhishmati, inte nikmati kanka anwalajtiwit; shinechajkawakan, tekitinimet ipal ne inteyek." 28 Ikuni anyawit chukat, yawit tzalanit anmutajtan kwak ankitat Abraham wan Itzak wan Yakob wan muchi ne taketzanimet tik ne itatekimakalis ne Teut, wan kwak anmejemet metzintamutatiwit tatenpan. 29 Wan walasket tik taneskan wan kanka kalaki ne tunal wan ka ajkuikpa wan tatzinu, wan muchi yawit ajsit musentaliat tik ne itatekimakalis ne Teut, 30 wan né nemit tijtipan ne yawit ajachtu, wan nemit ajachtu ne yawit tijtipan.
Yeshu ina ka yawi miki tik Yerushalem
31 Kwakuni ajsiket sejse Parishayuj kilwiat:
—Shu shikisa ka nikan ika Herodes kineki metzmiktia!
32 Wan kinhilwij:
—Shumet shikilwikan uni ka naja nikan nikishtia nawalmet wan nitapajtia ashan wan musta wan nitami wipta. 33 Sema nimuneki ninejnemi ashan wan musta wan ukse tunal, ika semaya tik Yerushalem weli miki se taketzani.
Yerushalem, Yerushalem!
34 [Wan inak:]
—Yerushalem, Yerushalem, kinmiktia ne taketzanimet wan kintejtemima ne mutitanijtiwit itech yaja. Ken niknekiskia nikinsenputzua ne mupilawan ken kisenputzua se tijlan ipujpuyuj itan iejtapal, wan te tiknekik! 35 Nikan mukawa ne anmukal! Ika nimetzinhilwia: inte annechitasket hasta kwak anyawit inat: "Teutasujtatuk ne witz tik itukay Tutajwan."
Yeshu kipajtia se pushawtuk
14 Wan se tunal ipal sewilis kwak yajki takwa ichan se wey pal ne Parishayujmet, nemituyat kipachiwiat. 2 Wan né nemik se takat pushawtuk 3 wan ne Yeshu kinhilwij ne tajtulmatit wan Parishayujmet, ina:
—Welit titapajtiat tik ne sewilis ush inte?
4 Yejemet tentatziwket, wan kikwij ne takat wan kipajtij, wan kiajkaw yawi. 5 Wan kinhilwij:
—Ká anmejemet kipia se ikunew ush se wakash wetztuk tik ustut wan inte yawi kalishtia talul tik se tunal ipal sewilis?
6 Wan te weliket inat tatka pal nankilia.
Ken nemi pal tikchiwat tik se yualu
7 Pejki kinhilwia ne ajsitiwit tik ne yualu se casoj. Yaja kitak ken yejemet pejket kishpejpenat ne ajachtu mutalijka, wan kinhilwia:
8 —Kwak ajaka metzilwia ma shiajsi tik se yualu kan munamiktia se, maka shimutali tik ne achtu mutalijka, ika inte tikmati asu kilwijket ma wiki se mas wey que taja, 9 wan yawi witz ne walmetznutztuk wan kalnutztuk metzilwia: "Shikmaka ini ma mutali", wan kwakuni tiaw tikpia ne tipan mutalijka wan tiaw tishpinawa. 10 Mas yek kwak walmetznutzat wan tiajsi, shimutali kan nemit ne tijtipan pal kiane kwak witz ne walmetznutztuk, yawi metzilwia: "Nuiknew, shitejku wan shimutali ka né!". Kwakuni yawit metzitat yek muchi ne sentakwat. 11 Ika ká ne isel muajkukia, yawi mutemultia, wan ká ne isel mutemultia, yawi muajkukia.
12 Nusan kilwij ne kalnutztuk:
—Kwak tikchiwa se wey yualu, maka shalinnutza ne mukunpawan nian ne mukniwan nian ne mumiakwan nian ne muchantakawan ne kipiat wey tumin, ká nusan welit walmetznutzat ka inchan pal metztashtawiat; 13 mas yek kwak tikchiwa se yualu shalinnutza ne munekit, ne pijpilishnaj, ne metzkelumet, ne pupuyumet... 14 wan yawi yek mupal ika inte welit metztashtawiat, ika asu ijkiuni yawit metztashtawiat kwak muketzat ne yejyek.
Ne wey yualu
15 Se pal ne muejmuetztuk kikakik ini wan kilwij:
—Suertej kipia ne takwas tik ne itatekimakalis ne Teut!
16 Yaja kilwij:
—Se takat kichijki se wey yualu wan kalnutzki miak, 17 wan kwak ajsik ne horaj, kituktij ne itekitini ma kinhilwi muchi ne kalinnutztuk:
"Shiwikan!"
18 Wan sejse wan sejseuk muchi pejket inat ka kichiwat sentir pero inte welit ajsit. Ne se kilwij:
"Nikujtuk se tal wan nimuneki niaw nikita, inte niweli niwitz."
19 Wan seuk inak:
"Nikujtuk makwil parejaj turuj wan niaw nikinhejekua, inte niweli."
20 Wan ukseuk inak:
"Nitami nimunamiktia, yajika inte niweli."
21 Wan ne tekitini mukwepki ichan wan kilwij ne itajtzin. Kwakuni ne kaltekuyu kwalanik sujsul wan kilwij ne itekitini:
"Shikisa talul wan shu tatajku ne techan, wan ne munekit wan ne pijpilishnaj wan ne pupuyumet wan ne metzkelumet, shalinkalakti muchi ka nikan!"
22 Wan ne tekitini inak:
"Tajtzin, muchijtuk tay tiktuktij, wan teuk nemi tentuk."
23 Wan ne tajtzin kilwij ne tekitini:
"Shikisa wan shinejnemi ijpak ne ujujti wan ijtik ne kujkulal, wan shikchiwa ma kalakikan muchi pal ma mutema ne nukal, 24 ika nimetzinhilwia ka nian se pal ne takamet wan siwatket ne nalinnutztuk yawit kiejekuat ne nutakwal!"
Pal timuchiwa numumachtiani...
25 Sennejnemit katka sujsul miak iwan, wan muishkwepki wan kinhilwij:
26 —Asu aka nutech witz wan te kishijia ne iteku wan ne inan wan ne isiwaw wan ne ipilawan wan ne iikawan wan ne ieltiwan wan hasta ne ialmaj, inte weli muchiwa numumachtiani. 27 Ká inte kiwika ne icruz isel wan witz nuipan inte weli muchiwa numumachtiani. 28 Ika katiawel pal anmejemet asu kineki kiketza se tepekal inte mutalia achtu tasenpua keski tumin muneki pal kita asu kipia pal kitamia, 29 pal kiane, kwak tamik kitalia ne tetzilnaj wan te weli kitamia, ma inte kipakilikan muchi ne tajtachiat 30 inat:
"Yajini pejki kiketza wan te welik yekawi!"
31 Wan katiawel ne tatuktiani, asu kisa musuma iwan seuk tatuktiani, inte mutalia achtu tanawatia asu yaja iwan diez mil takat weli kinamiki ne seuk ká kisa kisuma iwan veinte mil, 32 wan asu inte, kwak yajane nemiuk wejka kintuktia itech noymet kitajtanit nejmachnemilis? 33 Kienej tel, muchi itzalan anmejemet ká inte kiajkawat muchi tay inpal, inte welit muchiwat numumachtiani.
34 Yajika, yek nemi ne istat, wan asu ne istat intea ajwiak ken tiawit tikajshitiat? 35 Intea yek nian pal tal nian pal kwitat, semaya pal ma kitamutakan tik ne tajsul. Ká kipia takakilis pal weli takaki, ma takaki!
Ne Bibliaj Tik Nawat · © 2008, 2012 Jan Morrow