Beginning

^2 (B)Lwaki amawanga gabuuza nti,
    “Katonda waabwe ali ludda wa?”
^3 (C)Katonda waffe ali mu ggulu;
    akola buli ky’ayagala.
^4 (D)Bakatonda baabwe bakole mu ffeeza ne zaabu,
    ebikolebwa n’emikono gy’abantu.
^5 (E)Birina emimwa, naye tebyogera;
    birina amaaso, naye tebiraba.
⁶ Birina amatu, naye tebiwulira;
    birina ennyindo, naye tebiwunyiriza.
⁷ Birina engalo, naye tebikwata;
    birina ebigere, naye tebitambula;
    ne mu bulago bwabyo temuvaamu ddoboozi n’akamu,
⁸ abakozi ababikola,
    n’abo bonna ababyesiga balibifaanana.

⁹ Mmwe ennyumba ya Isirayiri mwesigenga Mukama,
    ye mubeezi wammwe era ye ngabo yammwe.
^10 (F)Mmwe ennyumba ya Alooni mwesigenga Mukama,
    ye mubeezi wammwe era ye ngabo yammwe.
¹¹ Mmwe abamutya, mwesigenga Mukama,
    ye mubeezi wammwe, era ye ngabo yammwe.

¹² Mukama anaatujjukiranga, era anaatuwanga omukisa.
    Ab’ennyumba ya Isirayiri anaabawanga omukisa;
    ab’omu nnyumba ya Alooni anaabawanga omukisa;
^13 (G)n’abo abamutya, ab’ekitiibwa n’abatali ba kitiibwa,
    Mukama anaabawanga omukisa.

^14 (H)Mukama abaaze mweyongere nnyo obungi,
    mmwe n’abaana bammwe.
^15 (I)Mukama, eyakola eggulu n’ensi,
    abawe omukisa.

^16 (J)Eggulu ery’oku ntikko lya Mukama,
    naye ensi yagiwa abantu bonna.
^17 (K)Abafu tebatendereza Mukama,
    wadde abo abaserengeta emagombe.
^18 (L)Naye ffe tunaatenderezanga Mukama,
    okuva leero n’okutuusa emirembe gyonna.

Mutendereze Mukama!
116 ^(M)Mukama mmwagala,
    kubanga awulidde eddoboozi lyange n’okwegayirira kwange.
^2 (N)Kubanga ateze okutu kwe gye ndi,
    kyennaavanga mmukoowoola ebbanga lyonna lye ndimala nga nkyali mulamu.

^3 (O)Emiguwa gy’okufa gyansiba,
    n’okulumwa okw’emagombe kwankwata;
    ne nzijula ennaku nnyingi n’okutya.
^4 (P)Ne ndyoka nkoowoola erinnya lya Mukama nti,
    “Ayi Mukama, ndokola.”

^5 (Q)Mukama wa kisa, era mutuukirivu;
    Katonda waffe ajjudde okusaasira.
^6 (R)Mukama alabirira abantu abaabulijjo;
    bwe nnali mu buzibu obunene, n’andokola.

^7 (S)Wummula ggwe emmeeme yange,
    kubanga Mukama abadde mulungi gy’oli.
^8 (T)Kubanga ggwe, Ayi Mukama, owonyezza omwoyo gwange okufa,
    n’amaaso gange ogawonyezza okukaaba;
    n’ebigere byange n’obiwonya okwesittala,
^9 (U)ndyoke ntambulirenga mu maaso ga Mukama
    mu nsi ey’abalamu.

^10 (V)Nakkiriza kyennava njogera nti,
    “Numizibbwa nnyo.”
^11 (W)Ne njogera nga nterebuse nti,
    “Abantu bonna baliraba.”

¹² Mukama ndimusasula ntya
    olw’ebirungi bye ebingi bwe bityo by’ankoledde?
^13 (X)Nditoola ekikompe eky’obulokozi,
    ne nkoowoola erinnya lya Mukama.
^14 (Y)Ndituukiriza obweyamo bwange eri Mukama,
    mu maaso g’abantu be bonna.

^15 (Z)Okufa kw’abatukuvu ba Mukama kwa muwendo nnyo eri Mukama.
^16 (AA)Ayi Mukama,
    onsumuluddeko ebyansiba n’onfuula wa ddembe,
    nange nnaakuweerezanga ennaku zonna.

^17 (AB)Ndiwaayo ekiweebwayo eky’okwebaza,
    ne nkoowoola erinnya lya Mukama.
¹⁸ Ndituukiriza obweyamo bwange eri Mukama,
    mu maaso g’abantu be bonna,
^19 (AC)mu mpya z’ennyumba ya Mukama;
    wakati wo, ggwe Yerusaalemi.

Mutendereze Mukama.
117 ^(AD)Mutendereze Mukama, mmwe ensi zonna;
    mumugulumize, mmwe amawanga gonna.
^2 (AE)Kubanga okwagala kwe okutaggwaawo kungi gye tuli;
    n’obwesigwa bwa Mukama bwa lubeerera.

Mutendereze Mukama.
118 ^(AF)Mwebaze Mukama, kubanga mulungi;
    okwagala kwe kubeerera emirembe gyonna.

^2 (AG)Kale Isirayiri ayogere nti,
    “Okwagala kwa Mukama kubeerera emirembe gyonna.”
³ N’ab’ennyumba ya Alooni boogere nti,
    “Okwagala kwe kubeerera emirembe gyonna.”
⁴ Abo abatya Mukama boogere nti,
    “Okwagala kwe kubeerera emirembe gyonna.”

^5 (AH)Bwe nnali mu nnaku empitirivu, nakoowoola Mukama,
    n’annyanukula, n’agimponya.
^6 (AI)Mukama ali ku ludda lwange, siriiko kye ntya.
    Abantu bayinza kunkolako ki?
^7 (AJ)Mukama ali nange, ye anyamba.
    Abalabe bange nnaabatunuuliranga n’amaaso ag’obuwanguzi.

^8 (AK)Kirungi okwesiga Mukama
    okusinga okwesiga omuntu.
^9 (AL)Kirungi okuddukira eri Mukama
    okusinga okwesiga abalangira.
^10 (AM)Ensi zonna zanzinda ne zinneebungulula,
    naye mu linnya lya Mukama naziwangula.
^11 (AN)Banneebungulula enjuuyi zonna;
    naye mu linnya lya Mukama nabawangula.
^12 (AO)Bankuŋŋaanirako ne banneebungulula ng’enjuki;
    naye ne basirikka ng’amaggwa agakutte omuliro;
    mu linnya lya Mukama nabawangula.
^13 (AP)Bannumba n’amaanyi mangi, ne mbulako katono okugwa;
    naye Mukama n’annyamba.
^14 (AQ)Mukama ge maanyi gange, era lwe luyimba lwange,
    afuuse obulokozi bwange.

^15 (AR)Muwulire ennyimba ez’essanyu ez’obuwanguzi,
    nga ziyimbirwa mu weema z’abatuukirivu nti,
    “Omukono gwa Mukama ogwa ddyo gutukoledde ebikulu!
¹⁶ Omukono gwa Mukama ogwa ddyo gugulumizibbwa;
    omukono gwa Mukama ogwa ddyo gutukoledde ebikulu!”
^17 (AS)Sijja kufa, wabula nzija kuba mulamu,
    ndyoke ntegeeze ebyo byonna Mukama by’akoze.
^18 (AT)Mukama ambonerezza nnyo,
    naye tandese kufa.
^19 (AU)Munzigulirewo emiryango egy’obutuukirivu,
    nnyingire, neebaze Mukama.
^20 (AV)Guno gwe mulyango omunene ogwa Mukama,
    abatuukirivu mmwe banaayingiriranga.
^21 (AW)Nkwebaza kubanga onnyanukudde
    n’ofuuka obulokozi bwange.

^22 (AX)Ejjinja abazimbi lye baagaana lye
    lifuuse ejjinja ekkulu ery’oku nsonda.
²³ Kino Mukama ye yakikola;
    era ffe tukiraba nga kya kitalo mu maaso gaffe.
²⁴ Luno lwe lunaku Mukama lw’akoze;
    tusanyuke tulujagulizeeko.

²⁵ Ayi Mukama tukwegayiridde, tulokole,
    Ayi Mukama tukwegayiridde otuwe obuwanguzi.

^26 (AY)Alina omukisa oyo ajja mu linnya lya Mukama.
    Tubasabidde omukisa nga tuli mu nnyumba ya Mukama.
^27 (AZ)Mukama ye Katonda,
    y’atwakiza omusana.
Mukumbire wamu nga mukutte amatabi mu ngalo zammwe n’ekiweebwayo kyammwe
    kituukire ddala ku mayembe g’ekyoto.

^28 (BA)Ggwe Katonda wange, nnaakwebazanga;
    ggwe Katonda wange, nange nnaakugulumizanga.

²⁹ Mwebaze Mukama kubanga mulungi,
    n’okwagala kwe kubeerera emirembe gyonna.