◀ All Reading Plans / Book of Common Prayer / Ps. 119:1–24; Ps. 12 13 14; Jer. 37:3–21; 1 Cor. 14:13–25; Matt. 10:24–33 (Awadhi Bible: Easy-to-Read Version)

Prev Day

October 15, 2025

Next Day

Use the calendar to view readings from this devotional.

October 2025
Su	Mo	Tu	We	Th	Fr	Sa
			1	2	3	4
5	6	7	8	9	10	11
12	13	14	15	16	17	18
19	20	21	22	23	24	25
26	27	28	29	30	31

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 119:1-24

आलेफ

¹जउन लोग इमानदारी स जीवन जिअत हीं, उ सबइ कामयाब रहत हीं।
    अइसे लोग यहोवा क सिच्छा पइ चलत हीं।
²लोग जउन यहोवा क करार पइ चलत हीं, उ पचे कामयाब रहत हीं।
    आपन समूचइ मन स उ पचे यहोवा क मानइ बरे खोजत हीं।
³उ पचे लोग बुरा काम नाहीं करतेन।
    उ पचे यहोवा क आग्या क मानत हीं।
⁴हे यहोवा, तू आपन उपदेस इ बरे दिहा ह,
    हम पचे ओका धियान स पालन कइ सकी।
⁵हे यहोवा, मइँ सदा तोहरे कानून क
    नियमित रूप स पालन करेउँ,
⁶तब जब मइँ तोहर सबइ आग्यन क पढ़ब
    मइँ कबहुँ भी नाहीं लजाब।
⁷मइँ तोहार स्तुति पूरी मन स करब
    जेतॅना जियादा मइँ तोहरे फइसलन क बारे मँ सिखेउँ ह।
⁸हे यहोवा, मइँ तोहरे कानूनन क पालन करब।
    तउ कृपा कइके मोका पूरी तरह स जिन बिसरा।

बैथ

⁹एक जवान मनई तोहरे निर्देसन पइ चलइ कइ
    कइसे आपन जीवन पवित्तर रख पावइ?
¹⁰मइँ, आपन पूर्ण मन स यहोवा क सेवा क जतन करत हउँ।
    कृपा कइके तोहरे आग्यन क मानइ मँ मोका जिन गल्ती करइ द्या।
¹¹मइँ धियान पूर्वक तोहार वचन याद किहेउँ ह।
    काहेकि मइँ तोहरे खिलाफ फुन स पाप न करइ चाहत हउँ।
¹²हे यहोवा, मइँ तोहार स्तुति किहेउँ ह।
    कृपा कइके मोका तोहार कानून क सिखावा।
¹³मइँ तोहार सबहिं फइसलन क बरे मँ बताउब।
¹⁴तोहरे करार क निर्देसन क पालन करब
    मोका दूसर कउनो धन स जियादा भावत अहइ।
¹⁵मइँ तोहरे उपदेसन पइ विचार किहेउँ ह,
    अउर मइँ तोहरे सिद्धान्तन पइ चलत हउँ।
¹⁶मइँ तोहरे नियमन मँ आनन्द लेत हउँ।
    मइँ तोहरे बचनन क नाहीं भूलब।

गिमेल

¹⁷आपन सेवक, मोर बरे अच्छा करा
    ताकि मइँ जी सकेउँ अउर तोहरे वचन पइ चलि सकेउँ।
¹⁸हे यहोवा, मोर आँखी खोला तउ होइ सकत ह कि मइँ एका लखि सकत हउँ।
    अउर तोहरी अद्भुत बातन पढ़ सकेउँ जेका तू किहा ह।
¹⁹मइँ इ धरती पइ एक अनजाना परदेसी हउँ।
    हे यहोवा, आपन सिच्छन क
    मोसे जिन छिपावा।
²⁰मोर हमेसा तोहरे जरिए पइ बना भवा फइसलन क
    अध्ययन क अभिलासा रखत हउँ।
²¹हे यहोवा, तू अहंकारी जन क फटकारत ह।
    ओन अहंकारी लोगन पइ बुरी बातन घटित होइहीं।
    उ सबइ तोहरे आदेसन स मुरि गवा अहइँ।
²²लज्जा अउर अपमान क मोसे हटाइ द्या।
    मइँ तोहरी करार क पालन किहेउँ ह।
²³हिआँ तलक कि नेता लोगन भी मोरे बरे बुरी बातन किहेन ह।
    मुला मइँ तउ तोहार सेवक अहउँ।
    मइँ तोहरे विधियन क समुझत हउँ।
²⁴तोहार करार मोर सर्वोत्तम मीत अहइ।
    इ मोका नीक सलाह दिया करत ह।

भजन संहिता 12-14

सौमिनिथ क संगत पइ संगीत निर्दसक बरे दाऊद क एक ठु पद।

¹हे यहोवा, मोका बचावा,
    काहेकि सबहिं वफ़ादार अउ दयालु जन चला गवा अहइँ।
    लोग वफ़ादारी क अरथ भूलि गवा बाटइ।
²लोग आपन साथी संगियन स झूठ बोलत हीं।
    हर कउनो आपन पड़ोसियन क झूठ बोलिके चापलूसी करत रहत हीं।
³यहोवा ओन ओंठन क सी देइ जउन झूठ बोलत हीं।
    यहोवा, ओन जिभियन क काट जउन आपन ही बारे मँ डींग हाँकत हीं।
⁴अइसे जन सोचत हीं, “हमार झूठ हमका बड़का मनई बनइहीं।
    कउनो भी मनई हमरी जीभ क कारण हमका जीत नाहीं पाई।”

⁵मुला यहोवा कहत ह:
    “बुरे मनइयन दीन दुर्बलन स चिजियन चुराइ लिहन ह।
उ पचे असहाय दीन जनन स ओनकर चिजियन लइ लिहन ह।
    मुला अब मइँ ओन हारे थके लोगन
    क रच्छा ठाड़ होइके करब।”

⁶यहोवा क वचन फुरइ अहइँ अउर ऍतना सुद्ध जइसे आगी मँ टेघराइ भइ सफेद चाँदी।
उ सबइ वचन उ चाँदी क तरह सुद्ध अहइँ,
जेका टेघराइ टेघराइ के सात दाई सुद्ध बनावा गवा अहइँ।

⁷हे यहोवा, बेसहारा जन क सुधि ल्या।
    ओनकइ रच्छा अब अउर सदा सर्वदा करा।
⁸सबइ दुर्जन अकड़त हीं अउ बना ठना घूमत हीं।
    मुला उ पचे अइसेन होत हीं जइसे कउनो नकली आभूसण धारन करत ह।
    जउन लखइ मँ कीमती लागत हीं, मुला असलियत मँ बहोतइ सस्ता होत हीं।

संगीत निर्देसक बरे दाऊद क एक ठु पद।

¹हे यहोवा, तू कब तलक मोका बिसरा रहब्या?
कब तलक तू मोका अंगीकार नाहीं करब्या?
²तू मोका बिसरि गया इ कब तलक मइँ सोचउँ?
आपन हिरदइ मँ कब तलक इ दुःख भोगउँ?
कब तलक मोर दुस्मन मोका जीतत रइहीं?

³हे यहोवा, मोर परमेस्सर, मोर सुनि ल्या!
अउर तू मोरे सवाल क जवाब द्या, मोका जवाब द्या नाहीं तउ मइँ मरि जाबउँ।
⁴साइद मोर सत्रु अइसेन ही कहइ लागेन, “मइँ ओका पीट दिहउँ।”
मोर दुस्मन खुस होइहीं कि मोर अंत होइ गवा बाटइ।

⁵हे यहोवा, मइँ तोहरी करुणा पइ मदद पावइ बरे भरोसा राखेउँ।
तू मोका बचाइ लिहा अउर मोका सुखी किहा।
⁶मइँ यहोवा बरे खुसी क गीत गावत हउँ,
काहेकि उ मोरे बरे बहोत सी अच्छी बातन किहस ह।

संगीत निर्देसक बरे दाऊद क पद।

¹मूरख आपन मने मँ कहत बाटइँ, “परमेस्सर नाहीं अहइ।”
मूरख लोग तउ अइसे कारज करत हीं जउन भ्रस्ट अउ घिन स भरा होत हीं।
ओनमाँ स कउनो भी भला काम नाहीं करत ह।

²यहोवा अकासे स मनइयन क लखत ह,
    कि कउनो बुद्धिमान मनई ओका मिलि जाइ।
    बुद्धिमान मनई परमेस्सर कइँती मदद पावइ बरे मुड़ि जात ह।
³मुला परमेस्सर स मुड़िके सबहिं दूर होइ ग अहइँ।
    आपुस मँ मिलिके सबहिं लोग पापी होइ ग अहइँ।
कउनो भी मनई नीक काम
    नाहीं करत अहइ।

⁴मोरे मनइयन क दुष्ट लोग नस्ट कइ दिहन।
उ सबइ दुर्जन परमेस्सर क नाहीं जनतेन।
    दुस्टन क लगे खाइ बरे भरपूर भोजन बाटइ।
    इ सबइ लोग यहोवा क उपासना तलक भी नाहीं करतेन।
^5-6इ सबइ दुस्ट मनई निर्धन क राय सुनइ नाहीं चाहतेन।
    अइसा काहे अहइ? काहेकि दीन लोग तउ परमेस्सर पइ निर्भर अहइँ।
मुला दुट्ठ लोगन पइ भय छाइ गवा अहइ।
    काहेकि परमेस्सर खरे लोगन क संग अहइ।

⁷सिय्योन पइ कउन जउन इस्राएल क बचावत ह? उ तउ यहोवा अहइ,
    जउन इस्राएल क रच्छा करत ह!
यहोवा क मनइयन क दूर लइ गवा जवा अउर ओनका दबाव डाइके बन्दी बनावा गवा।
    मुला यहोवा आपन मनइयन क वापिस छुड़ाइ लिआइ।
    तब याकूब बहोतइ खुस होइ।

यिर्मयाह 37:3-21

³राजा सिदकिय्याह यहूकल नाउँ क एक मनई अउर याजक सपन्याह क यिर्मयाह नबी क लगे एक ठु सँदेसा लइके पठएस। यहूकल सेलेम्याह क पूत रहा। याजक सपन्याह मासेयाह क पूत रहा। जउन सँदेसा उ पचे यिर्मयाह क बरे लिआए रहेन उ इ अहइ: “यिर्मयाह, हमार परमेस्सर यहोवा स हम लोगन बरे पराथना करा।”

⁴(उ समइ तलक, यिर्मयाह जेल मँ नाहीं डावा गवा रहा, एह बरे जहाँ कहूँ उ जाइ चाहत रहा, जाइ सकत रहा। ⁵उ समइ ही फिरौन क फउज मिस्र स यहूदा क प्रस्थान कइ चुकी रही। बाबुल फउज पराजित करइ बरे, यरूसलेम सहर क चारिहुँ कइँती घेरा डाइ रखे रहा। तब उ पचे मिस्र स ओनकी कइँती कूच कइ चुकी भई फउज क बारे मँ उ सुन चुका रहा। एह बरे बाबुल क फउज मिस्र स आवइवाली फउज स लड़इ बरे, यरूसलेम स हट गइ रही।)

⁶यहोवा क सँदेसा यिर्मयाह नबी क मिला: ⁷“इस्राएल क लोगन क परमेस्सर यहोवा जउन कहत ह, उ इ अहइ: ‘मइँ जानत हउँ कि यहूदा क राजा सिदकिय्याह तोहका मोरे लगे यहोवा स सलाह पूछइ बरे पठएस ह। राजा सिदकिय्याह क इ जवाब द्या, फिरौन क फउज हिआँ तोहार मदद बरे आवत ह, किन्तु उ फउज मिस्र क वापिस लौट जाइ। ⁸ओकरे पाछे बाबुल क फउज हिआँ लउटी। इ यरूसलेम पइ हमला करी। तब बाबुल क उ फउज यरूसलेम पइ अधिकार करी अउर ओका बारि डाइ।’ ⁹यहोवा जउन कहत ह, उ इ अहइ: ‘यरूसलेम क लोगो, आपन क मूर्ख जिन बनावा। तू पचे आपुस मँ जिन कहा, “बाबुल क फउज निहचइ ही, हम लोगन क सान्त छोड़ देइ।” उ नाहीं छोड़ी। ¹⁰यरूसलेम क लोगो, जदि तू पचे बाबुल क उ सारी फउज क ह काहे न हराइ द्या जउन तू पचन पइ हमला करत अहइ, तउ भी ओनके डेरन मँ कछू घायल मनई बच जइहीं। उ पचे थोड़े घायल मनई भी आपन डेरन स बाहेर निकरिहीं अउर यरूसलेम क जराइके राख कइ देइहीं।’”

¹¹जब बाबुल फउज मिस्र क फिरौन क सेना क संग जुद्ध करइ बरे यरूसलेम क छोड़ेस, ¹²तब यिर्मयाह यरूसलेम स बिन्यामीन प्रदेस क जात्रा करइ चाहत रहा। हुआँ उ आपन परिवार क कछू सम्पत्ति क बटवारे मँ भाग लेइ जात रहा। ¹³मुला जब यिर्मयाह यरूसलेम क बिन्यामीन क दुआर पइ पहोंचा तब रच्छन क अधिकारी कप्तान ओका बन्दी बनाइ लिहन। कप्तान क नाउँ यिरिय्याह रहा। यिरिय्याह सेलेम्याह क पूत रहा। सेलेम्याह हनन्याह क पूत रहा। इ तरह कप्तान यिरिम्याह यिर्मयाह क बन्दी बनाएस अउर कहेस, “यिर्मयाह, तू हम लोगन क बाबुल पच्छ मँ मिलइ बरे, छोड़त अहा।”

¹⁴यिर्मयाह यिरिय्याह स कहेस, “इ फुरइ नाहीं अहइ। मइँ कसदियन क संग मिलइ बरे नाहीं जात हउँ।” मुला यिरिय्याह यिर्मयाह क एक न सुनेस। यिरिय्याह यिर्मयाह क बन्दी बनाएस अउर ओका यरूसलेम क राजकीय अधिकारियन क लगे लइ गवा। ¹⁵उ सबइ अधिकारी यिर्मयाह पइ बहोत कोहान रहेन। उ पचे यिर्मयाह क पीटइ क आदेस दिहन। तब उ पचे यिर्मयाह क जेल मँ डाइ दिहन। जेल योनातान नाउँ क मनई क घर मँ रहा। योनातान यहूदा क राजा क सास्त्री रहा। योनातान क घर जेल बनाइ दीन्ह गवा रहा। ¹⁶ओन लोग यिर्मयाह क योनातान क घर क एक कोठरी मँ रखेन। उ कोठरी जमीन क खाले कूप-गृह रही। यिर्मयाह ओहमाँ लम्बे समइ तलक रहा।

¹⁷तब राजा सिदकिय्याह यिर्मयाह क बोलवाएस अउर ओका राजमहल मँ लावा गवा। सिदकिय्याह यिर्मयाह स एकान्त मँ बातन किहस। उ यिर्मयाह स पूछेस, “का यहोवा क कउनो सँदेसा अहइ?”

यिर्मयाह जवाब दिहस, “हाँ, यहोवा क सँदेसा अहइ। सिदकिय्याह, तू बाबुल क राजा क हाथ मँ दइ दीन्ह जाब्या।” ¹⁸तब यिर्मयाह राजा सिदकिय्याह स कहेस, “मइँ कउन सा अपराध किहे हउँ? मइँ कउन सा अपराध तोहरे, तोहरे अधिकारियन या यरूसलेम क खिलाफ किहे हउँ? तू मोका जेल मँ काहे बाँध्या? ¹⁹राजा सिदकिय्याह, तोहार नबी अब कहाँ अहइँ? ओन नबियन तोहका झूठा सँदेसा दिहन। उ पचे कहेन, ‘बाबुल क राजा तोह पइ या यहूदा देस पइ हमला नाहीं करी।’ ²⁰मुला अब मोर यहोवा, यहूदा क राजा, कृपा कइके मोर सुना। कृपा कइके मोर निवेदन अपने तलक पहोंचइ द्या। मइँ आप स एतना माँगत हउँ। सास्त्री योनातन क घर मोका वापस जिन पठवा। जदि आप मोका हुआँ पठउब्या मइँ हुअँइ मरि जाब।”

²¹एह बरे राजा सिदकिय्याह यिर्मयाह बरे आँगन मँ रच्छकन क संरच्छन मँ रहइ क आदेस दिहस कि यिर्मयाह क सड़क पइ रोटी बनावइवालन स रोटियन दीन्ह जाइ चाही। यिर्मयाह क तब तक रोटी दीन्ह जात रही जब तलक नगर मँ अउर रोटी नाहीं रहे। इ तरह यिर्मयाह आँगन मँ रच्छक क संरच्छन मँ रहा।

1 कुरिन्थियन 14:13-25

¹³परिणामसरूप जउन दूसर भाखा मँ बोलत ह, ओका पराथना करई चाही कि उ आपन कहे क मतलब भी बताइ सकइ। ¹⁴काहेकि अगर मइँ किहींउ अउर भाखा मँ पराथना करउँ तउ मोर आतिमा त पराथना करत रही होत ह मुला मोरे बुद्धि बेकार रहत ह। ¹⁵तउ फिन का करइ चाही? मइँ आपन आतिमा स तउ पराथना करबइ। मुला ओकरे साथ आपन बुद्धि स भी पराथना करबइ। आपन आतिमा स त ओकर स्तुति करबइ ही मुला आपन बुद्धि स भी ओकर स्तुति करबइ। ¹⁶काहेकि अगर तू केवल आपन आतिमा स ही कउनउ आसीर्बाद द्या तउ हुवाँ बइठा कउनउ मनई जउन बस सुनत अहइ, तोहरे धन्यबाद पर “आमीन” कइसे कहि देई काहेकि तू जउन कहत अहा, ओका उ जनबइ नाहीं करत। ¹⁷अब देखा तू तउ चाहे भली-भाँति धन्यबाद देत अहा मुला दूसर मनई क तउ ओसे कउनउ आध्यात्मिक मजबूति नाहीं होत।

¹⁸मइँ परमेस्सर क धन्यबाद देत हउँ कि मइँ तोसे बढ़कर क विभिन्न भाखा बोलि सकित हउँ। ¹⁹मुला कलीसिया सभा क बीच कउनो दूसरी भाखा मँ दसहु हजार सब्द बोलइ क अपेच्छा आपन बुद्धि क उपयोग करत हुए पाँच सब्द बोलब अच्छा समझत अहउँ ताकि दूसरे क भी उपदेस दइ सकउँ।

²⁰भाइयो तथा बहिनियो, अपने बिचारन मँ गदेलन क नाई रहा बल्कि बुराइयन क बारे मँ अबोध गदेला जइसेन बना रहा। मुला आपन चिन्तन मँ समझदार बना। ²¹व्यवस्था मँ लिखा बा:

“उपयोग ओनकर करत भए अउर बोली बोलत जउन,
ओनके ही मुँहन क, उपयोग करत
भए जउन क पराया मइँ करबइ बात
एनसे पर न इ हमार सुनिहीं बात तब भी।” ^(A)

पर्भू अइसेन ही कहत ह।

²²तउन दूसर भाखा बोलइ क बरदान अबिसवासियन क बरे संकेत अहइ न कि बिसवासियन क बरे अहइ। जब कि भविसबाणी करब अबिसवासियन बरे नाहीं बल्कि बिसवासियन बरे अहइ। ²³तउन अगर समूचा कलीसिया एकट्ठ होइ अउर हर केऊॅ दूसर-दूसर भाखा मँ बोलत होइ तब भी बाहर क लोग या अबिसबासी भित्तर आइ जाइँ तउ का उ पचे तोहे पागल न कइहीं। ²⁴मुला अगर हर केउ परमेस्सर कइँती स बोलत होइँ अउर तब तलक कछू अबिसवासी या बाहर क आइ जाइँ त का सब लोग ओका ओकर पाप क बोध न कराइ देइहीं। सब लोग जे कहत हीं, ऊही पइ ओकर निआव होई। ²⁵जब ओकरे मने क भित्तर छिपा भेद खुली जाइ तब तलक उ इ कहत भआ, “सचमुच तोहरे बीच परमेस्सर अहइ।” दण्डवत प्रणाम कइके परमेस्सर क आराधना करिहीं।

मत्ती 10:24-33

²⁴“चेला आपन गुरु ते बड़वार नाहीं होतेन अउर न ही कउनो नउकर आपन मालिक ते बड़वार होत ह। ²⁵चेला क गुरु क नाईं होइ मँ अउर नउकरे क मालिक क नाई होइ मँ संतोख करइ चाही। जब उ घरे क मालिक क बेल्जाबुल (सइतान) कहइँ तउ, ओकरे घरे क दूसर लोगन क संग तउ अउ भी बुरा बेवहार करिहीं!”

परमेस्सर स डेराअ मनइयन स नाहीं

(लूका 12:2-7)

²⁶“एह बरे ओनसे डेराअ जिन काहेकि जउन छुपी अहइ, सब खुलि जाई। अउर हर चीज जउन छुपी अहइ, परगट होइ जाई। ²⁷मइँ अँधियारे मँ जउन कछू तोसे कहत हउँ, मइँ चाहित ह कि तू उजियारे मँ कहा। मइँ जउन कछू तोहरे कनवा मँ कहेउँ तू ओकरे मकाने क छत्तियापर चढ़िके, एलान करा। ²⁸ओनसे जिन डेराअ, जउन तोहरे देह क नास कइ डइहीं मुला तोहरे आतिमा क नाहीं मारि सकतेन। बस उ परमेस्सर स डेराअ जउन तोहार देह अउर आतिमा क नरके मँ नाइ के नास कइ सकत ह। ²⁹एक ठु पइसा क दुइ चिड़िया बेसहे मँ स भी एक तोहरे परमपिता क बे जाने भए अउर ओकर बिना इच्छा स धरती प नाहीं गिर सकत। ³⁰अरे तोहरे मूँड़े क एक एक बार तक गिना भवा बाटइ। ³¹यह बरे डेराअ जिन, तोहार कीमत तउ वइसी बहोत स चिड़ियन ते जिआदा बाटइ।

ईसू मँ बिसवास

(लूका 12:8-9)

³²“जउन कउनो मोका सब मनइयन क समन्वा अपनाई, मइँ भी ओका सरगे मँ बसा आपन परमपिता क समन्वा अपनियाउब। ³³मुला जउन कउनो मोका सब मनइयन क समन्वा न अपनियाई, मइँ भी ओका आपन परमपिता क समन्वा न अपनियाउब।

Awadhi Bible: Easy-to-Read Version (ERV-AWA)