◀ All Reading Plans / Book of Common Prayer / Ps. 61 62; Ps. 68:1–20 (21–23) 24–36; Lev. 16:20–34; 1 Thess. 5:1–11; Matt. 6:7–15 (Awadhi Bible: Easy-to-Read Version)

Prev Day

April 30, 2024

Next Day

Use the calendar to view readings from this devotional.

April 2024
Su	Mo	Tu	We	Th	Fr	Sa
	1	2	3	4	5	6
7	8	9	10	11	12	13
14	15	16	17	18	19	20
21	22	23	24	25	26	27
28	29	30

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 61-62

तार क वाद्यन क संगीत निदेर्सक बरे दाऊद क एक ठु गीत।

¹हे परमेस्सर, मोर पराथना गीत सुना।
    मोर विनती सुना।
²जब मइँ मातम स भरि ग रहेउँ,
    मइँ तोहार मदद पावइ बरे तोहका पुकारब जहाँ कहेउँ भी मइँ होउँ!
तू मोह पइ दयालु ह्‌वा
    अउर मोका बहोत ऊँच सुरच्छित ठउरे पइ जाइ बरे मोर अगुवाइ करा।
³तू ही मोर सरणस्थल अहा, तू ही मोर सुदृढ गढ़ अहा।
    जउन मोका मोरे दुस्मनन स बचावत ह।
⁴तोहरे डेरा मँ, मइँ सदा सदा बरे बसव।
    मइँ हुअँई छिपब जहाँ तू मोका बचाइ सका।

⁵हे परमेस्सर, तू मोर उ मन्नत सुन्या ह, जेका तोहे पइ चढ़ाउब,
    मुला तोहरे मनवइयन क लगे हर वस्तु ओनका तोहसे ही मिली अहइँ।
⁶राजा क लम्बी उमर देइ।
    ओका हमेसा जिअइ द्या।
⁷ओका सदा परमेस्सर क आसीर्बाद मँ बना रहइ द्या।
    ओकर रच्छा बिस्ससनीय पिरेम अउ दयालुता स करा।
⁸मइँ तोहरे नाउँ क गुण सदा गाउब।
    ओन बातन क करब जेनका करइ क वचन मइँ दिहेउँ ह।

‘यदूतून’ राग पइ संगीत निर्देसक बरे दाऊद क एक ठु भजन।

¹मोर प्राण सान्ति स बाट जोहत अहइ
    कि परमेस्सर मोर रच्छा करी।
²परमेस्सर मोर किला अहइ, परमेस्सर मोका बचावत ह।
    ऊँच पहाड़ पइ, परमेस्सर मोर सुरच्छित ठउर अहइ।
    मोका बड़की फउजियन भी हराइ नाहीं सकतिन।

³तू मोह पइ कब तलक वार करत रहब्या?
    मइँ एक ठु निहुरी देवार क नाईं होइ गवा हउँ,
अउर एक बाड़ा जइसा
    जउन भहराइ वाला अहइ।
⁴उ सबइ लोग मोरे नास क कुचक्र रचत अहइँ।
    मोरे बारे मँ उ सबइ झूठी बातन बनावत अहइँ।
लोगन क बीच मँ,
    उ पचे मोर बड़कई करतेन,
    मुला उ पचे मोका लुकान-छिपान कोसत हीं।

⁵मोर प्राण सान्ति स परमेस्सर क बाट जोहत अहा
    काहेकि सिरिफ उ ही मोर उद्धार क आसा अहइ।
⁶परमेस्सर मोर गढ़ अहइ, परमेस्सर मोका बचावत ह।
    ऊँच पर्वत मँ परमेस्सर मोर सुरच्छा स्थल अहइ।
⁷महिमा अउ विजय, मोका परमेस्सर स मिलत ह।
    उ मोर सुदृढ़ गढ़ अहइ, परमेस्सर मोर सुरच्छा स्थल अहइ।
⁸लोगो, परमेस्सर पइ हर घड़ी भरोसा राखा।
    आपन सबइ समस्या परमेस्सर स कहा।
    परमेस्सर हमार सुरच्छा स्थल अहइ।

⁹फुरइ लोग कउनो मदद नाहीं कइ सकतेन।
    फुरइ तू ओनके भरोसे मदद पावइ क नाहीं रहि सकत्या।
परमेस्सर क तुलना मँ
    उ पचे हवा क झोंका क नाईं अहइँ।
¹⁰तू बल पइ भरोसा जिन रक्खा कि तू सक्ति क संग चिजियन क छोर लेब्या।
    जिन सोचा तू पचन्क चोरी करइ स कउनो लाभ होइ।
अउर अगर धनवान भी होइ जाइ
    तउ कबहुँ दौलत पइ भरोसा जिन करा कि उ तू पचन्क बचाई लेइ।
¹¹एक ठु बात अइसी अहइ जउन परमेस्सर कहत ह जेकरे भरोसे तू फुरइ रहि सकत अहा:
    “सक्ती परमेस्सर स आवत ह!”

¹²मोरे सुआमी, तोहार पिरेम सच्चा अहइ।
तू कउनो जन क ओकरे ओन कामन क प्रतिफल या सजा देत ह, जेनका उ करत ह।

भजन संहिता 68

संगीत निर्देसक बरे दाऊद क एक ठु भजन।

¹हे परमेस्सर, उठा, आपन दुस्मनन क एहर ओहर करा।
    ओकर सबहिं दुस्मनन ओकरे लगे स पराइ जाइँ।
²जइसे हवा स उड़ावा भवा धुआँ बिखरि जात ह,
    वइसे ही तोहार दुस्मन बिखरि जाइँ।
जइसे आगी मँ मोम टेघर जात ह,
    वइसे ही तोहरे दुस्मनन क नास होइ जाइ।
³परमेस्सर क संग सज्जन सुखी होत हीं, अउर सज्जन सुखद पल बितावत हीं।
    सज्जन खुद ही आनन्द मनावत अउ खुद ही बहोत खुस रहत हीं।
⁴परमेस्सर क गीत गावा।
    ओकरे महिमा नाउँ क गुणगान करा।
परमेस्सर बरे राह तइयार करा जउन आपन रथे क रेगिस्तान मँ हाँकत ह।
    ओकरे समन्वा आन्दित भवा जेकर नाउँ याह अहइ।
⁵परमेस्सर अनाथन क पिता क समान अहइ अउर राँड़ मेहररूअन क धियान रखत ह।
    उ आपन पवित्तर मन्दिर मँ अहइ।
⁶जेकर कउनो घर नाहीं होत, अइसे अकेले मनई क परमेस्सर घर देत ह।
    आपन मनवइयन क परमेस्सर बंधन स अजाद करत ह।
    उ पचे बहोत खुस रहत हीं।
    मुला जउन परमेस्सर क खिलाफ होत हीं, ओनका तपत भइ भुइँया पइ रहइ क होइ।

⁷हे परमेस्सर, तू आपन मनवइयन क मिस्र स निकार्या,
    अउ रेगिस्तान स पैदर ही पार निकार्या।
⁸इस्राएल क परमेस्सर जब सिय्योन पर्वत पइ आवा रहा,
    तउ धरती काँप उठी रही, अउ अकास टेघरा रहा।
⁹हे परमेस्सर, बर्खा क तू पठए रह्या,
    अउ पुरान अउ दुर्बल पड़ी धरती क तू फुन ससक्त किहा।
¹⁰उहइ धरती पइ तोहार गोरू वापस आइ गएन।
    हे परमेस्सर, हुआँ क दीन लोगन क तू उत्तिम चिजियन दिहा।
¹¹परमेस्सर हुकुम दिहस
    अउर बहोत लोग सुसंदेस सुनावइ गएन।
¹²“बरिआर राजा लोगन क फउजन एहर ओहर पराइ गइन।
    जुद्ध स जउन चिजियन क फउजी लिआवत हीं, ओनका घरे पइ रुकी मेहररूअन बाँटि लेइही।
    जउन लोग घरे म्ँ रूका बाटेन, उ सबइ उ धने क बाँटि लेइहीं।
¹³उ सबइ चाँदी स मढ़ा भवा कबूतरे क पखना पइहीं।
    उ सबइ सोना स चमकत भवा पखनन क पइहीं।”

¹⁴परमेस्सर जब सल्मोन पर्वत पइ दुस्मन राजा लोगन क बिखेर दिहस,
    तउ उ पचे अइसे छितरानेन जइसे बरफ गिरत ह।
¹⁵बासान पर्वत महान पर्वत अहइ,
    जेकर चोटियन बहोत सी बाटिन।
¹⁶बासान पर्वत, तू काहे सिय्योन पर्वत क नान्ह समुझत बाट्या?
    परमेस्सर ओहसे पिरेम करत ह।
    परमेस्सर ओका हुआँ सदा रहइ बरे चुनेस ह।
¹⁷यहोवा पवित्तर पर्वत सिय्योन पइ आवत अहइ।
    अउ ओकरे पाछे कई लाख रथ अहइँ।
¹⁸उ ऊँचे पइ चढ़ गवा।
    उ बंदियन क अगुआई किहस,
उ मनइयन स हिआँ तलक कि
    आपन विरोधी लोगन स भेंट लिहस।
    यहोवा परमेस्सर हुआँ रहइ गवा।
¹⁹यहोवा क गुण गावा।
    उ हर दिन हमार, हमरे संग भार उठावइ मँ मदद करत ह।
    परमेस्सर हमार रच्छा करत ह।

²⁰उ हमार परमेस्सर अहइ।
    उ उहइ परमेस्सर अहइ जउन हमका बचावत ह।
    हमार यहोवा परमेस्सर मउत स हमार रच्छा करत ह।
²¹परमेस्सर देखाँइ देइ कि आपन दुस्मनन क उ हराइ दिहस ह।
    अइसे ओन मनइयन क जउन ओकरे खिलाफ लड़ेन, उ सजा देइ।
²²मोर सुआमी कहेस, “मइँ बासान स दुस्मन क वापस लिआउब,
    मइँ दुस्मन क समुद्दर क गहराई स वापस लाउब,
²³ताकि तू ओनकर खून मँ विचरि सका,
    तोहार कूकुरन ओनकर खून चाट जाइँ।”

²⁴लोग लखत हीं, परमेस्सर क विजय अभियान क अगुआइ करत भए।
    लोग मोरे पवित्तर परमेस्सर, मोरे राजा क अभियान क अगुआई करत लखत हीं।
²⁵अगवा-अगवा गवइयन क मण्डली चलत ह, पाछे-पाछे वादक लोगन क मण्डली आवति अहइ,
    अउ बीच मँ कुमारियन तम्बूरन बजावति अहइँ।
²⁶परमेस्सर क बड़कई महासभा क बीच करा।
    इस्राएल क लोगो, तू यहोवा क गुण गावा।
²⁷नान्ह बिन्यामीन ओनकर अगुआई करत बाटइ।
    यहूदा क बड़का परिवार हुआँ बाटइ।
    जबूलून अउ नपताली क नेता हुआँ पइ अहइँ।

²⁸हे परमेस्सर, हमका आपन सक्ति देखाँवा।
    हमका उ आपन सक्ति देखाँवा जेकर उपयोग तू हमरे बरे बीते भए जमाने मँ किहे रहा।
²⁹राजा लोग, जरूसलेम मँ तोहरे मन्दिर क बरे
    निज सम्पत्ति लिअइहीं।
³⁰ओन “गोरूअन” स काम मनचाहा करावइ बरे
    आपन कुबरी क प्रयोग करा।
ओन जातियन क “बर्धन”
    अउर “गइयन” क आग्या मानइवालन बनावा।
तू जउन रास्ट्रन क जुद्ध मँ हराया।
    अब तू ओनसे चाँदी मँगवाइ ल्या।
³¹तू ओनसे मिस्र स धन मँगवाइ ल्या।
    हे परमेस्सर, तू आपन धन कूस स मँगवाइ ल्या।
³²धरती क राजा लोगो, परमेस्सर बरे गावा।
    हमरे सुआमी बरे तू जसगान गावा।

³³परमेस्सर बरे गावा, उ रथे पइ चढ़िके सनातन अकासन स निकरत ह।
    तू ओकरे सक्तीसाली स्वर क सुना।
³⁴इस्राएल क परमेस्सर,
    तोहरे कउनो भी देवतन स जियादा बलवान अहइ।
    उ जउन निज मनवइयन क सुदृढ़ बनावत ह।
³⁵परमेस्सर आपन मन्दिर मँ अद्भुत बाटइ।
    इस्राएल क परमेस्सर भक्तन क सक्ति अउ सामरथ देत ह।

परमेस्सर क गुण गावा।

लैव्यव्यवस्था 16:20-34

²⁰“हारून महा पवित्तर स्थान, मिलापवाला तम्बू अउ वेदी बरे प्रायस्चित करी। इ सबइ काम क पाछे हारून यहोवा क लगे जिअत बोकरा क लिआई। ²¹हारून आपन दुइनउँ हाथन क जिअत बोकरा क मूँड़े पइ धरी। तब हारून बोकरा क ऊपर इस्राएल क लोगन क अपराध अउ पाप क कबूली। इ तरह हारून लोगन क पापन क बोकरा क मूँड़े पइ डाइ। तब उ बोकरा क दूर रेगिस्तान मँ पठइ। एक मनई बगल मँ बोकरा क लइ जाइके बरे खड़ा होइ। ²²इ तरह बोकरा सबहिं लोगन क पाप अपने ऊपर सूना रेगिस्तान मँ लइ जाइ। जउन मनई बोकरा क लइ जाइ उ रेगिस्तान मँ ओका खुला छोड़ि देइ।

²³“तब हारून मिलापवाला तम्बू मँ जाई। उ सन क ओन उत्तिम ओढ़नन क पहिरिही जेनका उ महा पवित्तर स्थान मँ जात समइ पहिरे रहा। ओका ओन ओढ़नन क हुअँइ तजइ चाही। ²⁴उ आपन पूरा सरीर क एक पवित्तर जगह मँ पानी स धोई। तब उ आपन दूसर खास ओढ़नन क पहिरी। उ बाहेर आइ अउर आपन होमबलि अउर लोगन क होमबलि चढ़ाइ। उ आपन क अउ लोगन क पाप बरे प्रायस्चित करी। ²⁵तब उ वेदी पइ पापबलि क चबीर् क चढ़ाइ।

²⁶“जउन मनई बोकरा क अजाजेल क लगे लइ जाइ, उ आपन ओढ़ना अउ आपन पूरा सरीर क पानी स धोवइ चाही। ओकरे पाछे उ मनई सिबिर मँ वापिस आइ सकत ह।

²⁷“पापबलि क बछवा अउर बोकरा क सिबिर स जरूर बाहेर लइ जाइ चाही। (उ पसुअन क रकत पवित्तर ठउरे मँ पवित्तर चीजन बरे प्रायस्चित करइ बरे लिआवा ग रहा।) याजक ओन पसुअन क चाम, सरीर अउ सरीरे क मल आगी मँ बारी। ²⁸तब ओन चीजन क बारइवाला मनई क आपन ओढ़ना अउ पूरा सरीर क पानी डाइके धोवइ चाही। ओकरे पाछे उ मनई डेरा मँ आइ सकत ह।

²⁹“इ नेम तोहरे बरे सदा रही। सतएँ महीना क दसवें दिन तू पचन क जरूर उपवास करइ चाही। तू पचन क कउनो काम नाहीं करइ चाही। तोहरे संग रहइवाला नागरिक या विदेसी भी कउनो काम नाहीं कइ सकिहीं। ³⁰काहेकि उ दिन याजक तोहका सुद्ध किहेस ह अउ तोहरे पापन्क बरे प्रायस्चित किहेस ह। तब तू पचे यहोवा बरे सुद्ध होब्या। ³¹इ दिन तोहरे बरे आराम करइ क बिसेस दिन अहइ। तोहका सबन क इ दिन उपवास करइ चाही। इ नेम सदा बरे होइ।

³²“तउ उ मनई जउन महा याजक बनइ बरे अभिसेक किहेस ह इ चीजन सुद्ध करइ बरे प्रायस्चित करी। इ उहइ मनई अहइ जेका ओकरे पिता क मउत क पाछे महा याजक क रुप मँ सेवा बरे तय कीन्ह ग अहइ। उ याजक क सन क पवित्तर ओढ़ना धारण करइ चाही। ³³ओका पवित्तर स्थान, मिलापवाला तम्बू अउ वेदी क सुद्ध करइ चाही अउ ओका याजक अउ इस्राएल क सबहिं लोगन क सुद्ध करइ चाही। ³⁴इस्राएल क लोगन क प्रायस्चित करइ क इ नेम सदा ही रही। तोहका इ सबइ बरिस मँ एक दाईं जरूर करइ चाही।”

एह बरे उ पचे उहइ किहेन जउन करइ क यहोवा मूसा क आदेस दिहे रहा।

1 थिस्सलुनीकियन 5:1-11

पर्भू क अवाई क सुवागत बरे तइयार रहा

5 भाइयो तथा बहिनियो, समइ अउर तिथियन क बारे मँ तोहे लिखइ क कउनउ जरूरत नाहीं बा ²काहेकि तू खुदई बहुत अच्छी तरह जानत ह कि जइसे चोर रस्ता स चुप्पे चला आवत ह, वइसेन ही पर्भू क फिन स लउटइ क दिन भी आइ जइहीं। ³जब लोग कहत होइहीं कि “सब कछू सांत अउर सुरच्छित बा” तबइ जइसे एक गर्भवती स्त्री क अचानक प्रसव वेदना आइ घेरत ह वइसेन ही ओह पर बिनास उत्तर आइ अउर उ कहूँ बचिके भाग न पावइ।

⁴मुला भाइयो तथा बहिनियो, तू अँधियारे (पाप) क वासी नाहीं अहा कि तोह पर उ दिन अचानक ही चोर की नाई आइ जाइ। ⁵तू सब तउ प्रकास (भलाई) स जुड़ा अहा अउर दिन क संतान स भी। हम न तउ रात या अँधियारा (बुराई) जुड़ा हई। ⁶इही बरे हमका अउरन क नाई सोवत रहत न चाही, बल्कि सावधानी क साथे हमका तउ अपने प नियन्त्रण रखइ चाहीं। ⁷काहेकि जउन सोवत हीं, रात मँ सोवत ही अउर जउन नसा करत हीं, उ रात मँ ही मदमस्त होत हीं। ⁸मुला हम पचे तउ दिने (भलाई) स जुरा हई इही बरे हमका अपने प काबू रखई चाही। आवा बिसवास अउर पिरेम क चिलम धारण कइ लेई अउर उद्धार पावई क आसा क सिरस्त्राण क तरह ओढ़ि लेई।

⁹काहेकि परमेस्सर हमका ओनके प्रकोपे क बरे नाहीं चुनेस ह बल्कि हमार पर्भू ईसू मसीह द्वारा उद्धार पावई क बरे बनाए अहइ। ¹⁰ईसू तउ हमरे बरे परान तियाग दिहेस ताकि चाहे हम सजीव ओकरे संग होई, इ जरूरी नाहीं कि जब उ आवइ हम जिअत या मरा रही। ¹¹इहीं बरे एक दुसरे क सुख पहुँचाव अउर एक दुसरे क आध्यात्मिक रूपे स मजबूत बनावत रहा। जइसेन कि तू करत अहा।

मत्ती 6:7-15

⁷“जब तू पराथना करत रहा, तउ विधर्मी क नाईं फिजूल बातन क यों ही बार बार जिन दोहरावा। उ सबइ इ सोचत हीं कि ओनके बहोत बोले स ओनकइ सुनि लीन्ह जाइ। ⁸यह बरे ओनके जइसा जिन होइ जा काहेकि तोहरे परमपिता तोहारे माँगइ स पहिले जानत ह कि तोहार का जरूरत अहइ। ⁹यह बेर इ प्रकार पारथना करा:

‘सरग मँ रहइ वाले हमार परमपिता,
    पवित्तर अहइ तोहार नाउँ
¹⁰जग मँ तोहार राज्य आवइ जउन चाहा तू वइसे पूर होइ
    इ धरती प जइसे पूर होत रहत तोहार इच्छा सदा सरग मँ।
¹¹आज तू हमका दिन भर क खइया द्या
¹²हमार पापन क छमा करा
    जइसे हम छमा कीन्ह आपन अपराधिनक।
¹³जिन ल्या कठिन परिच्छा भारी
    हमका ओसे बचावा जउ उन दुस्ट (सइतान) स अहइ।’^[a]

¹⁴यह बरे जदि तू लोगन्क अपराधे क छमा करब्या तउ तोहार सरगे क परमपिता भी तोहरे पाप छमा करी। ¹⁵मुला अगर तू लोगन्क छमा न करब्या तउ तोहार सरगे क परमपिता भी तोहरे पापन्क छमा न करी।

Awadhi Bible: Easy-to-Read Version (ERV-AWA)