26 At nangyari, na nang matapos ni Jesus ang lahat ng mga salitang ito, ay sinabi niya sa kaniyang mga alagad,

² Nalalaman ninyo ^(A)na pagkaraan ng dalawang araw ay darating ang paskua, at ibibigay ang Anak ng tao upang ipako sa krus.

³ Nang magkagayo'y ang mga pangulong saserdote, at ang mga matanda sa bayan ay nangagkatipon sa ^(B)looban ng dakilang saserdote, na tinatawag na ^(C)Caifas;

⁴ At sila'y nangagsanggunian upang hulihin si Jesus sa pamamagitan ng daya, at siya'y patayin.

⁵ Datapuwa't sinabi nila, Huwag sa kapistahan, baka magkagulo sa bayan.

^6 (D)Nang nasa ^(E)Betania nga si Jesus sa bahay ni Simon na ketongin,

⁷ Ay lumapit sa kaniya ang isang babae na may dalang isang sisidlang alabastro ng unguento na lubhang mahalaga, at ibinuhos sa kaniyang ulo, samantalang siya'y nakaupo sa pagkain.

⁸ Datapuwa't nang makita ito ng mga alagad, ay ^(F)nangagalit sila, na nangagsasabi, Ano ang layon ng pagaaksayang ito?

⁹ Sapagka't ito'y maipagbibili sa ^(G)malaking halaga, at maibibigay sa mga dukha.

¹⁰ Datapuwa't nang mahalata ito ni Jesus ay sinabi sa kanila, Bakit ninyo binabagabag ang babae? sapagka't gumawa siya sa akin ng mabuting gawa.

¹¹ Sapagka't laging nangasa inyo ang mga dukha; datapuwa't ako'y hindi laging nasa inyo.

¹² Sapagka't sa pagbubuhos niya nitong unguento sa aking katawan, ay ginawa niya ito upang ihanda ako sa ^(H)paglilibing.

¹³ Katotohanang sinasabi ko sa inyo, Saan man ipangaral ang evangeliong ito sa buong sanglibutan, ay sasaysayin din ang ginawa ng babaing ito sa pagaalaala sa kaniya.

^14 (I)Nang magkagayo'y isa sa labingdalawa, na tinatawag na ^(J)Judas Iscariote, ay naparoon sa mga pangulong saserdote,

¹⁵ At sinabi, ^(K)Ano ang ibig ninyong ibigay sa akin, at siya'y ibibigay ko sa inyo? At siya'y tinimbangan nila ng ^(L)tatlongpung putol na pilak.

¹⁶ At buhat nang panahong yao'y humanap siya ng pagkakataon upang maibigay siya.

^17 (M)Nang ^(N)unang araw nga ng mga tinapay na walang lebadura ay nagsilapit ang mga alagad kay Jesus, na nagsisipagsabing, Saan mo ibig na ipaghanda ka namin upang kumain ng kordero ng paskua?

¹⁸ At sinabi niya, Magsipasok kayo sa bayan ^(O)sa gayong tao, at sabihin ninyo sa kaniya, Sinabi ^(P)ng Guro, malapit na ang ^(Q)aking panahon; sa iyong bahay magpapaskua ako pati ng aking mga alagad.

¹⁹ At ginawa ng mga alagad ang ayon sa ipinagutos sa kanila ni Jesus; at inihanda nila ang kordero ng paskua.

^20 (R)Nang dumating nga ang gabi, ^(S)ay nakaupo siya sa pagkain na kasalo ang labingdalawang alagad;

²¹ At samantalang sila'y nagsisikain, ay sinabi niya, ^(T)Katotohanang sinasabi ko sa inyo, na ako'y ipagkakanulo ng isa sa inyo.

²² At sila'y lubhang nangamanglaw, at nagpasimula ang bawa't isa na magsabi sa kaniya, Ako baga, Panginoon?

²³ At siya'y sumagot at sinabi, ^(U)Yaong kasabay kong idampot ang kamay sa pinggan, ay siya ring magkakanulo sa akin.

^24 (V)Ang Anak ng tao ay papanaw, ^(W)ayon sa nasusulat tungkol sa kaniya: datapuwa't ^(X)sa aba niyaong taong magkakanulo sa Anak ng tao! mabuti pa sana sa taong yaon ang hindi na siya ipinanganak.

²⁵ At si Judas, na sa kaniya'y nagkanulo, ay ^(Y)sumagot at nagsabi, Ako baga, Rabi? Sinabi niya sa kaniya, Ikaw ang nagsabi.

^26 (Z)At samantalang sila'y nagsisikain, ay dumampot si Jesus ng tinapay, at pinagpala, at pinagputolputol; at ibinigay sa mga alagad, at sinabi, Kunin ninyo, kanin ninyo; ito ang aking katawan.

²⁷ At dumampot siya ng isang saro, at nagpasalamat, at ibinigay sa kanila, na nagsasabi, Magsiinom kayong lahat diyan;

²⁸ Sapagka't ^(AA)ito ang aking dugo ng tipan, na nabubuhos ^(AB)dahil sa marami, ^(AC)sa ikapagpapatawad ng mga kasalanan.

²⁹ Datapuwa't sinasabi ko sa inyo, ^(AD)na buhat ngayon ay hindi na ako iinom nitong bunga ng ubas, hanggang sa araw na yaon na inumin kong panibago na mga kasalo ko kayo ^(AE)sa kaharian ng aking Ama.

^30 (AF)At pagkaawit nila ^(AG)ng isang himno, ay ^(AH)nagsiparoon sila sa bundok ng mga Olivo.

³¹ Nang magkagayo'y sinabi sa kanila ni Jesus, Kayong lahat ay ^(AI)mangagdaramdam sa akin sa gabing ito: sapagka't nasusulat, ^(AJ)Sasaktan ko ang pastor, at mangangalat ang mga tupa ng kawan.

³² Datapuwa't pagkapagbangon ko, ay ^(AK)mauuna ako sa inyo sa Galilea.

³³ Datapuwa't sumagot si Pedro at sinabi sa kaniya, Kung ang lahat ay mangagdaramdam sa iyo, ^(AL)ako kailan ma'y hindi magdaramdam.

³⁴ Sinabi sa kaniya ni Jesus, Katotohanang sinasabi ko sa iyo, na sa gabing ito, ^(AM)bago tumilaok ang manok, ay ikakaila mo akong makaitlo.

³⁵ Sinabi sa kaniya ni Pedro, ^(AN)Kahima't ako'y mamatay na kasama mo, ay hindi kita ikakaila. Gayon din ang sinabi ng lahat ng mga alagad.

³⁶ Nang magkagayo'y dumating si Jesus ^(AO)na kasama sila sa isang dako na tinatawag na ^(AP)Getsemani, at sinabi sa kaniyang mga alagad, Magsiupo kayo rito, samantalang ako'y pumaparoon doon at manalangin.

³⁷ At kaniyang isinama si Pedro ^(AQ)at ang dalawang anak ni Zebedeo, at nagpasimula siyang namanglaw at nanglumong totoo.

³⁸ Nang magkagayo'y sinabi niya sa kanila, Namamanglaw na lubha ang kaluluwa ko, hanggang sa kamatayan: mangatira kayo rito, at makipagpuyat sa akin.

³⁹ At lumakad siya sa dako pa roon, at siya'y nagpatirapa, ^(AR)at nanalangin, na nagsasabi, Ama ko, kung baga maaari, ay ^(AS)lumampas sa akin ang sarong ito: gayon ma'y ^(AT)huwag ang ayon sa ibig ko, kundi ang ayon sa ibig mo.

⁴⁰ At lumapit siya sa mga alagad, at sila'y kaniyang naratnang nangatutulog, at sinabi kay Pedro, Ano, hindi kayo maaaring mangakipagpuyat sa akin ng isang oras?

⁴¹ Kayo'y mangagpuyat at magsipanalangin, ^(AU)upang huwag kayong magsipasok sa tukso: ^(AV)ang espiritu sa katotohanan ay may ibig, datapuwa't mahina ang laman.

⁴² Muli siyang umalis na bilang ikalawa, at nanalangin, na nagsasabi, Ama ko, kung di mangyayaring makalampas ito, kundi ko inumin, mangyari nawa ang iyong kalooban.

⁴³ At siya'y nagbalik na muli at naratnan silang nangatutulog, sapagka't nangabibigatan ang kanilang mga mata.

⁴⁴ At muli niya silang iniwan, at umalis, at nanalangin bilang ikatlo, na sinabing muli ang gayon ding mga salita.

⁴⁵ Nang magkagayo'y lumapit siya sa mga alagad, at sinabi sa kanila, Mangatulog na kayo, at mangagpahinga: narito, malapit na ang oras, at ang Anak ng tao ay ipinagkakanulo sa mga kamay ng mga makasalanan.

⁴⁶ Magsitindig kayo, hayo na tayo: narito, malapit na ang nagkakanulo sa akin.

⁴⁷ At ^(AW)samantalang nagsasalita pa siya, narito, dumating si ^(AX)Judas, na isa sa labingdalawa, at kasama niya ang lubhang maraming taong may mga tabak at mga panghampas, mula sa mga pangulong saserdote at sa matatanda sa bayan.

⁴⁸ Ang nagkanulo nga sa kaniya ay nagbigay sa kanila ng isang hudyat, na sinasabi, Ang aking hagkan, ay yaon nga: hulihin ninyo siya.

⁴⁹ At pagdaka'y lumapit siya kay Jesus, at nagsabi, Magalak, Rabi; at siya'y hinagkan.

⁵⁰ At sinabi sa kaniya ni Jesus, Gawin mo ang dahil ng pagparito mo. Nang magkagayon ay nagsilapit sila at kanilang sinunggaban si Jesus, at siya'y kanilang dinakip.

⁵¹ At narito, ^(AY)ang isa sa mga kasama ni Jesus ay iniunat ang kaniyang kamay at binunot ang ^(AZ)kaniyang tabak, at sinugatan ang alipin ng dakilang saserdote, at tinagpas ang kaniyang tainga.

⁵² Nang magkagayo'y sinabi sa kaniya ni Jesus, Isauli mo ang iyong tabak sa kaniyang lalagyan: ^(BA)sapagka't ang lahat ng nangagtatangan ng tabak ay sa tabak mangamamatay.

⁵³ O inaakala mo baga na hindi ako makapamamanhik sa aking Ama, at padadalhan niya ako ngayon din ng mahigit sa labingdalawang pulutong na mga anghel?

⁵⁴ Kung gayo'y paano bagang mangatutupad ^(BB)ang mga kasulatan, na ganyan ang nauukol na mangyari?

⁵⁵ Sa oras na yaon ay sinabi ni Jesus sa mga karamihan, Kayo baga'y nangagsilabas na waring laban sa isang tulisan, na may mga tabak at mga panghampas upang dakpin ako? Araw-araw ay nauupo ako sa templo na nagtuturo, at hindi ninyo ako dinakip.

⁵⁶ Datapuwa't nangyari ang lahat ng ito, upang mangatupad ang mga kasulatan ng mga propeta. Nang magkagayo'y iniwan siya ng ^(BC)lahat ng mga alagad, at nagsitakas.

^57 (BD)At si Jesus ay dinala ng nagsihuli sa kaniya sa dakilang saserdoteng si ^(BE)Caifas, na doo'y nangagkakapisan ang mga eskriba at matatanda.

⁵⁸ Datapuwa't si Pedro'y sumunod sa kaniya sa malayo, hanggang sa looban ng dakilang saserdote, at siya'y pumasok, at nakiumpok sa mga punong kawal, upang makita niya ang wakas.

⁵⁹ Ang mga pangulong saserdote nga at ang buong Sanedrin ay nagsisihanap ng patotoong kabulaanan laban kay Jesus, upang siya'y kanilang maipapatay;

⁶⁰ At yao'y hindi nila nangasumpungan, bagaman ^(BF)maraming nagsiharap na mga saksing bulaan. Nguni't pagkatapos ay nagsidating ang dalawa,

⁶¹ At nangagsabi, Sinabi ng taong ito, ^(BG)Maigigiba ko ang templo ng Dios, at muling itatayo ko sa tatlong araw.

⁶² At nagtindig ang dakilang saserdote, at sinabi sa kaniya, Wala kang isinasagot na anoman? Ano itong sinasaksihan ng mga ito laban sa iyo?

⁶³ Datapuwa't hindi umimik si ^(BH)Jesus. At sinabi ng dakilang saserdote sa kaniya, ^(BI)Kita'y pinapanunumpa alangalang sa Dios na buhay, na sabihin mo sa amin kung ikaw nga ang Cristo, ^(BJ)ang Anak ng Dios.

⁶⁴ At sinabi sa kaniya ni Jesus, Ikaw ang nagsabi: gayon ma'y sinasabi ko sa inyo, Buhat ngayon ay ^(BK)inyong makikita ang Anak ng tao na nakaupo sa kanan ng Kapangyarihan, at pumaparitong nasa mga alapaap ng langit.

⁶⁵ Nang magkagayoy hinapak ng dakilang saserdote ang kaniyang mga damit, na sinasabi, Nagsalita siya ng kapusungan: ano pa ang kailangan natin ng mga saksi? narito, ngayo'y narinig ninyo ang kapusungan:

⁶⁶ Ano ang akala ninyo? Nagsisagot sila at kanilang sinabi, ^(BL)Karapatdapat siya sa kamatayan.

⁶⁷ Nang magkagayo'y ^(BM)niluraan nila ang kaniyang mukha at siya'y kanilang pinagsusuntok: at tinatampal siya ng mga iba,

⁶⁸ Na nangagsasabi, ^(BN)Hulaan mo sa amin, ikaw Cristo: sino ang sa iyo'y bumubugbog?

⁶⁹ Nakaupo nga si Pedro ^(BO)sa labas ng ^(BP)looban: at lumapit sa kaniya ang isang alilang babae, na nagsasabi, Ikaw man ay kasama ng ^(BQ)taga Galileang si Jesus.

⁷⁰ Datapuwa't siya'y kumaila sa harap nilang lahat, na sinasabi, Hindi ko nalalaman ang sinasabi mo.

⁷¹ At paglabas niya sa portiko ay nakita siya ng ibang alila, at sinabi sa nangaroon, Ang taong ito ay kasama rin ni Jesus na taga Nazaret.

⁷² At muling kumailang may sumpa, Hindi ko nakikilala ang tao.

⁷³ At pagkaraan ng sandali ay nagsilapit ang nangakatayo roon at kanilang sinabi kay Pedro, Sa katotohanang ikaw man ay isa rin sa kanila; sapagka't ^(BR)ipinakikilala ka ng iyong pananalita.

⁷⁴ Nang magkagayo'y nagpasimula siyang manungayaw at manumpa, Hindi ko nakikilala ang tao. At pagdaka'y tumilaok ang manok.

⁷⁵ At naalaala ni Pedro ang salitang sinabi ni Jesus, ^(BS)Bago tumilaok ang manok, ay ikakaila mo akong makaitlo. At siya'y lumabas at nanangis na mainam.

Ang Balak Laban kay Jesus^(A)

26 Nang matapos ni Jesus ang lahat ng mga salitang ito ay sinabi niya sa kanyang mga alagad,

² “Nalalaman^(B) ninyo na pagkaraan ng dalawang araw ay darating ang Paskuwa, at ibibigay ang Anak ng Tao upang ipako sa krus.”

³ Pagkatapos nito ang mga punong pari at ang matatanda sa bayan ay nagkatipon sa palasyo ng pinakapunong pari, na tinatawag na Caifas.

⁴ At sila'y nagsabwatan upang hulihin si Jesus sa pamamagitan ng daya, at patayin siya.

⁵ Ngunit sinabi nila, “Huwag sa kapistahan, baka magkagulo ang mga taong-bayan.”

Binuhusan ng Pabango si Jesus^(C)

⁶ Nang si Jesus ay nasa Betania, sa bahay ni Simon na ketongin,

⁷ lumapit^(D) sa kanya ang isang babae na may dalang isang sisidlang alabastro na may lamang mamahaling pabango at ibinuhos sa kanyang ulo, habang siya'y nakaupo sa may hapag.

⁸ Subalit nang makita ito ng mga alagad, ay nagalit sila, na nagsasabi, “Anong layunin ng pag-aaksayang ito?

⁹ Sapagkat maipagbibili sana ito sa malaking halaga, at maibibigay sa mga dukha.”

¹⁰ Ngunit nang malaman ni Jesus ay sinabi niya sa kanila, “Bakit ninyo ginugulo ang babae? Sapagkat gumawa siya sa akin ng isang mabuting bagay.

¹¹ Sapagkat^(E) lagi ninyong kasama ang mga dukha, ngunit ako'y hindi ninyo laging makakasama.

¹² Sapagkat sa pagbubuhos niya ng pabangong ito sa aking katawan, ginawa niya iyon upang ihanda ako sa paglilibing.

¹³ Katotohanang sinasabi ko sa inyo, saan man ipangaral ang magandang balitang ito sa buong sanlibutan, ang ginawa ng babaing ito ay sasaysayin bilang pag-alaala sa kanya.”

Nakipagkasundo si Judas sa mga Kaaway ni Jesus^(F)

¹⁴ Pagkatapos, isa sa labindalawa, na tinatawag na Judas Iscariote ang nagpunta sa mga punong pari,

¹⁵ at^(G) nagsabi, “Anong ibibigay ninyo sa akin, kung ibibigay ko siya sa inyo?” At kanilang ipinagtimbang siya ng tatlumpung pirasong pilak.

¹⁶ At mula noon ay humanap siya ng pagkakataon na maipagkanulo si Jesus.^[a]

Ang Hapunang Pampaskuwa ni Jesus at ng Kanyang mga Alagad^(H)

¹⁷ Nang unang araw ng mga Tinapay na Walang Pampaalsa, lumapit ang mga alagad kay Jesus, na nagsasabi, “Saan mo ibig na ipaghanda ka namin upang kumain ka ng kordero ng paskuwa?”

¹⁸ At sinabi niya, “Pumunta kayo sa isang tao sa lunsod at sabihin ninyo sa kanya, ‘Sinabi ng Guro, Malapit na ang oras ko; sa iyong bahay ko gaganapin ang paskuwa kasama ng aking mga alagad.’”

¹⁹ At ginawa ng mga alagad ang ayon sa ipinag-utos sa kanila ni Jesus, at inihanda nila ang paskuwa.

²⁰ Pagsapit ng gabi, umupo siyang kasalo ng labindalawang alagad.^[b]

²¹ At samantalang sila'y kumakain ay sinabi niya, “Katotohanang sinasabi ko sa inyo, na isa sa inyo ay magkakanulo sa akin.”

²² At sila'y labis na nalungkot, at isa-isang nagpasimulang magsabi sa kanya, “Ako ba, Panginoon?”

²³ Sumagot^(I) siya at sinabi, “Ang kasabay kong nagsawsaw ng kanyang kamay sa mangkok ang siyang magkakanulo sa akin.

²⁴ Tunay na papanaw ang Anak ng Tao tulad ng nasusulat tungkol sa kanya, ngunit kahabag-habag ang taong iyon na sa pamamagitan niya'y ipagkakanulo ang Anak ng Tao! Mabuti pa sana sa taong iyon ang hindi na siya ipinanganak.”

²⁵ At si Judas na sa kanya'y nagkanulo, ay sumagot at nagsabi, “Hindi ako iyon, Rabi?” Sinabi niya sa kanya, “Ikaw ang nagsabi.”

Ang Banal na Hapunan^(J)

²⁶ Habang sila'y kumakain ay dumampot si Jesus ng tinapay, binasbasan niya ito at pinagputul-putol, at ibinigay sa mga alagad, at sinabi, “Kumuha kayo, kainin ninyo; ito ang aking katawan.”

²⁷ At kumuha siya ng isang saro^[c] at nang makapagpasalamat ay ibinigay sa kanila, na nagsasabi, “Uminom kayong lahat nito,

²⁸ sapagkat^(K) ito ang aking dugo ng tipan,^[d] na nabubuhos dahil sa marami, sa ikapagpapatawad ng mga kasalanan.

²⁹ At sinasabi ko sa inyo, mula ngayon ay hindi na ako iinom ng katas ng ubas na ito hanggang sa araw na iyon na iinumin kong panibago na kasalo kayo sa kaharian ng aking Ama.”

³⁰ At pagkaawit nila ng isang himno ay nagtungo sila sa Bundok ng mga Olibo.

Paunang Sinabi ang Pagtatatwa ni Pedro^(L)

³¹ Pagkatapos^(M) ay sinabi ni Jesus sa kanila, “Kayong lahat ay tatalikod^[e] dahil sa akin sa gabing ito; sapagkat nasusulat, ‘Sasaktan ko ang pastol, at ang mga tupa ng kawan ay magkakawatak-watak.’

³² Subalit^(N) matapos na ako'y maibangon na ay mauuna ako sa inyo sa Galilea.”

³³ Ngunit sumagot si Pedro at sinabi sa kanya, “Kung ang lahat man ay tumalikod dahil sa iyo, ako kailanma'y hindi tatalikod.”

³⁴ Sinabi ni Jesus sa kanya, “Katotohanang sinasabi ko sa iyo, sa gabing ito, bago tumilaok ang manok, ay ipagkakaila mo ako ng tatlong ulit.”

³⁵ Sinabi sa kanya ni Pedro, “Kahit kinakailangang ako'y mamatay na kasama mo, ay hindi kita ipagkakaila.” Gayundin ang sinabi ng lahat ng mga alagad.

Nanalangin si Jesus sa Getsemani^(O)

³⁶ Pagkatapos ay pumunta si Jesus na kasama sila sa isang pook na tinatawag na Getsemani, at sinabi niya sa kanyang mga alagad, “Maupo kayo rito, samantalang ako'y pupunta sa dako roon at mananalangin.”

³⁷ Isinama niya si Pedro at ang dalawang anak ni Zebedeo, at nagpasimula siyang malungkot at mabagabag.

³⁸ At sinabi niya sa kanila, “Lubhang nalulungkot ang aking kaluluwa na halos ay ikamatay. Manatili kayo rito at makipagpuyat sa akin.”

³⁹ Paglakad pa niya ng malayu-layo, siya'y nagpatirapa at nanalangin, na nagsasabi, “Ama ko, kung maaari, lumampas sana sa akin ang kopang ito; gayunma'y hindi ang ayon sa ibig ko, kundi ang ayon sa ibig mo.”

⁴⁰ At lumapit siya sa mga alagad, at sila'y kanyang naratnang natutulog, at sinabi niya kay Pedro, “Samakatuwid, hindi ninyo kayang makipagpuyat sa akin ng isang oras?

⁴¹ Kayo'y maging handa at manalangin, upang hindi kayo madaig ng tukso. Ang espiritu ay tunay na nagnanais subalit ang laman ay mahina.”

⁴² Muli, sa ikalawang pagkakataon, umalis siya at nanalangin, na nagsasabi, “Ama ko, kung hindi maaaring lumampas ito, malibang inumin ko ito, ang iyong kalooban ang siyang mangyari.”

⁴³ At muli siyang lumapit at naratnan silang natutulog, sapagkat antok na antok na sila.^[f]

⁴⁴ Kaya sila'y muli niyang iniwan, at umalis, at nanalangin sa ikatlong pagkakataon na sinasabi ang gayunding mga salita.

⁴⁵ Pagkatapos ay lumapit siya sa mga alagad at sinabi sa kanila, “Natutulog pa rin ba kayo at nagpapahinga? Masdan ninyo, malapit na ang oras, at ang Anak ng Tao ay ipinagkakanulo sa mga kamay ng mga makasalanan.

⁴⁶ Bumangon kayo, lumakad tayo. Masdan ninyo, malapit na ang nagkakanulo sa akin.”

Dinakip si Jesus^(P)

⁴⁷ At habang nagsasalita pa siya, dumating si Judas, na isa sa labindalawa, at kasama niya ang napakaraming tao na may mga tabak at mga pamalo, mula sa mga punong pari at sa matatanda ng bayan.

⁴⁸ At ang nagkanulo sa kanya ay nagbigay sa kanila ng isang palatandaan, na sinasabi, ‘Ang hahalikan ko ay iyon na nga; dakpin ninyo siya.’

⁴⁹ Kaagad siyang lumapit kay Jesus, at sinabi, “Magandang gabi,^[g] Rabi!” at kanyang hinagkan siya.

⁵⁰ At sinabi sa kanya ni Jesus, “Kaibigan, gawin mo ang layunin ng pagparito mo.” Pagkatapos ay lumapit sila at kanilang hinawakan si Jesus at siya'y kanilang dinakip.

⁵¹ Ang isa sa mga kasama ni Jesus ay nag-unat ng kanyang kamay at bumunot ng kanyang tabak. Tinaga niya ang alipin ng pinakapunong pari at tinagpas ang tainga nito.

⁵² Nang magkagayo'y sinabi sa kanya ni Jesus, “Ibalik mo ang iyong tabak sa kanyang lalagyan, sapagkat ang lahat ng humahawak ng tabak ay sa tabak mamatay.

⁵³ O sa akala mo ba'y hindi ako maaaring tumawag sa aking Ama, at padadalhan niya ako ngayon din ng mahigit sa labindalawang pangkat^[h] ng mga anghel?

⁵⁴ Ngunit kung gayo'y paanong matutupad ang mga kasulatan, na ganito ang kinakailangang mangyari?”

⁵⁵ Sa^(Q) oras na iyon ay sinabi ni Jesus sa mga napakaraming tao, “Kayo ba'y lumabas na parang laban sa isang tulisan, na may mga tabak at mga pamalo upang dakpin ako? Araw-araw ay nakaupo ako sa templo na nagtuturo, at hindi ninyo ako dinakip.

⁵⁶ Subalit nangyari ang lahat ng ito, upang matupad ang mga kasulatan ng mga propeta.” Pagkatapos ay iniwan siya ng lahat ng mga alagad at sila'y tumakas.

Si Jesus sa Harap ng Sanhedrin^(R)

⁵⁷ Si Jesus ay dinala ng mga dumakip sa kanya kay Caifas, na pinakapunong pari, na kung saan nagkatipon ang mga eskriba at matatanda.

⁵⁸ Ngunit sumunod si Pedro sa kanya ng may kalayuan, hanggang sa bakuran ng pinakapunong pari. Siya'y pumasok, at umupong kasama ng mga tanod upang makita niya kung ano ang mangyayari.

⁵⁹ At ang mga punong pari at ang buong Sanhedrin ay humanap ng mga bulaang saksi laban kay Jesus upang kanilang maipapatay siya.

⁶⁰ Ngunit wala silang natagpuan bagaman maraming humarap na mga bulaang saksi. Pagkatapos ay may dalawang dumating,

⁶¹ at^(S) nagsabi, “Sinabi ng taong ito, ‘Kaya kong gibain ang templo ng Diyos, at muling itayo sa loob ng tatlong araw.’”

⁶² Tumindig ang pinakapunong pari at sinabi sa kanya, “Wala ka bang isasagot? Ano itong ibinibintang ng mga ito laban sa iyo?”

⁶³ Ngunit hindi umimik si Jesus. At sinabi ng pinakapunong pari sa kanya, “Pinanunumpa kita sa harapan ng Diyos na buháy, sabihin mo sa amin kung ikaw nga ang Cristo, ang Anak ng Diyos.”

⁶⁴ Sinabi^(T) ni Jesus sa kanya, “Ikaw ang nagsabi, ngunit sinasabi ko sa inyo, mula ngayon ay inyong makikita ang Anak ng Tao na nakaupo sa kanan ng Kapangyarihan, at dumarating na nasa mga ulap ng langit.”

⁶⁵ Nang^(U) magkagayo'y pinunit ng pinakapunong pari ang kanyang mga damit, na sinasabi, “Nagsalita siya ng kalapastanganan. Bakit kailangan pa natin ng mga saksi? Narito, narinig ninyo ngayon ang kanyang kalapastanganan.

⁶⁶ Ano sa palagay ninyo?” Sumagot sila at sinabi, “Karapat-dapat siya sa kamatayan.”

⁶⁷ Pagkatapos^(V) ay kanilang niluraan siya sa kanyang mukha at siya'y kanilang pinagsusuntok; at sinampal siya ng iba,

⁶⁸ na nagsasabi, “Ipahayag mo sa amin, ikaw na Cristo! Sino ang sumuntok sa iyo?”

Ipinagkaila ni Pedro si Jesus^(W)

⁶⁹ Samantala, si Pedro ay nakaupo sa labas ng bakuran. Lumapit sa kanya ang isang aliping babae, na nagsasabi, “Ikaw ay kasama rin ni Jesus na taga-Galilea.”

⁷⁰ Subalit ipinagkaila niya ito sa harap nilang lahat, na sinasabi, “Hindi ko alam ang sinasabi mo.”

⁷¹ At paglabas niya sa tarangkahan ay nakita siya ng isa pang alipin, at sinabi sa mga naroon, “Ang taong ito ay kasama rin ni Jesus na taga-Nazaret.”

⁷² At muling ipinagkaila niya ito nang may panunumpa, “Hindi ko kilala ang taong iyon.”

⁷³ Pagkalipas ng ilang sandali ay lumapit ang mga nakatayo roon at sinabi nila kay Pedro, “Talagang ikaw nga ay isa rin sa kanila, sapagkat nahahalata sa iyong pananalita.”

⁷⁴ Pagkatapos ay nagpasimula siyang magsalita ng masama at manumpa, “Hindi ko kilala ang taong iyon.” At kaagad tumilaok ang manok.

⁷⁵ At naalala ni Pedro ang salitang sinabi ni Jesus, “Bago tumilaok ang manok, ay tatlong ulit mo akong ikakaila.” At siya'y lumabas at mapait na tumangis.