Jesusca domingo tutamantami causarishca

24 Domingo tutamanta manaraj alli pacarijpimi, huarmicunaca paicuna allichishca, mishquijllata ashnacujcunata apashpa, Jesusta churashca jutcuman shamurcacuna. Shujtaj huarmicunandijmi shamurcacuna. ² Paicuna chayanapajca, jutcu pungupi jarcashca rumica ña anchuchishcami ricurirca. ³ Jutcuman yaicushpa ricujpica, Apunchij Jesuspaj cuerpoca mana ricurircachu. ⁴ Paipaj cuerpo mana ricurijpimi, achcata mancharishpa shayacurcacuna. Chaipimi ñapish ishqui runacunaca, lamyacuj churanata churashca, paicunapaj c'uchupi ricurirca. ⁵ Chaita ricushpacarin, ashtahuan mancharishpa cumurijpimi, chai ishqui runacunaca, cashna nircacuna:

–¿Ima nishpataj ña causarishcataca, huañushcacunapaj chaupipi mashcacunguichij? ⁶ Paica mana caipichu, ñamari causarirca. Pai Galileapi cashparaj, ima nishcataca yuyarichigari. ⁷ Illu Galileapi cashpaca: “Runa Aichayuj Ñucataca, juchayuj runacuna japishpa chacatashpa huañuchingacunami. Huañuchijpipish, quimsa punllapica causarishallami” nircami– nircacunami.

⁸ Chashna nijpimi chai huarmicunaca, Jesús chashna nishcataca yuyarircacuna. ⁹ Jutcumanta paicuna tigrashpami, chunga shuj yachacujcunamanpish, caishuj crijcunamanpish, tucui imalla tucushcata huillarcacuna. ¹⁰ Huillagrichun mingashcacunamanca, Magdalamanta Mariapish, Juanapish, Jacobopaj mama Mariapish, shujtaj huarmicunapishmi huillagrircacuna. ¹¹ Paicuna chaita uyashpaca, musparishpalla chashna nicujtami yuyarcacuna. Jesús causarishcataj canataca, mana crircacunachu.

¹² Mana cricushpapish, Pedroca huasimanta llujshishcahuanmi, callpashpa jutcuman rirca. Chaiman chayashpaca, pillushca linsocunallatami siricujta ricurca. Chaita ricushpaca, achcata mancharishpami huasiman tigramurca.

Jesusca Emausman ishqui yachacujcuna ricujpimi tupashca

¹³ Chai punllallatajmi ishqui yachacujcunaca, Emausman ricurca. Chai puebloca, Jerusalenmanta chunga shuj kilómetro shinallapimi. ¹⁴ Paicunaca tucui imalla tucushcatami, parlanacuihuan ricurcacuna. ¹⁵ Chashna caishuj chaishuj parlanacushpa rimanacuihuan ricujpimi, Jesusca ñapish paicunapajman c'uchuyashpa, paicunahuan tandalla rirca. ¹⁶ Shina cajpipish Jesusta ama rijsichun, paicunapaj ñahuicunaca huichcashca shinami carca. ¹⁷ Jesusca:

–¿Imatataj parlanacuihuan ricunguichij? ¿Ima nishpataj llaquilla canguichij?– nishpami tapurca.

¹⁸ Chashna nijpi chai ishquimanta Cleofas shuti runaca, cashnami nirca:

–Illu tucuicunatajmari cai punllacuna Jerusalenpi ima tucushcataca yachancuna. ¿Maimanta cashpataj canllaca mana yachanguiari?– nircami.

¹⁹ Shina nijpica:

–¿Imataj tucushca canga?– nircami.

Chashna nijpi, paicunaca cashnami nirca:

–Dios ima nishcata huillaj, Nazaretmanta Jesustamari parlanacunchij. Paica Taita Diospaj ñaupajpipish, tucui gentecunapaj ñaupajpipish, imata rurangapaj, imata yachachingapajpish tucuita rurai tucuj cashcatamari ricuchirca. ²⁰ Paitamari pushaj curacunapish, ñucanchij llajtata mandajcunapish juchachishpa, chacatashpa huañuchircacuna. ²¹ Ñucanchijca paillatamari, ‘Ñucanchij Israel llajtataca quishpichingami’ nishpa chapacurcanchij. Ashtahuanpish Paita huañuchishcaca, ñamari quimsa punllapish tucun. ²² Chashna cajpipish manaraj pacarijpi, ñucanchijpura maijan huarmicuna chai jutcupi ricugrishpamari, ñucanchijtaca ashtahuan manchachincuna. ²³ Paicunamari Jesuspaj cuerpotaca, chai jutcupi ña mana ricushcacuna. Ashtahuanpish ‘Angelcuna ricurishpamari, Jesús causarishcata huillan’ nishpamari tigramurcacuna. ²⁴ Chashna huillajpimi, ñucanchijpuramanta maijancunaca jutcupi ricunaman rishcacuna carca. Paicunapish huarmicuna parlashca shinallataj, Jesuspaj cuerpotaca ña mana japishcacunachu carca– nircacunami.

²⁵ Chashna nijpimi, Jesusca cashna nirca:

–¡Cancunaca upacunamari canguichij! ¿Ima nishpataj Dios ima nishcata huillajcuna nishcataca, mana utca cringuichigari? ²⁶ Quishpichij Cristoca sumajyachishca canapajca, ¿manachari llaquitaraj apana carcari?– nircami.

²⁷ Chashna nishpaca, Moisés Quillcashcamanta callarishpa, tucui Dios ima nishcata tucui huillajcuna quillcashcacamami, Dios tucui Quillcachishcacunapi Paimanta imalla nishcataca huillashpa yuyachirca.

²⁸ Paicuna ricushca puebloman ña chayajpica, Jesusca ashtahuan caruman ricuj shinami tucurca. ²⁹ Shina cajpipish paicunaca, mana cachasha nishpami:

–Shuyailla, ñamari chishi. Ña tutayacunpishmari– nircacuna.

Chashna nijpi Jesusca, paicunahuan saquiringapaj yaicurcami. ³⁰ Ña micungapaj meźapi paicunahuan tiyacushpaca, tandata japishpami Diosta pagui nirca. Chaimantaca chaupishpami paicunaman cararca. ³¹ Chashna rurajpi chai runacunapaj ñahuicunaca pascarij shina ricushpaca, Jesús cashcata rijsircacunami. Ashtahuanpish Jesusca, paicunapaj ñahuimantaca chingarircallami. ³² Pai ña mana ricurijpimi, paicunaca:

–Dios Quillcachishcacunata ñanpi ñucanchijta Pai yuyachishpa rimashpaca, ¿manachu ñucanchijtaca, shunguman yaicujtamari rimarca?– ninacurca.

³³ Chashna ninacushpaca, jatarishcahuan Jerusalenman shamurcallacunami. Ña chayamushpaca, chunga shuj yachacujcunataca, shujtajcunahuanpish tandanacushcatami japircacuna. ³⁴ Tucui paicunami: «Apunchij Jesusca causarishcatajmari. Simonmari Paitaca ricushca» nircacunami.

³⁵ Shina nijpimi, paicunapish ñanpi imalla tucushcatapish, tandata chaupishpa caracujpi ima shina rijsishcatapish huillarcacuna.

Jesusca chunga yachacujcunamanmi ricurishca

³⁶ Jesusta ricushcata caishuj chaishuj parlanacucujpirajmi, Jesusca ñapish paicunapaj chaupipi ricurirca. Chaipi ricurishpaca:

–Ama manchaichijchu– nirca.

³⁷ Chashna ricurijpica, ‘Ayatami ricunchij’ yuyashpami, chujchushpa achcata mancharircacuna. ³⁸ Chashna mancharijpimi, Jesusca cashna nirca:

–¿Ima nishpataj mancharinguichij? ¿Ima nishpataj cancunapaj shungupica, chashna yuyacunguichij? ³⁹ Ñuca maquita, Ñuca chaquita japishpa ricuichigari, Ñucallatajmari cani. ¿Maitataj ayaca aichata, tullutaca charingari? Ñucaca cancuna ricucuj shinallataj aichayuj, tulluyujmari cani– nircami.

⁴⁰ Shina nishpami maquita, chaquita ricuchirca. ⁴¹ Chashna ricuchijpipish cushicushpa, mancharishpa, Pai cashcata manaraj crijpimi Jesusca:

–¿Ima micunata caipi charinguichijchu?– nirca.

⁴² Chashna nijpi cusashca asha chalhuahuan, asha abeja mishquihuanmi cararcacuna. ⁴³ Chaita carajpica, japishpa paicunapaj ñaupajpi micurcami. ⁴⁴ Ña micushca q'uipaca, Jesusca paicunataca cashnami nirca:

–Moisés Mandashcapipish, Dios ima nishcata huillajcuna Quillcashcapipish, Salmocunapi Ñucamanta tucui imalla nishcacunapish pajtachunmi, chashnaca tucurca. Illu chashna tucunataca, ñaupamanmari huillarcani– nircami.

⁴⁵ Chashna yuyaita cushpami, Dios Quillcachishcacunapi imalla nicushcata entendichun yuyaita pascarca. ⁴⁶ Cashnami entendichirca:

–Diospaj Quillcapi nishca shinallatajmi, Quishpichij Cristoca huañuna carca. Huañushpapish, quimsa punllapica causarinami carca. ⁴⁷ Chai huashaca Jerusalenmanta callarishpa, tucui llajtacunapimi: “ ‘Juchacunata anchuchichun Diospajman cutirichij’ nishpa, Paipaj shutipi huillashca canga” nishcamari. ⁴⁸ Chai quillcashca shinallataj tucujtaca, quiquin ñahuihuanmi ricushcanguichij. ⁴⁹ Chaicunata huillachunca, Ñuca Yaya cachasha nishca Paipaj Espirituta cancunapajman cachashami. Paita Ñuca cachangacamaca, Jerusalenllapitaj shuyanguichijlla. Ñuca cachajpi jahuamanta Pai shamushpa cancunata japijpimi, imatapish rurai tucunguichij– nircami.

Apunchij Jesusca Betaniamantami jahua pachaman rishca

⁵⁰ Jesusca, chai q'uipami paicunataca, Betania pueblo ch'imbanijman pushashpa rirca. Chaipimi, paicunapaj jahuata maquicunata chutashpa bendiciarca. ⁵¹ Paicunata bendiciashpa, paicunamanta raquirijpica, jahua pachaman aparcallami. ⁵² Paicunaca Jesusta adorashca q'uipaca, achcata cushicushpami, Jerusalenman tigrarcacuna. ⁵³ Chaiman tigramushpaca, Diospaj huasipi Taita Diosta ‘Allimari cangui’ nishpa, punllanta alabarcallacunami. Chashna cachun.