Revised Common Lectionary (Semicontinuous)
1 Naja ni Pawlo, ne itekitini ne Mawaltijtuk, Yeshu; ne nutztuk pal muchiwa titanijtuk; ne ishtemujtuk ipal ne iyeknawatilis ne Teut 2 ne inatuya ka yawi techmaka itech ne itajtaketzani tik ne ajamat ipal Teut 3 se yeknawatilis ipanpa ne ikunew, ne kiski tik ne ishinach Dawid itech inakayu.
4 Kwak Yeshu Mawaltijtuk mikik wan muyulkwepki, ne Ijiutzin ipal Teut kituktij ken ikunew Teut iwan itajpal, 5 wan itech yaja tikwijtiwit tetasujtalis wan tetitanilis ipal tetakamatilis ipal tayulmatilis tik muchi ne tejtechan tik itukay.
6 Wan ijtik yejemet, anmejemet nusan metzinnutztuk Yeshu Mawaltijtuk! 7 Muchi ne nemit tik Roma, yejyektasujtatuk ipal Teut, nujnutztuk pal muchiwat ipal Teut: ma metzinmaka ne tuteku Teut, wan tutajtzin Yeshu Mawaltijtuk, itetasujtalis wan inejmachnemilis.
Nesik Yeshu
18 Ijkini panuk ka nesik Yeshu ne Mawaltijtuk. Maryam ne inan yawi katka munamiktia iwan Yosep. Wan kwak yejemet inteuk munamiktijtiwit, weykiski iwan ne Ijiutzin. 19 Yosep ishulejyu katka se senpa kichiwa tay yek. Inte kinekituya ma tajtaketzakan ipanpa. Yajika kinekituya kiajkawa isiwaw ma yawi minaya. 20 Kwak nemituya yultaketza muchi uni, kitemikik wan né kitak se tanawatiani ipal ne Teut, ina:
—Yosep itelpuch Dawid, maka shu-shimajmawi, tiweli timunamiktia iwan Maryam musiwaw, ika ipal ne Ijiutzin ne takati ijtik yaja. 21 Kipunis se piltzin wan tiktalilis itukay Yeshu, ika yajasan yawi kipalewia ne itechan melka tateyekchijtiwit.
22 Muchijtuk muchi ini pal ma yekawi ne tay inak Tutajwan itech ne taketzani, ken ina katka:
23 "Né ne siwapil kipias wey iijti wan kipunis itelpuch,
wan kinutzasket itukay Imanuel."
Imanuel kineki ina tik Nawat: "Tuwan nemi ne Teut".
24 Ne Yosep tamik kuchi wan isak, wan kichijki ken kituktij ne tanawatiani pal Tutajwan wan munamiktij iwan isiwaw, 25 wan te senkuchki iwan hasta punik itelpuch. Wan kitukaytij Yeshu.
Ne Bibliaj Tik Nawat · © 2008, 2012 Jan Morrow