Revised Common Lectionary (Semicontinuous)

²² Nukniwan ipal Israel, shinechkakikan: Yeshu ne Nazarayuj, ká ne Teut inak ka yek wan nemik ijtik anmejemet iwan itajpal wan sejse tay tetekia wan sejse pal muishmati tay ne kichijki ne Teut itech yaja itzalan anmejemet ken anmejemet kimatit, ²³ ne Teut ká kielewij ijkiuni wan achtutamatki, yaja temakak wan anmejemet kichijket tay inteyek, ankikwijtiwit wan ankikunaktijtiwit tik se cruz wan ankimiktijtiwit. ²⁴ Ne Teut kitamij ne itakukulis ipal mikilis wan kiketzki ika ne mikilis inte welik kipachua, ²⁵ ika ina Dawid ipanpa:

    "Senpa nikita nuishpan Tutajwan

    ika nemi ka numayekkan pal te nijtzilika.

²⁶     Neka nimuyulkwesuj wan pajpakik nunenepil,

    wan hasta ne nuweyka musewis iwan tejchialis,

²⁷     ika inte tikajkawas ne nualmaj tik Miktan

    nian tikajkawas palani ne mupal tay yek.

²⁸     Tinechneshtilij ne ujujti ipal nemilis;

    ne muishkalyu nechtemas iwan pakilis."

²⁹ Nukniwan, ma nimetzinhilwi melaknaj: ne tutatanoy Dawid mikik wan kitalpachujket, wan nemi ne shaput kenhayuk. ³⁰ Ken yaja taketzani katka wan kimati katka ka kichijki jurar ne Teut se juramentoj ka yawi kisa sé ijtik itakil ne ishinach mutalia ijpak ne ikuijpal, ³¹ yaja achtutachishki wan taketzki ipanpa ne muyulkwepalis ipal ne Mawaltijtuk ka nian mukawki ka Miktan nian palanik inakayu. ³² Ini Yeshu ne Teut kiyulkwepki, ken muchi tejemet tikmatit. ³³ Yajika, yaja muajkukijtuk ka imayekkan ne Teut, wan kikwijtuk ne sentaketzat ipal ne Ijiutzin itech ne Teteku, wan kikushinijtuk ini tay ankitat wan antakakit. ³⁴ Ika Dawid inte tejkuk ka ilwikak; yajasan ina, ika inak:

    "Ne Nuteku kilwij ne nutajtzin:

        Shimutali ka nuyekkan ³⁵ hasta ma niktali ká ne kinekit metzijtakuat ken se kuijpal ka itan mujmukshi."

³⁶ Yajika, ma kimati yek muchi ne kal ipal Israel ka ne Teut kichijki Tajtzin wan Mawaltijtuk ini Yeshu ká ankicruzpilujtiwit anmejemet.