Revised Common Lectionary (Semicontinuous)
36 Tik Yapo, nemik se mumachtiani, se siwat itukay Tabita (kineki ina gacelaj), ká kichiwa katka miak itekiw yek wan tetasujtatakulis. 37 Tik uni tujtunal yaja kukushki wan mikik, wan kipakaket wan kitekaket tik se cuartoj. 38 Ken Lod inte nemi wejka Yapo, kwak ne mumachtianimet takakket ka Pedro nemituya ka né, kintitanijket ume takat itech kitajtanit:
—Maka shishtuna tiajsi tutech.
39 Pedro muketzki wan yajki inwan. Kwak ajsik, kikalaktijket tik ne cuartoj, wan muchi ne lamajtzitzinmet nakaket inawak chukat wan kilwitiliat ne wijwipil wan kwajkwachti ne kichiwa katka ne Tabita kwak nemituya inwan. 40 Ne Pedro kintuktij kisat muchi, wan mutankwaketzki wan kinutzki ne Teut, wan muishkwepki itech ne mikini wan inak:
—Tabita, shimuketza!
Yaja kitapuj ne ijish wan kitak Pedro; 41 kimakak ne siwat ne imey wan kiketzki. Kinnutzki ne tayulmatit wan ne lajlamajtzitzinmet, wan kishpanuj ne siwat yultuk. 42 Uni mumatki nujme Yapo, wan miak kiyulmatket ne Tajtzin. 43 Mukawki tik Yapo miak tunal ichan se kwetashchiwani itukay Shimon.
9 Tipan nitachishki wan nemik se wey miaktal inte aka weli kipua ipal muchi ne tejtechan, trijtribuj, tajtal wan tajtaketzalis ejejkatuk ishpan ne kuijpal wan tik itachialis ne ichkakunetzin ijtik ijistak wipil iwan pajpalmaj ijtik inmejmey, 10 wan tzajtzit:
"Techmakishtiat ne tuTeut ne muetztuk ijpak ne kuijpal wan ne ichkakunetzin."
11 Wan muchi ne tanawatianimet kiyawalujket ne kuijpal, ne noymet wan ne nawi tay yujyultuk; wan mutamutaket talchi iishpan ne kuijpal wan mutankwaketzket iishpan ne Teut 12 wan inat:
"Amen. Ma kipia ne tuTeut ne tayektenewalis wan ne respetoj wan ne itajpal pal senpa wan senpa. Amen."
13 Wan nankilij se pal ne noymet, yaja nechilwia: "Ini ká mutakentijtiwit ijtik inwijwipil istak, ká yejemet wan kanka walajtiwit?" 14 Wan nikilwij: "Tajtzin, anka taja tikmati." Wan nechilwij:
"Yejemet ne kiseliat witzet wey uijkayu, wan kiapaktiwit ne inwijwipil wan kikweptiwit ijistak tik ne iesyu ne ichkakunetzin. 15 Yajika nemit iishpan ne ikuijpal ne Teut wan tekitit ipal ka tunal wan ka tayua tik ne iteupantzin, wan ne muetztuk ijpak ne kuijpal kipia ne ikal intzalan. 16 Intea yawit mayanat, wan intea yawit amikit, nian yawit nakat itan ne tunal nian mitunit, 17 ika ne ichkakunetzin tatajku ne kuijpal tajpias wan kinwikas itech ne ajat yultuk, wan ne Teut kiwatzas muchi ne inhishayu tik ne inhijish."
Ká Yeshu?
22 Tik Yerushalem nemituyat ne ilwit itukay Januka, tik ne shupan, 23 wan Yeshu pashalua nemi itech ne teupan, tik ne Itenkal Shalomo. 24 Kwakuni ne Yudayujmet kiyawalujket wan kilwiat:
—Hasta keman tiaw tikitzkia ne tualmaj? Asu taja ne Mawaltijtuk, shitechilwi melaknaj.
25 Ne Yeshu nankilij:
—Nimetzinhilwijtuk
wan te antayulmatit.
Ne nutejtekiw ne nikchiwa
tik itukay Nuteku
taneshtiat nupanpa.
26 Anmejemet inte antayulmatit
ika inte anhipal ne nuichkatal.
27 Ne nuichkatal nechkaki kwak nitanutza
wan naja nikishmati
wan witzet nuipan,
28 wan naja nikinmaka ma yujyultuk pal senpa,
wan tea keman puliwisket,
wan te aka kinhitzkis tik ne numey.
29 Ne Nuteku ne nechmakatuk,
yaja ne mas wey ipal muchi,
wan te aka weli kinhitzkia tik n' imey ne Nuteku.
30 Naja wan ne Teteku, tejemet sesan.
Ne Bibliaj Tik Nawat · © 2008, 2012 Jan Morrow