Revised Common Lectionary (Semicontinuous)
34 Pedro mutenpeluj wan inak:
—Ashan nikejketza ka tejkia ka ipal ne Teut muchi tikenhat: 35 tik muchi ne tejtechan Yaja kikwi ká ne kitakamati wan ká kichiwa tay yek. 36 Yajini ne palabraj ne kititanij intech ne Israeltekat kwak tayeknawatij nejmachnemilis iwan Yeshu Mawaltijtuk. Yajuni ne Tajtzin ipal muchi. 37 Anmejemet kimatit tay muchijki nujme Yudaya: pejki tik Galilaya iwan ne teulyujmakalis ne tanawatij Yojan; 38 nusan ankimatit ken ne Teut kimawaltij Yeshu ipal Nazaret iwan ne Ijiutzin wan ne itajpal, wan yajaya panuk nujme kichiwa tay yek wan kinpajtia muchi ne nemituyat itan itajpal ne Tamintuk ika ne Teut nemituya iwan; 39 wan tikmatit muchi tay kichijki ijtik ne tal ipal ne Yudayujmet wan tik Yerushalem, wan ka kipilujket ijpak se kwawit wan kimiktijket. 40 Wan ne Teut kiyulkwiltij kwak panutiwit yey tunal, wan kiajkaw walmuneshtia, 41 inte iishpan muchi ne techan, semaya intech yejemet ká ne Teut kishpejpentuya achtu pal kitat wan inat ka ijkia, tejemet ká tisentakwajket wan tiatiket iwan kwak tamik miki wan walmuketztuk, 42 wan techtuktij ma tiknajnawatikan ne techan wan ma tikilwikan ka yajaya ne tuktijtuk ipal ne Teut ma kichiwa juzgar ne yujyultuk wan ne miktiwit. 43 Muchi ne taketzanimet inaket ipanpa ka ijtik ne itukay mutapupulwia tay tateyekchijtiwit muchi ká kiyulmatit.
19 Su semaya tik ini nemilis titejchiat ipanpa ne Mawaltijtuk, tejemet titamakat mas lastimaj que muchi ne takamet!
20 Ashan muyulkweptuk ne Mawaltijtuk kwak miktuya, ken ne achtu ipal ne mijmiktuk, 21 ika ken nemi mikilis ipanpa se takat, nusan ipanpa se takat nemi muyulkwepalis, 22 ika kenha ken muchi yawit mikit ipanpa ne Adam, kiane nusan ipanpa ne Mawaltijtuk muchi yawit muyulkwepat. 23 Sejse kwak muneki: achtu ne Mawaltijtuk, tipan muchi ká ipal ne Mawaltijtuk kwak yaja ajsi witz; 24 neman ne tamilis, kwak yawi temaka ne tatekimakalis iwan ne Teut wan teteku, kwak puliwisket muchi ne tatuktianimet wan muchi ká tatekimakat wan welit wey, 25 ika yaja nemi pal tatekimaka hasta kintalia muchi ne kinekit kijtakuat itan ne ijikshi. 26 Ne tipan ipal yejemet ká puliwi, ne mikilis,
34 Pedro mutenpeluj wan inak:
—Ashan nikejketza ka tejkia ka ipal ne Teut muchi tikenhat: 35 tik muchi ne tejtechan Yaja kikwi ká ne kitakamati wan ká kichiwa tay yek. 36 Yajini ne palabraj ne kititanij intech ne Israeltekat kwak tayeknawatij nejmachnemilis iwan Yeshu Mawaltijtuk. Yajuni ne Tajtzin ipal muchi. 37 Anmejemet kimatit tay muchijki nujme Yudaya: pejki tik Galilaya iwan ne teulyujmakalis ne tanawatij Yojan; 38 nusan ankimatit ken ne Teut kimawaltij Yeshu ipal Nazaret iwan ne Ijiutzin wan ne itajpal, wan yajaya panuk nujme kichiwa tay yek wan kinpajtia muchi ne nemituyat itan itajpal ne Tamintuk ika ne Teut nemituya iwan; 39 wan tikmatit muchi tay kichijki ijtik ne tal ipal ne Yudayujmet wan tik Yerushalem, wan ka kipilujket ijpak se kwawit wan kimiktijket. 40 Wan ne Teut kiyulkwiltij kwak panutiwit yey tunal, wan kiajkaw walmuneshtia, 41 inte iishpan muchi ne techan, semaya intech yejemet ká ne Teut kishpejpentuya achtu pal kitat wan inat ka ijkia, tejemet ká tisentakwajket wan tiatiket iwan kwak tamik miki wan walmuketztuk, 42 wan techtuktij ma tiknajnawatikan ne techan wan ma tikilwikan ka yajaya ne tuktijtuk ipal ne Teut ma kichiwa juzgar ne yujyultuk wan ne miktiwit. 43 Muchi ne taketzanimet inaket ipanpa ka ijtik ne itukay mutapupulwia tay tateyekchijtiwit muchi ká kiyulmatit.
Muyulkwi
20 Tik ne achtu tunal pal ne semanaj, Maryam ipal Magdala ajsi peyna tik ne shaput, kwak uk kunyua, wan kita ka mijkwantuk ne tet ipal ne shaput. 2 Kwakuni kisa mutalua wan ajsi itech Shimon Pedro, wan itech ne ukse mumachtiani ká ne Yeshu sujsul kitasujta katka, wan kinhilwia:
—Kishtijtiwit ne Tajtzin ijtik ne shaput wan te tikmatit kan kitalijket.
3-4 Kisket mutaluat tel ne Pedro wan ne ukse mumachtiani wan ajsit tik ne shaput nemanhachin, wan ken ne ukse mumachtiani yajki mas talul ajsik tik ne shaput achtu, 5 wan kwak muishpiluj, kitak ne ikwenyu pak ne tal. Melka uni, intesu kalak. 6 Kwakuni ajsik Shimon Pedro iipan wan kalak tik ne shaput wan kita ne ikwenyu pak ne tal, 7 wan ne ikwach ne nentuya ijpak ne itzuntekun inte nemituya iwan ne ikwenyu asunte kimilujtuk ka ikwaj. 8 Kwakuni kalak nusan ne ukse mumachtiani ne achtu ajsituk ne shaput, wan tachishki wan kimatki, 9 ika inteuk kimatit ka muijkwilujtuk ka yaja nemi pal muyulkwi kwak miktuka. 10 Ne mumachtianimet mukwepket ka inchan; 11 Maryam nakak iten ne shaput chuka. Kwak chuka nemi, muishpiluj tachia ijtik ne shaput, 12 wan kita ume tanawatiani ijistatakentijtuk muetztuk ne sé itech ne itzuntekun wan ne seuk itech ne ijikshi kan ne mutekatuya ne iweyka Yeshu, 13 wan kilwiat:
—Siwat, taika tichuka?
Kinhilwia:
—Ika kiwikatiwit ne Nutajtzin wan te nikmati kan kitalijket.
14 Kwak tamik ina uni, muishkwepki wan kita ne Yeshu ejkatuk ka iipan, wan te kimatki ka yaja ne Yeshu. 15 Yeshu kilwia:
—Siwat, taika tichuka? Ká tiktemua?
Yajane kimati ka yaja ne milpiani wan kilwia:
—Tajtzin, asu taja tikwikak, shinechilwi kan tiktalijtuk wan niaw nalkwi.
16 Yeshu kilwia:
—Maryam!
Yaja muishkwepa wan kilwia tik itaketzalis ne Yudayujmet:
—Rabuni!
Kineki ina "nutamachtiani!" 17 Yeshu kilwia:
—Maka shu-shinechmatuka, ika inteuk nitejkutuk itech Nuteku. Shu shikinhilwi ne nukniwan ka nitejku kan nemi ne Nuteku wan Anmuteku wan Nuteut wan Anmuteut.
18 Ajsi Maryam ipal Magdala kinnawatia ne mumachtianimet ka nikitztuk ne Tajtzin, wan ini tay kilwijtuk.
Muyulkwi
24 Sujsul peyna tik ne achtu tunal pal ne semanaj, ne siwatket kiwikaket ne pajtipuputuka ne kiekchijtuyat, wan ajsiket ne shaput. 2 Kiajsiket ne tet ijkwantuk wejka ne iten ne shaput. 3 Kwak kalakket, inte kiajsiket ne imikini ne tajtzin Yeshu. 4 Ishpuyawit ipanpa uni, wan kwakuni kitaket ume takat nepa innawak. Ne inkwajkwach tzitzinakat ken takipini. 5 Ne siwatket mumutijket wan muishtapachujket talchi, wan ne takamet kinhilwijket:
—Ken ka ankitemuat ne yultuk itzalan ne miktiwit? 6 Inte nemi nikan asunte muketzki. Shikelnamikikan ken metzinhilwij kwak nemituyayuk tik Galilaya, 7 ina:
"Ne Itelpuch ne Takat nemi pal mutemaka iwan tateyekchiwanimet; yawit kicruzpiluat wan kwak panut yey tunal yawi muyulkwi."
8 Wan kielnamikket tay inatuya.
9 Wan kwak kisket tik ne shaput wan mukwepket, kinhilwijket ne majtakti-se wan muchi ne sejseuk tay panutuk. 10 Yejemet Maryam ne ipal Magdala, wan Yojana, wan Maryam ne inan Yakob, wan ne sekit inwan. Pejket kinhilwiat ne tijtitanijtuk, 11 wan yejemet inaket ka chachalakat wan te kinyulmatket. 12 Ne Pedro ajkewki wan kiski mutalua hasta ne shaput, muishpiluj wan sema kitak ne ikwenyu. Wan kwak kiski ka né, ishpuyawik tetekia sea.
Ne Bibliaj Tik Nawat · © 2008, 2012 Jan Morrow