Revised Common Lectionary (Semicontinuous)
Kalaki tik Yerushalem
28 Wan kwak inatuk ini, tejkuk tik ne ujti ka Yerushalem, 29 wan kwak tzinkiski Bet-Page wan Bet-Anya né kan itukay Olivajtepet, kintuktij ume pal ne mumachtianimet, 30 ina:
—Shumet uni techan né anmumelawka, wan kwak anhajsit ka né anyawit kiajsit se burrojchin ilpituk ne ijpak inte keman mutalij aka: shiksutumakan wan shalwikakan. 31 Wan su aka metzintajtanilia taika ankisutumat, shinakan ika ne itekuyu muneki.
32 Wan ne mutuktijtiwit yajket wan kiajsiket ken kinhilwij. 33 Kwak kisutumat nemit ne burrojchin, ne itejtekuyu kinhilwijket:
—Taika ankisutumat ne burrojchin?
34 Yejemet inaket ika ne itekuyu muneki. 35 Wan kalwikaket wan ajsiket kan nemituya Yeshu, wan kitamutilijket inkwajkwach ne burrojchin, wan kitalijket ne Yeshu ijpak ne burroj. 36 Ijpak ne ujti kan yajki, kichayawket inkwajkwach talchi. 37 Né tik ne Olivajtepet kwak yawit ajsit kan pewat temut katani, muchi ne mumachtianimet pejket pajpakit wan inat ka wey ne Teut wan tzajtzit wey ipanpa muchi ne itajtajpal ne kitztiwit, 38 wan inat:
—Teutasujtatuk ne witz, ne tatuktiani tik itukay Tutajwan; ma nejmachnemikan ka ilwikak wan ma inakan ka wey tik ne ajku!
39 Wan sejse pal ne Parishayujmet itzalan ne miaktal kilwijket:
—Tamachtiani, shikinhajwa ne mumujmumachtiani!
40 Wan yaja inak:
—Nimetzinhilwia ka asu tzitzikayaskiat yejemet, tzajtziskiat ne tejtet!
5 Shimumatikan ijtik anmejemet, tay ne nusan ijtik Mawaltijtuk Yeshu, 6 ká:
Kwak tik iweyka Teut
te kitak ken se pal kitzkia
ma kenha ken Teut,
7 sute yaja kikwij iweyka
se tekitini te tatka ipatiw,
muchijki ken se takat
kipia muchi tay kipia takat;
8 mutemultij, muchijki tetakamatini
hasta mikilis, mikilis ijpak cruz.
9 Neka hasta ne Teut kiajkukij
wan kitakulij se itukay
ijpak muchi ne tutujtukay,
10 pal ma mutankwaketzakan muchi
ka ilwikak wan pak tal wan tik miktan,
11 wan ma inakan ka tejkia
ka Yeshu Mawaltijtuk tutajtzin
pal tzitzinaka Teut ne tuteku.
14 Wan kwak ajsik ne horaj, mutalij takwa wan ne tijtitanijtuk nusan, 15 wan kinhilwij:
—Niknekik wan nikelewij nikwa ini Paskwaj anmuwan achtu ma nitaeku, 16 ika nimetzinhilwia ka intea niaw nikwa seuk hasta ma yekawi tik ne itatekimakalis ne Teut.
17 Wan kikwij ne atiluni wan inak panpadiush, wan inak:
—Shikwikan ini wan shikunikan itzalan anmejemet, 18 ika nimetzinhilwia: intea niaw nikuni iayu shukumekat hasta ma wiki ne itatekimakalis ne Teut.
19 Wan kikwij se tamal, inak panpadiush wan kipitzakuj wan kinmakak, wan inak:
—Ini ne nuweyka ne mutemaka anmupal. Shikchiwakan ini pal annechelnamikit.
20 Wan ne atiluni kenha, kwak tamit takwat, ina:
—Ini atiluni ne yankwik sentaketzat iwan ne nuesyu ne mushinia anmupal. 21 Melka uni, nikan kan titakwat tinemit, nikita ne imey ipal ne nechtemaka! 22 Ika tejkia ka yawi ne Itelpuch ne Takat ken nemi tuktijtuk. Melka uni, ay! uni takat ká temaka!
23 Wan pejket mutajtaniliat ijtik yejemet ká yawi kichiwa uni.
24 Nusan pejket muishtenewat itzalan yejemet ika kinekituyat kimatit katiawel muita ka yawi muchiwa ne mas wey. 25 Yaja kinhilwij:
—Ne tatuktianimet ipal ne tejtechan muchiwat tajtzitzinmet, wan ijtik yejemet ne welit wey munutzat yekchiwanimet. 26 Anmejemet inte ijkiuni. Ne mas wey ma muchiwa ken se chikitik, wan ne tatuktia ken se tekiti ipal ne sejseuk, 27 ika ká ne mas wey, ne mutalia takwa ush ne tekitini? Anka inte ne mutalia takwa? Melka uni, naja ninemi anmutzalan ken ne tekitini.
28 Anmejemet ne naktiwit nuwan ijtik muchi numujmuejekulis, 29 wan naja nimetzintalilia, ken ne Nuteku nechtalilij, se tatekimakalis 30 pal ma shisentakwakan nunawak tik nutatekimakalis wan ma shimutalikan ijpak kujkuijpal kintuktiat ne majtakti-ume tribuj ipal Israel.
31 Shimon, Shimon! Shikita ka ne Tenewani kitajtan pal metzinpia pal weli metzintzejtzelua ken ne tawial. 32 Naja niktajtan ne Teut mupanpa ma inte shikpulu ne mutayulmatilis wan ma shitami timuishkwepa tikinpalewia ne mukniwan.
33 Yaja kilwij:
—Tajtzin, nina ka niasneki muwan melka techtzakwat wan hasta su techmiktiat.
34 Inak:
—Pedro, naja nimetzilwia ka tik ini tunal inte yawi takwika ukichtijlan achtu ma shina yeshpa ka inte tinechishmati!
35 Wan kinhilwij muchi:
—Kwak nimetzintitanij wan nimetzinhilwij ma inte shikwikakan nian se anmuchuspaj nian anmutanaj nian anmukak, metzinchijki faltaj tatka?
Yejemet inaket:
—Nian tatka.
36 Kinhilwij:
—Ashan kia: ká kipia se ichuspaj, ma kiwika wan ma kikwi ne itanaj nusan; wan ká inte kipia ma kinamaka ne iwipil wan ma kikua se espadaj, 37 ika nimetzinhilwia ka tay ne nemi ijkwilujtuk yawi tami yekawi nuwan, wan ina ijkiuni: "Wan mupujki itzalan ne kichijtiwit tay inteyek". Ika tay ne muijkwiluj nupanpa nusan kipia tamilis.
38 Yejemet inaket:
—Tajtzin: ejespadaj nikan nemit ume.
Yaja kinhilwij:
—Ipani.
Tik Olivajtepet
39 Mukwepki tik ne Olivajtepet ken mujmusta. Ne mumachtianimet nusan yajket iwan. 40 Kwak ajsik ka né, kinhilwij:
—Shiktajtanikan ne Teut ma inte shikalakikan ijtik taejekulis.
41 Wan ajkewki unisan inte wejka, semaya kanka weliskia mutamuta se tetzin, wan mutankwaketzki ka né wan pejki kinutza ne Teut, 42 ina:
—Nuteku, asu tikneki, shinechishtili ini atiluni. Man inte ken naja nikneki asunte ken tina taja.
43 Kiski se tanawatiani ipal ne ilwikak kimaka itajpal, 44 wan kipishki wey yulkakasiwilis, wan pejki kinutza ne Teut kenhayuk, wan mitunij ken chichipikaskia esti ijpak ne tal. 45 Kwak tamik kinujnutza ne Teut, muketzki wan yajki kan nemituyat ne mumachtianimet, wan kinhajsik kuchit iwan yulkukulis, 46 wan kinhilwij:
—Ken ka ankuchit? Shimuketzakan wan shiktajtanikan ne Teut ma inte shikalakikan ijtik taejekulis.
47 Yaja taketzayuk kwak walajsiket miak; wan ne se ipal ne majtakti-ume itukay Yuda nejnenki inhishpan; wan ajsik itech Yeshu kitennamiki. 48 Yeshu kilwij:
—Yuda, pal titemaka ne Itelpuch ne Takat tinechtennamiki.
49 Ne nemituyat inawak tachishket tay yawi muchiwa, wan inaket:
—Tajtzin, timusumat iwan ne espadaj?
50 Wan se yejemet kichaluj ne itekitini ne weypalej wan kikutun ne inakas. 51 Ne Yeshu nankilij:
—Ma naka.
Wan kimatukak ne inakas ne takat wan kipajtij. 52 Yeshu kinhilwij muchi ne weypalejmet wan tatuktianimet ipal ne teupan wan ne noymet ne ajsiket:
—Anwalajtiwit ken ankikwit se techtekini iwan majmachej wan kwajkwawit? 53 Mujmusta ninentuk anmutzalan tik ne teupan wan te ankitalijket nujpak anmumejmey. Pero ini ne anmuhoraj wan ne takumi weli wey.
Yeshu ilpituk
54 Kitzkijket wan kiwikaket, wan kikalaktijket ichan ne weypalej. Pedro yajki iipan wan nejnenki wejka. 55 Kiuntuijket se tit tik itajku ne tenkal wan musentalijket, wan ne Pedro itzalan yejemet. 56 Se siwapil muetztuk iten ne tit, kwak kitak Pedro, nakak tachia, kwakuni inak:
—Ini nusan nemituya iwan.
57 Yaja inak ka inte, ina:
—Te nikishmati, siwat.
58 Shan seuk kitak wan taketzki:
—Taja nusan se pal yejemet.
Wan Pedro inak:
—Te takat, naja inte!
59 Wan kwak panutuk achka se horaj, ukseuk ina katka ka kia, ina:
—Tejkia, ini nusan nemik iwan, ika yaja nusan ipal Galilaya!
60 Pedro inak:
—Takat, intesu nikmati tay tina.
Wan yaja taketzayuk kwak takwikak se tijlan, 61 wan ne Tajtzin muishkwepki kita Pedro, wan kielnamik ne Pedro ne ipajpalabraj, ken kilwij ka tik ini tunal kwak teuk takwikak ne ukichtijlan tiaw tina yeshpa ka inte tinechishmati, 62 wan kiski, wan chukak chukak.
63 Ne takamet ne kipiatuyat Yeshu pejket ajkawetzkat wan kiwitekit, 64 wan kishtzakket wan pejket kitajtaniliat:
—Shitanutza ken se taketzani! Shina ká ne metzchaluj!
65 Wan kukujtaketzket wan kilwijket miak ijkiuni.
Ishpan ne kalpuli
66 Kwak tatwik, mutepewket ne noymet ipal ne techan, ne weypalejmet wan ne tajkwiluanimet, wan kiwikaket tik ne inkalpuli, 67 wan kitajtaniliat:
—Shitechilwi, taja ne Mawaltijtuk?
Kinhilwij:
—Asu nimetzinhilwia, anyawit inat ka inte ijkia; 68 asu nimetzintajtanilia, inte annankilisket. 69 Ashan nemis ne Itelpuch ne Takat muetztuk ka imayekkan ne Teut Weli Wey.
70 Kwakuni inaket muchi:
—Yajika taja ne Itelpuch ne Teut?
Yaja kinhilwij:
—Anmejemet inat ka naja ne!
71 Yejemet inaket:
—Tea timunekit ma aka ina tatka ika tikaktiwita itech iten!
Ishpan Pilatus wan Herodes
23 Wan muketzket muchi wan kiwikaket itech Pilatus. 2 Pejket kitenewat. Inat:
—Yajini tikajsiket kimajmalia ne tutechan, wan kilwia ma inte kimaka tumin ne taltikpaktuktiani, wan ina ka yajaya ne Mawaltijtuk, ne tatuktiani.
3 Pilatus kitajtanilij:
—Taja tiintatuktiani ne Yudayujmet?
Yaja nankilij:
—Taja tina!
4 Pilatus kinhilwij ne weypalejmet wan ne miaktal:
—Itech ini takat inte nikajsi tatka pal nina ka kichijtuk.
5 Yejemet inaket ka kia, inat:
—Kinmachtia ne Yudayujmet nujme pal kikumuntia ne techan; pejki tik Galilaya wan ajsik hasta nikansan.
6 Kwak Pilatus kinkakik, kitajtan su yaja ipal Galilaya 7 wan kwak kimatki ka nemi itan ne itatuktilis Herodes kititanij itech Herodes, ika yajuni nusan nemituya Yerushalem tik uni tujtunal.
8 Ne Herodes pakik sujsul kwak kitak Yeshu, ika ikman kielewijtuya kita ipanpa muchi tay takakik. Wan kinekituya ma kichiwa se pal muishmati pal yaja kita. 9 Kitajtani katka iwan miak palabraj wan yaja inte nankilij tatka. 10 Kenhayuk ne weypalejmet wan ne tajkwiluanimet kitenewat katka sujsul. 11 Herodes wan ne tasumanimet ne nemituyat iwan inaket ka inte tatka ipatiw, wan pal kipajpakiliat kitalilijket ikwajkwach yektzin, wan kititanijket itech Pilatus. 12 Kwakuni Herodes wan Pilatus mukwepket ajamigoj, melka achtu muijishtuyat ne se wan ne seuk.
13 Kwak Pilatus tamik kalinnutza ne weypalejmet wan ne tatuktianimet wan ne chinamit, 14 kinhilwij:
—Ankalwikatiwit nutech ini takat ken se kimajmalia ne techan, wan naja nikan niktajtanilijtuk anmuishpan wan inte nikajsituk tatka itech ini takat pal nina ka yaja kichijtuk ken ankitenewat, 15 wan Herodes nusan inte, ika yaja kititanij tutech, wan shikita, inte kichijtuk tatka pal tinat ma miki. 16 Yajika niaw nikwiteki wan ma yawi. (17) .
18 Pejket tzajtzajtzit:
—Ini inte, shikchululti mas yek ne Bar-Aba!
19 Yajane se tenejtuk ká kitzaktuyat ipanpa sejse muketztiwit tik ne techan wan ipanpa temiktilis. 20 Pilatus kinnutzki senpa ika kinekituya kichulultia ne Yeshu; 21 yejemet tzajtzit tzajtzit, inat:
—Shikcruzpilu, shikcruzpilu!
22 Uksenpa kinhilwij:
—Taika? Tay kichijtuk ini tay inte yek? Inte nikajsituk tatka pal ma miki. Ma nikwiteki wan ma yawi.
23 Yejemet kenhayuk tzajtzit wan kipitziniat katka pal kitajtanit ma mucruzpilu, wan sujsul miak ijkiuni; 24 wan Pilatus tatuktij ma muchiwa ken kitajtanit. 25 Kichulultij tel ne mutzaktuya ipanpa ne muketztiwit wan ipanpa temiktilis, ken tajtanit, wan kiajkaw ma muchiwa iwan ne Yeshu ken kinekituyat.
Yeshu ijpak ne cruz
26 Kwak kiwikaket nemit, kalkwijket se takat itukay Shimon, se ipal Kurene, ne witz tik ne kojtan, ma kiwika kuteputzwijtuk ne cruz iipan ne Yeshu. 27 Iwan nejnenket miak ipal ne techan wan miak siwat ne chukat katka wan mutajtaweliat. 28 Ne Yeshu muishkwepki pal kinhita wan kinhilwij:
—Sijsiwatket ipal Yerushalem, maka shichukakan nupanpa, shichukakan anmupanpa wan inpanpa ne anmupilawan, 29 ika witzet tujtunal kwak yawit inat: "Suertej kipiat ne inte welit kipiat kukunet wan ne ijijti inte tapunijtiwit wan ne chijchichiwal inte tachichitiwit." 30 Kwakuni yawit pewat kilwiat ne tejtepet "shiwetzikan tujpak!", yawit kilwiat ne tepetzitzin "shitechpachukan!", 31 ika asu kienej kichiwat iwan ne kwawit selek, tay kichiwasket iwan ne waktuk!
32 Nusan muwikat katka uk ume tateyekchiwani pal kinmiktiat iwan, 33 wan kwak ajsiket kan itukay Ne Tzuntekumat, ikuni kincruzpilujket yaja wan ne tateyekchiwanimet, ne se ka iyekkan wan ne seuk ka ukse ladoj. 34 Yeshu inak:
—Nuteku, shikintapupulwi, yejemet inte kimatit tay kichiwat.
Kitakutuntijket ne ikwajkwach; kitamutaket chivos pal kitat ká ipal.
35 Muchi muketzket wan nakaket tachiat. Wan ne tatuktianimet pejket kipakiliat, inat:
—Kinpalewij sejseuk. Ma mupalewi yajasan asu yaja ne Mawaltijtuk, ne ishpejpentuk ipal ne Teut!
36 Ne tasumanimet nusan ajkawetzkaket. Yejemet witzet katka kitakuliat yayushukuk, 37 wan inat katka:
—Asu taja tiintatuktiani ne Yudayujmet, shimupalewi!
38 Nusan nemituya ijkwilujtuk ijpak itzuntekun ijkini: "Ini intatuktiani ne Yudayujmet."
39 Se pal ne tateyekchiwanimet mukupilujtiwit pejki kukujtaketza, ina:
—Taja inte ne Mawaltijtuk? Shimupalewi, wan shitechpalewi!
40 Nankilij ne seuk, kiajwak yajuni wan inak:
—Nian taja timajmawi ipanpa ne Teut, taja ká tinemi kenha? 41 Melka nemi yek ma titashtawikan tejemet ipanpa tay tikchijtiwit, ini te kichijtuk tatka!
42 Wan kilwij Yeshu:
—Shinechelnamiki kwak tiajsi tik mutatekimakalis!
43 Wan kilwij:
—Kia nimetzilwia, tik ini tunal tiaw tinemi nuwan ijtik ne Yekmil.
44 Wan ajsik ne tajkutunal wan kunyuakiski nujme ne tal hasta yey horaj ipal ne teutak. 45 Kwaluk tunal. Tzayanik itajku ne kwachtzakka tik ne teupantzin. 46 Wan ne Yeshu pejki tzajtzi, inak:
—Nuteku, tik mumey nikajkawa nuijiu!
Kwak tamik ina uni, sewik.
47 Kwak ne sentzuntuktiani kitak tay panutuk, inak wey ne Teut wan inak:
—Tejkia ka yek ini takat.
48 Wan muchi ne musentepewtiwit tachiat, kwak tamiket kitat tay panutuk, kitasket inhejelpan wan yajket. 49 Mutalijket wejka wan kitaket muchi uni ne kishmatit Yeshu, wan ne siwatket ipal Galilaya ne iwan senyajtiwit.
Ne shaput
50 Né nemik se takat itukay Yosep, se pal ne kalpuli, se yek takat ne kichiwa sema tay yek. 51 Yajini inte kitztuya yek tay ne taketzket wan kichijket. Yaja se ipal Ramatay tik Yudaya; yaja se tejchia ma wiki ne itatekimakalis ne Teut. 52 Yajini ajsik itech Pilatus pal kitajtani ne mikini, 53 wan kikutemultij wan kikimiluj tik se ikwenyu, wan kitalij tik se shaput tik tet kan inteuk mutekatuk aka. 54 Uni ne tunal ipal tajshitilis kwak yawi pewa ne sewilis.
55 Yajket iipan ne siwatket ne walajtuyat iwan tik Galilaya, wan kitaket ne shaput, wan tachishket ken mutekak ne mikini. 56 Walmukwepket wan kiajshitijket pajtipuputuka. Musewijket tik ne tunal ipal sewilis ken nemi tuktijtuk.
Ishpan Pilatus wan Herodes
23 Wan muketzket muchi wan kiwikaket itech Pilatus. 2 Pejket kitenewat. Inat:
—Yajini tikajsiket kimajmalia ne tutechan, wan kilwia ma inte kimaka tumin ne taltikpaktuktiani, wan ina ka yajaya ne Mawaltijtuk, ne tatuktiani.
3 Pilatus kitajtanilij:
—Taja tiintatuktiani ne Yudayujmet?
Yaja nankilij:
—Taja tina!
4 Pilatus kinhilwij ne weypalejmet wan ne miaktal:
—Itech ini takat inte nikajsi tatka pal nina ka kichijtuk.
5 Yejemet inaket ka kia, inat:
—Kinmachtia ne Yudayujmet nujme pal kikumuntia ne techan; pejki tik Galilaya wan ajsik hasta nikansan.
6 Kwak Pilatus kinkakik, kitajtan su yaja ipal Galilaya 7 wan kwak kimatki ka nemi itan ne itatuktilis Herodes kititanij itech Herodes, ika yajuni nusan nemituya Yerushalem tik uni tujtunal.
8 Ne Herodes pakik sujsul kwak kitak Yeshu, ika ikman kielewijtuya kita ipanpa muchi tay takakik. Wan kinekituya ma kichiwa se pal muishmati pal yaja kita. 9 Kitajtani katka iwan miak palabraj wan yaja inte nankilij tatka. 10 Kenhayuk ne weypalejmet wan ne tajkwiluanimet kitenewat katka sujsul. 11 Herodes wan ne tasumanimet ne nemituyat iwan inaket ka inte tatka ipatiw, wan pal kipajpakiliat kitalilijket ikwajkwach yektzin, wan kititanijket itech Pilatus. 12 Kwakuni Herodes wan Pilatus mukwepket ajamigoj, melka achtu muijishtuyat ne se wan ne seuk.
13 Kwak Pilatus tamik kalinnutza ne weypalejmet wan ne tatuktianimet wan ne chinamit, 14 kinhilwij:
—Ankalwikatiwit nutech ini takat ken se kimajmalia ne techan, wan naja nikan niktajtanilijtuk anmuishpan wan inte nikajsituk tatka itech ini takat pal nina ka yaja kichijtuk ken ankitenewat, 15 wan Herodes nusan inte, ika yaja kititanij tutech, wan shikita, inte kichijtuk tatka pal tinat ma miki. 16 Yajika niaw nikwiteki wan ma yawi. (17) .
18 Pejket tzajtzajtzit:
—Ini inte, shikchululti mas yek ne Bar-Aba!
19 Yajane se tenejtuk ká kitzaktuyat ipanpa sejse muketztiwit tik ne techan wan ipanpa temiktilis. 20 Pilatus kinnutzki senpa ika kinekituya kichulultia ne Yeshu; 21 yejemet tzajtzit tzajtzit, inat:
—Shikcruzpilu, shikcruzpilu!
22 Uksenpa kinhilwij:
—Taika? Tay kichijtuk ini tay inte yek? Inte nikajsituk tatka pal ma miki. Ma nikwiteki wan ma yawi.
23 Yejemet kenhayuk tzajtzit wan kipitziniat katka pal kitajtanit ma mucruzpilu, wan sujsul miak ijkiuni; 24 wan Pilatus tatuktij ma muchiwa ken kitajtanit. 25 Kichulultij tel ne mutzaktuya ipanpa ne muketztiwit wan ipanpa temiktilis, ken tajtanit, wan kiajkaw ma muchiwa iwan ne Yeshu ken kinekituyat.
Yeshu ijpak ne cruz
26 Kwak kiwikaket nemit, kalkwijket se takat itukay Shimon, se ipal Kurene, ne witz tik ne kojtan, ma kiwika kuteputzwijtuk ne cruz iipan ne Yeshu. 27 Iwan nejnenket miak ipal ne techan wan miak siwat ne chukat katka wan mutajtaweliat. 28 Ne Yeshu muishkwepki pal kinhita wan kinhilwij:
—Sijsiwatket ipal Yerushalem, maka shichukakan nupanpa, shichukakan anmupanpa wan inpanpa ne anmupilawan, 29 ika witzet tujtunal kwak yawit inat: "Suertej kipiat ne inte welit kipiat kukunet wan ne ijijti inte tapunijtiwit wan ne chijchichiwal inte tachichitiwit." 30 Kwakuni yawit pewat kilwiat ne tejtepet "shiwetzikan tujpak!", yawit kilwiat ne tepetzitzin "shitechpachukan!", 31 ika asu kienej kichiwat iwan ne kwawit selek, tay kichiwasket iwan ne waktuk!
32 Nusan muwikat katka uk ume tateyekchiwani pal kinmiktiat iwan, 33 wan kwak ajsiket kan itukay Ne Tzuntekumat, ikuni kincruzpilujket yaja wan ne tateyekchiwanimet, ne se ka iyekkan wan ne seuk ka ukse ladoj. 34 Yeshu inak:
—Nuteku, shikintapupulwi, yejemet inte kimatit tay kichiwat.
Kitakutuntijket ne ikwajkwach; kitamutaket chivos pal kitat ká ipal.
35 Muchi muketzket wan nakaket tachiat. Wan ne tatuktianimet pejket kipakiliat, inat:
—Kinpalewij sejseuk. Ma mupalewi yajasan asu yaja ne Mawaltijtuk, ne ishpejpentuk ipal ne Teut!
36 Ne tasumanimet nusan ajkawetzkaket. Yejemet witzet katka kitakuliat yayushukuk, 37 wan inat katka:
—Asu taja tiintatuktiani ne Yudayujmet, shimupalewi!
38 Nusan nemituya ijkwilujtuk ijpak itzuntekun ijkini: "Ini intatuktiani ne Yudayujmet."
39 Se pal ne tateyekchiwanimet mukupilujtiwit pejki kukujtaketza, ina:
—Taja inte ne Mawaltijtuk? Shimupalewi, wan shitechpalewi!
40 Nankilij ne seuk, kiajwak yajuni wan inak:
—Nian taja timajmawi ipanpa ne Teut, taja ká tinemi kenha? 41 Melka nemi yek ma titashtawikan tejemet ipanpa tay tikchijtiwit, ini te kichijtuk tatka!
42 Wan kilwij Yeshu:
—Shinechelnamiki kwak tiajsi tik mutatekimakalis!
43 Wan kilwij:
—Kia nimetzilwia, tik ini tunal tiaw tinemi nuwan ijtik ne Yekmil.
44 Wan ajsik ne tajkutunal wan kunyuakiski nujme ne tal hasta yey horaj ipal ne teutak. 45 Kwaluk tunal. Tzayanik itajku ne kwachtzakka tik ne teupantzin. 46 Wan ne Yeshu pejki tzajtzi, inak:
—Nuteku, tik mumey nikajkawa nuijiu!
Kwak tamik ina uni, sewik.
47 Kwak ne sentzuntuktiani kitak tay panutuk, inak wey ne Teut wan inak:
—Tejkia ka yek ini takat.
48 Wan muchi ne musentepewtiwit tachiat, kwak tamiket kitat tay panutuk, kitasket inhejelpan wan yajket. 49 Mutalijket wejka wan kitaket muchi uni ne kishmatit Yeshu, wan ne siwatket ipal Galilaya ne iwan senyajtiwit.
Ne Bibliaj Tik Nawat · © 2008, 2012 Jan Morrow