Revised Common Lectionary (Semicontinuous)

Pag-ampo alang sa Kaluwasan

Nagsaad ang Dios sa Pagluwas sa Israel

43 Apan karon mao kini ang giingon sa Ginoo nga nagbuhat kanimo, O Israel, “Ayaw kahadlok kay luwason ko gayod ikaw.^[a] Gitawag ko ikaw sa imong ngalan, ug akoa ka. ² Kon moagi ka sa tubig, mouban ako kanimo. Kon motabok ka sa mga suba dili ka malumos. Kon moagi ka sa kalayo, dili ka mapaso; ang dilaab niini dili makalamoy kanimo. ³ Kay ako ang Ginoo nga imong Dios, ang Balaang Dios sa Israel, nga imong Manluluwas. Itugyan ko sa ubang nasod ang Ehipto, Etiopia,^[b] ug Seba puli kanimo. ⁴ Itugyan ko ang ubang katawhan puli kanimo, tungod kay bililhon ug dungganon ka alang kanako, ug tungod kay gihigugma ko ikaw. ⁵ Ayaw kahadlok kay kauban mo ako. Tigomon ko ang imong mga kaliwat gikan sa sidlakan ug kasadpan. ⁶ Ingnan ko ang mga nasod sa amihan ug habagatan nga pasagdan ang imong mga kaliwat nga mobalik sa ilang yuta, nga papaulion sila gikan sa layong mga dapit. ⁷ Sila ang mga katawhan nga akong gitawag; gibuhat ko sila alang sa akong kadungganan.”

Si Timoteo ug si Epafroditus

¹⁹ Nagasalig ako kang Ginoong Jesus nga sa dili madugay mapaanha ko diha kaninyo si Timoteo, aron malipay usab ako kon masuginlan niya ako bahin sa inyong kahimtang. ²⁰ Siya lang ang akong nasayran nga nagahandom alang sa inyong kaayohan sama kanako. ²¹ Kay ang uban, ang ila lang kaugalingon nga kaayohan ang ilang gihunahuna ug dili ang kabubut-on ni Jesu-Cristo. ²² Apan nasayran ninyo ang maayong pamatasan ni Timoteo. Gipakasama ko siya nga akong anak sa iyang pagtabang kanako sa pagsangyaw sa Maayong Balita. ²³ Nagalaom ako nga mapaanha ko dayon siya diha kaninyo kon masayran ko na ang resulta sa akong kaso. ²⁴ Ug nagasalig gayod ako sa Ginoo nga sa dili madugay makaanha usab ako diha.