Revised Common Lectionary (Semicontinuous)
16 Yajika ashan tejemet te tikishmatit aka tik inakayu. Hasta su tikishmatket tik inakayu ne Mawaltijtuk, ashan intea tikishmatit. 17 Yajika, su se ijtik ne Mawaltijtuk, se yankwik; ne palikman muelkaw, muchijki yankwik.
18 Muchi kisa itech ne Teut. Ne Teut techpata ipal, itech ne Mawaltijtuk, wan techmaka tekitilis ipal tapatalis. 19 Kiane, ne Teut kipatak yajki ne taltikpak ijtik ne Mawaltijtuk. Yaja tesu kinhilwia keski kiwikiliat; tuwan kichijtuk ne sentaketzat ipal tapatalis. 20 Yajika, titanawatiat ipanpa ne Mawaltijtuk, ken su ne Teut mutajtaweliskia tutech. Titajtanit ipanpa ne Mawaltijtuk: shimupatakan ipal ne Teut. 21 Ne te kishmatki tateyekchijtuk, kikweptuk tateyekchijtuk tupanpa, pal tejemet timuchiwat tamelakchiwalis ipal Teut ijtik yaja.
Ne ichkat pulijtuk
15 Waltzinkisat katka muchi ne tumintepewanimet wan tateyekchiwat kikakit Yeshu, 2 wan kikinakat ne Parishayujmet wan ne tajkwiluanimet. Inat katka:
—Yajini nejnemi iwan tateyekchiwat wan sentakwa inwan!
3 Yaja kinhilwij ini casoj; ina:
Ne casoj ipal ne takapiltzin pulijtuk
11 Kwakuni inak:
—Se takat kipiatuya ume itelpuch, 12 wan ne mas chikitik kilwij ne iteku:
"Nuteku, shinechmaka ne takutun ipal mupalwan."
Kimajmakak sejse itakutun ipal tay kipiatuya. 13 Wan kwak panutiwit chiupi tunal kisentepew muchi wan yajki ne chinpe ka se tal sujsul wejka wan ikuni kisentaluj muchi ipalwan kichiwa muchi tay kineki. 14 Kwak kitzunpulujtuk muchi, né walaj se mayan hombron wan yajane pejki muneki, 15 wan yajki wan musaluj itech se nepa chanej wan yajuni kituktij ka itajtal kitakwaltia ne ikujkuyan. 16 Wan kielewiskia kitema ne iijti iwan ne tutumuch ne kikwa ne kujkuyamet, wan te aka kimaka tatka. 17 Pejki yultaketza wan inak:
"Keski takat tekitit ipal nuteku, wan kipiat intamal, wan nikan nikselia mayan! 18 Niasneki ichan nuteku wan niaw nikilwia: Nuteku, nikchijki tay teyek ipal ne ajku wan muishpan. 19 Intea weli nimunutza mukunew. Semaya shinechchiwa ken se mutakaw."
20 Wan ajkewki wan ajsik ichan iteku. Kwak ajsi yawi, kitak ne iteku wan kikukuj iyulu, wan yajki mutalua kinapalua wan kitennamiki. 21 Ne telpuch kilwij:
"Nuteku, nikchijki tay teyek ipal ne ajku wan muishpan. Intea weli nimunutza mukunew."
22 Ne iteku kintuktij ne itejtekitini kienej, inak:
"Shimunelwikan, shikishtikan ne yek wipil wan shiktalilikan, shikishtukilikan ne imapipil se anilloj wan shiktalikan kakti tik ne ijikshi. 23 Wan shalwikakan ne wakashkunet tumawak; shikmiktikan pal titakwat wan ma titatwat, 24 ika ini nukunew miktuya, wan muyulkwijtuk! Pulijtuya, wan muajsituk!"
Wan pejket tatwat.
25 Ne achtu telpuch nemituya tik ne kojtan, wan kwak ajsik walaj, tzinkiski ne kal wan takakik ken tatzutzunat wan mijtutiat, 26 wan kinutzki se tekitini wan kitajtanilij tay uni. 27 Yaja kilwij:
"Walajtuk ne muikaw, wan muteku kimiktijtuk ne wakashkunet tumawak ika ajsik wan nemi yek."
28 Kwakuni kwalanik wan te kinekituya kalaki. Kiski ne iteku wan mutajtawelij iwan. 29 Yajuni nankilij wan kilwij ne iteku:
"Ashan miak shiwit nitekiti mupal wan te keman nikchijki tatka asunte muchi tay tinechtuktij; wan inte keman tinechmakak nian se cabrojchin pal nitatwa iwan nukujkunpawan! 30 Kwak walajtuk yajuni ne kitzunpuluj ne mupalwan iwan siwapalamet, tikmiktij ne wakashkunet tumawak ipal."
31 Yaja kilwij:
"Pipil, taja senpa tinemi nuwan wan muchi tay nupal mupal nemi. 32 Nemi pal titatwat wan tipajpakit ika uni muikaw miktuya wan yultuka, wan nemituya pulujtuk wan muajsituk!"
Ne Bibliaj Tik Nawat · © 2008, 2012 Jan Morrow