Revised Common Lectionary (Semicontinuous)

²³ Shina nijpi Pedroca, pai poźacun huasiman yaicuchishpami, chai tutaca chaipi pacarichirca.

Pedroca Corneliopaj huasimanmi rishca

Cayandij punlla Pedro ricujpica, Jopepi causacuj maijan crijcunapish paicunahuanmi rircacuna.

²⁴ Cati punllami, Cesareaman chayarcacuna. Cornelioca, paipaj huasi ucupuracunatapish, paihuan alli apanacujcunatapish tandachishpami shuyacushca carca. ²⁵ Corneliopaj huasiman Pedro chayajpica, paica tupanaman llujshishpami, Pedropaj alli nishpa, pambacama cumurirca. ²⁶ Ashtahuanpish Pedroca:

–Shayari, ñucapish can shinallataj runallamari cani– nishpami jatarichirca.

²⁷ Shina nishpa parlanacuihuan huasi ucuman yaicushpaca, achcacuna tandanacushcatami ricurca. ²⁸ Chaipimi Pedroca, paicunataca cashna nirca:

–Ñucanchij judiocunata Mandashcapica, mana ñucanchijpura runacunahuanca ama tandanacuchun ninmi. Paicunapaj huasimanpish ama yaicuchun ninmi. Chaitaca cancunallataj allimi yachanguichij. Ñucanchij judiocunaca cancunataca, yanga runacunalla cashcata yuyajcuna cajpimi, Taita Diosca, ‘Paicunapish mana mapachu’ nishpa huillarca. ²⁹ Chaimantami, can cachashca runacuna pushanaman chayajpica, imata mana nishpa shamurcanilla. ¿Imapajchari cayahuarcanguichij?– nircami.

³⁰ Shina nijpi Cornelioca, cashnami nirca:

–Ñami chuscu punlla tucun, ñucaca cunan shinallataj quimsa horas chishitami, cai ñuca huasipi ayunashpa Diosta mañacurcani. Ñuca mañacujpica, lamyacuj churanata churashca runa, ñapish ricurircallami. ³¹ Paimi cashna nirca: “Cornelio, Taita Diosca, can mañashcata uyashcami. Can tucui imalla allicunata rurashcatapish ricushcami. ³² Cunanca, Pedro nishca Simonta Jopemanta pushanaman cachai. Paica, carata c'acushpa ñutujllata ruraj Simonpaj huasipimi poźacun. Chai huasica, mama cucha c'uchupimi.” ³³ Chaimantami cantaca, pushanaman cacharcani. Allitaj shamuparcangui. Cunanca, tucuicuna Taita Diospaj ñaupajpimi canchij. Taita Dios canta tucui imallata ñucanchijman huillachun cachashcata huillapailla, uyashun ninchijmari– nircami.