Revised Common Lectionary (Semicontinuous)
12 Tejemet tikpiat ini tejchialis wan yajika titanutzat melaknaj, 13 wan tesu ken Moshe kitalia se ikwenyu ijpak ne iishkalyu pal ma te tachiakan ne Israeltakamet ka yawi tami tay ne puliwi, 14 wan takwawayatiwit ne intamatilis, ika hasta ne tunal pal ashan uni ikwenyu kwak amataketzat ne sentaketzat palikman naka wan te muishtia (ika tik ne Mawaltijtuk tami). 15 Wan hasta ashan, kwak amataketzat tay ipal Moshe, naka se ikwenyu ijpak ne inyulu. 16 Melka uni, kwak muishkwepa itech ne Tajtzin, ne ikwenyu muishtis. 17 Ne Tajtzin ne Ijiutzin. Kan ne iijiutzin ne Tajtzin, tamakishtilis. 18 Ijtik muchi tejemet ká te tiktzaktiwit tuishkalyu, muita ken tik se vidrioj ne itawilyu ne Tajtzin, wan timupatat wan timukwepat ken sanse tutachialis tzitzinaka mas wan mas ken su kisa itech Tajtzin Ijiutzin.
4 Yajika, tikpiat ini tekitilis ika techpalewijtiwit, wan te tikutiat, 2 sute tinatiwit ka te tiawit tikinayat tatka nian tishpinawat, nian tiawit timuwikat iwan tajtajpewal nian teshijshikulis ipanpa tay ne ipalabraj ne Teut; tiawit tikneshtiat ne tejkia wan ijkiuni muchi yawit kimatit ka tiyejyek tik itachialis ne Teut.
Ne weykapatalis
28 Wan tipan kwak panuket achka chikwey tunal, kinwikak Pedro wan Yojan wan Yakob iwan wan tejkuk ka tepet kinujnutza ne Teut. 29 Wan kwak nemituya tanujnutza, ne itachishka ne ishkalyu muchijki tekenha wan kawanit ne ikwajkwach, 30 wan né nemiket ume takat tajtaketzat iwan. Yejemet Moshe wan Eliya, 31 wan muitat kan yaja tzitzinaka wan pejket tajtaketza ipanpa ken yawi tami tik Yerushalem. 32 Pedro wan ne sejseuk kuchisnekit, wan kwak walisat kitaket ken tzitzinaka wan ne ume takat inawak, 33 wan kwak yejemet kiajkawket, Pedro kilwij Yeshu:
—Tamachtiani, yek ma tinemikan ka nikan, tikchiwakan yey tawipanti, se mupal, se ipal Moshe wan se ipal Eliya.
Wan te kimati tay ina. 34 Kwak yaja taketzayuk muchijki se mishti. Kinkimilua wan kwak kalakket ijtik ne mishti majmawket. 35 Ijtik ne mishti mukakik se ina:
—Ini nutelpuch ishpejpentuk. Yaja shikakikan!
36 Wan kwak tami mukaki uni, Yeshu muajsik isel. Wan yejemet inte taketzket wan te kilwijket aka tatka tay kitztuyat tik uni tujtunal.
Kipajtia se mijmiki
37 Ne ukse tunal kwak temuket, se wey miaktal kinamikket. 38 Wan né tzajtzik se takat ipal ne miaktal ina:
—Tamachtiani, nimetztajtani ma shikita ne nutelpuch ne isel nikpia; 39 shikita, se nawal kitzkia wan pewa tzajtzi, wan ijtzilika wan pupusuka; inte kineki kinaktia wan kiajkawa keluntuk. 40 Nikintajtan ne mumujmumachtiani ma kishtilikan wan te weliket.
41 Yeshu inak:
—Ay, ashan inte kanaj tayulmatilis, muchi kwejkwelnaj! Hasta keman nemi pal ninaka anmutzalan nimetzinselia? Shalwika nikan ne mukunew.
42 Kwak witz ne piltzin, ne nawal kikelun wan kijtzilitzki. Ne Yeshu kiajwak ne iijiu inteyek wan kipajtij ne piltzin wan temakak iwan ne iteku.
Ina tay yawi panu wan pewa ne ujti hasta Yerushalem
43 Muchi ishpuyajket ipanpa keski weli ne Teut wan muchi tay kichiwa. Yaja kilwij ne mumachtianimet:
Ne Bibliaj Tik Nawat · © 2008, 2012 Jan Morrow