Revised Common Lectionary (Semicontinuous)
5 Senpa kwak se weypalej mupejpena ijtik takamet, mutalia ipatka takamet pal muchi tay ipal ne Teut, ma tamaka tejtetakulis ka inmaku tateyekchiwanimet. 2 Yaja weli kipia wey iyulu iwan ne inte kimatit wan ne mushijshikuat ika yaja nusan muyawalua iwan yamanikayu. 3 Wan ipanpa uni, kenha ken tetakulia ipanpa ne tay tateyekchijtuk ne techan, nusan muneki ma kichiwa ipanpa yajasan. 4 Wan se inte kikwi ne honor yaja isel, asunte kwak ne Teut kinutza, kenha ken Aaron. 5 Nusan kiane ne Mawaltijtuk: yaja inte muweychijki isel pal muchiwa weypalej, asunte ne kilwijtuya:
Taja tinupiltzin!
Tik ini tunal nimetzpunijtuk!
6 Ijkiunisan ken ina nusan tik ukse amat:
Taja tipalej pal senpa, ken ne ipalejtal Malkitzedek.
7 Yaja, tik ne tujtunal kwak kipiatuya ne iweyka, tzajtzik wey wan chukak pal tajtani wan mutajtawelia iwan ne weli kimakishtia itech mikilis, wan yaja mukakik ika kitakamati tay nemi tuktijtuk. 8 Melka yaja ne ipiltzin, taekuj pal mumachtia ne tetakamatilis, 9 wan kwak yekawik, muchijki ne taika tiwelit timumakishtiat pal senpa muchi tejemet ká tiktakamatit, 10 wan ne Teut kinutzki pal muchiwa weypalej ken ne ipalejtal Malkitzedek.
Ne ipilawan Zabday
35 Wan ajsit Yakob wan Yojan ne ipilawan Zabday kilwiat:
—Tamachtiani, timetztajtanit ma shitechchiwili se.
36 Wan kinhilwij:
—Tay ankinekit ma nikchiwa?
37 Yejemet kilwijket:
—Ma mutali ne se tejemet ka mumayekkan wan ne seuk ka ukse ladoj muejmuetztuk kan tiaw titzitzinaka.
38 Ne Yeshu kinhilwij:
—Inte ankimatit tay antajtanit! Tay anhinat, ka welit anhatit tik ne atiluni kan niaw niati naja wan welit anmumakat ne ulyuj ne niaw nimumaka?
39 Yejemet kilwijket:
—Tiwelit.
Wan Yeshu kinhilwij:
—Melka anhatisket tik ne atiluni kan niati wan ne ulyuj ne naja nimumaka anmumakasket, 40 inte niweli nimetzinhilwia ma shimutalikan né, asunte semaya ká ipal muajshitilijtuk.
41 Wan kwak ne majtakti takakket, pejket mukwalantiat iwan Yakob wan Yojan, 42 wan ne Yeshu kalinnutzki wan kinhilwia:
—Ankimatit ka ne mumatit ka tatuktiat tik sejse techan muchiwat tajtzitzinmet wan ne weymet kipiat tatuktilis ijpak muchi. 43 Inte yawi ijkiuni ijtik anmejemet: ká anmutzalan kielewiskia muchiwa wey, yawi tekiti anmupal, 44 wan ká muchiwaskia ne achtu, muchiwas anmutekitini, 45 ika nusan ne Itelpuch ne Takat inte walaj pal tatekimaka asunte pal kintekipanua sejseuk wan pal temaka ne ialmaj pal kiane welit mumakishtiat muchi.
Ne Bibliaj Tik Nawat · © 2008, 2012 Jan Morrow