Revised Common Lectionary (Semicontinuous)
1 Ikman ne Teut kinnutzki ne tutejteku itech taketzanimet tik miak partej wan tik miak maneraj; 2 tik ini tijtipan tunal pal ashkan, yaja technutztuk itech ne ipiltzin ká ne kimakak muchi ne iherenciaj wan ká ipanpa kichijki muchi. 3 Yaja ne itawil tzitzinaka wan ne techilwitia ken Yaja. Yaja kiselia muchi iwan ne ipalabraj wey itajpal. Yaja kipupujtuk tay ne titateyekchijtiwit. Mutalijtuk ka imayekkan ne Wey tik ne wejkapan. 4 Muchijtuk sujsul mas yek que ne tanawatianimet, yajika kipia itukay sea yek.
5 Ika intesu ne tanawatianimet ne tatuktianimet ipal uni taltikpak yawi witz ne ipanpa tinat. 6 Se inatuk tik se amat:
Tay ne takat wan taika tikejketza? Tay itelpuch takat, taika tikishtemua?
7 Tikchijki achi mas chikitik que ne tanawatianimet.
tikmakak ken ipremioj tzitzinakalis wan honor;
8 tiktuktij muchi wan tiktalij itan ijikshi.
Kwak kituktij muchi wan kitalij ka itan, inte kiajkaw tatka, muchi kitalij tik ijimey. Ashkan inteuk tikitat muchi tuktijtuk ka itan. 9 Tikitat Yeshu achi muchijtuk mas chikitik que ne tanawatianimet ipanpa ne itaekulis ne mikilis, wan kipishki tzitzinakalis wan honor, pal kiane, ipanpa ne itetasujtalis ne Teut, yaja kiejekua mikilis.
10 Ika ká ne muchi ipanpa muchiwa wan muchi ka imaku muchiwa, ká ne kalwika miak ipilawan tik tzitzinakalis, inak ka muneki ma taekua ne tatekimaka ipal ne tamakishtilis pal yaja yekawi. 11 Ika yaja ká kinteuchiwa wan yejemet ká muteuchiwat muchi witzet itech sesan, wan yajika inte ishpinawa pal kinhilwia ikniwan 12 wan ina:
Nikinhilwis ne nukniwan ne mutukay,
tik itajku ne sennemit nimetztakwikas.
2 Wan sejse Parishayuj ajsiket wan kitajtanilijket su nemi yek ma kiajkawa isiwaw se, pal kiejekuat. 3 Yaja kinhilwij:
—Tay metzintuktia Moshe?
4 Yejemet inaket:
—Moshe inak ka weli mutawawasua se amat ina ka muajkawtiwit wan weli kiajkawa.
5 Ne Yeshu kinhilwij:
—Metzinmakak uni tatuktilis ika anmejemet yujyultakwaknaj. 6 Kwak ne Teut pejki kichiwa muchi, kinchiwki takat wan siwat; 7 neka ne takat kiajkawas iteku wan ne inan 8 wan ne ujume mukwepasket sanse innakayu; ijkiuni intea ume asunte se. 9 Yajika, tay ne kisenputzuj ne Teut, ma inte kikupewa takat.
10 Wan kwak mukweptiwita ichan, ne mumachtianimet kitajtanilijket tay kinekituya ina, 11 wan kinhilwia:
—Ká ne kiajkawa isiwaw wan munamiktia iwan ukse siwat, kiawiltia, 12 wan asu ne siwat kiajkawa ishulejyu wan munamiktia iwan seuk, mawiltia.
Ne shujshulut
13 Wan kalinwikaket kukunetzitzin itech pal kinmatuka. Ne mumachtianimet kinhajwaket. 14 Kwak ne Yeshu kitak kwalanik wan kinhilwij:
—Shikajkawakan walajsit ne kukunetzitzin, maka shikinhajwakan; ika ne itatekimakalis ne Teut yawi pal sejse kiane. 15 Kia nimetzinhilwia: ká te kikwi ne itatekimakalis ne Teut ken se kunetzin inte kalakis.
16 Wan kinnapaluj, wan kitalij ijimey inhijpak wan kinteuchiwki.
Ne Bibliaj Tik Nawat · © 2008, 2012 Jan Morrow