Revised Common Lectionary (Semicontinuous)
13 Ká anmutzalan kimati wey? Ma muwika yek pal mumati wan ma kichiwa itekiw iwan ne yulyamanikayu ipal tamatilis. 14 Saman su ankipiat kwalan, chichikayu wan envidiaj tik anmuyulu, maka shimuweymatikan, maka tanutzakan ken te tejkia. 15 Uni inte ne tamatilis ne temutuk ka ikajku asunte ne tay ipal ne taltikpak, ipal tuweyka, ipal ne nawalmet, 16 ika kan nemi kwalan wan envidiaj, ikuni nemi kumunilis wan muchi tutejtekiw inte yejyek. 17 Ne tamatilis ipal ne ikajku, achtu chipawak, tipan ipal nejmachnemilis, yulyamanikayu wan tetakamatilis, tentuk iwan tetasujtalis wan itajtakil yek; inte taishtemua, inte tashijshikua. 18 Ne itakil tamelakchiwalis mutuka kwak tinejmachnemit, wan ne tanejmachchiwanit kitukat.
4 Taika anmusumat wan taika anmuchaluat anmutzalan? Muita ka yaja ipanpa ne mujmuyulkwesulis ne musumat ijtik ne anmutajtakutun. 2 Anmejemet taelewiat wan te kipiat; tamiktiat wan tatemuat, wan te welit kiajsit. Anmusumat wan anmuchaluat: inte ankipiat ika inte ankitajtanit. 3 Ankitajtanit wan te ankikwit ika inte ankitajtanit yek, pal ankitzunpuluat tik muyulkwesulis.
7 Yajika, shiktakamatikan ne Teut. Shikilwikan ne Tamintuk inte, wan yawi chulua wejka anmutech. 8 Shitzinkisakan itech ne Teut wan yawi tzinkisa anmutech. Shikpupukan anmumejmey, tateyekchiwanimet! Wan shimuyulpupukan, anmejemet ká kipiat ume anmuyulu!
Yeshu inak tay yawi panu
30 Kisket wan yajket pashaluat ijtik Galilaya, wan te kinekituya ma aka kimati, 31 ika yaja kinmachtia ne mumachtianimet wan kinhilwia ka temakat ne Itelpuch ne Takat ijtik inmejmey takamet wan yawit kimiktiat, wan kwak tamit kimiktiat wan panut yey tunal yawi muyulkwi.
32 Yejemet te kimatit katka tay kineki ina wan te kitajtanilijket ika majmawit.
Ká ne achtu?
33 Wan ajsiket Kaparnajum, wan kwak nemituya ka ichan kintajtanilij:
—Tay annemituyat tajtaketzat tik ne ujti?
34 Yejemet te inaket tatka ika tik ne ujti tajtaketzket yajket pal kimatit katiawel pal yejemet ne mas wey. 35 Wan yaja mutalij wan kinnutzki ne majtakti-ume wan kinhilwia:
—Asu se kineki muchiwa achtu, yaja yawi ne tipan pal muchi wan ne tekitini pal muchi.
36 Wan kikwij se kunetzin wan kitalij tatajku wan kinapaluj, wan kinhilwij:
37 —Ká ne kikwi se pal ne kukunetzitzin ken ini tik nutukay naja nechkwi, wan ká ne nechkwi inte naja nechkwi sute ne nechtuktijtuk.
Ne Bibliaj Tik Nawat · © 2008, 2012 Jan Morrow