Revised Common Lectionary (Semicontinuous)
2 Nukniwan, su ankiyulmatit ne tutajtzin Yeshu Mawaltijtuk ne tzitzinaka, maka shikelkawakan ka muchi tikenhat. 2 Tinakan ka kalaki ijtik anmusennemit se takat iwan iajanilloj ipal teukwit wan ikwajkwach yektzin; kalaki nusan se takat te kipia tatka iwan ikwejkwechpala susul. 3 Su tikita ne kipia ne ikwajkwach yektzin wan tikilwia: "Shimutali ka nikan kan tinemit yek" , wan tikilwia ne te kipia tatka: "Shinaka ejkatuk ka ne" o "Shimutali talchi", 4 tejkia ka su ijkiuni ankielkawtiwit ka muchi anmejemet kenhat, wan ankichijtiwit juzgar seuk iwan yujyultaketzalis teyek, o inte?
5 Shinechkakikan nukniwan tasujtatuk: anka te kishpejpen ne Teut ne te kipiat tatka ipal ne taltikpak pal kipiat wey tayulmatilis wan pal kipiat ne tatekimakalis, ken inatuk ka yawi kinmaka muchi ká ne kitasujtat sujsul? 6 Anmejemet inte kitasujtaket ne te kipia tatka. Anka ne kipiat wey inte metzinpiat itan intajpal wan metzintilanat ka juicioj? 7 Yejemet te kukujtaketzat ne itukay yek ne iwan anmunutzat?
8 Melka muchi uni, su ankichiwat tay ina ne tajtuli mas wey ken nemi ijkwilujtuk, "Tiktasujtas ne muiknew ken tajasan timutasujta", ankichiwat tay yek. 9 Su ankielkawat ka muchi tikenhat, ankichiwat tay teyek wan ne tajtuli metzinhajwa ika antateyekchiwat, 10 ika ká ne tajpia muchi ne tajtuli wan tatzunchalua tik sechin kipia culpaj ipal muchi.
11 Ne ká inak "Maka shimawilti" nusan inak "Maka shitamikti". Asu te timawiltia wan su titamiktia, titateyekchijtuk.
12 Ijkiuni shitanutzakan wan ijkiuni shikchiwakan ken ne yawit muchiwat juzgar iwan ne tajtuli ipal ne tamakishtilis, 13 ika ká ne te kipalewia seuk, te yawit kipalewiat kwak yawit kichiwat juzgar. Ne tetasujtalis mas wey que ne juicioj.
14 Ken kipalewia se, nukniwan, su ina ka kipia tayulmatilis wan te kichiwa tatka? Anka ne tayulmatilis te weli kipalewia? 15 Tinakan ka se takat o se siwat te kipiat inkwajkwach wan te kipiat intakwal ipal ne tunal. 16 Su se anmejemet kinhilwia: "Ma shinemikan yek! Shimutakentikan wan shishwikan!" wan te kinmaka tay muneki ne inweyka, ken kipalewia? 17 Ijkiuni nusan ne tayulmatilis: su te kichiwa tatka, yaja mikik.
Ne siwat pal Kanan
24 Kiski pashalua wan yajki ne tal nepa Tzor. Ka né kalak tik se kal wan te kinekituya ma kimati aka, wan melka uni te welik minaya: 25 nemanha takakik se siwat kipiatuya isiwapiltzin iwan se nawal teyek, wan walaj wan mutamutak talchi ishpan ne ijikshi. 26 Yaja se siwat pal Grecia nestuk tik ne tal pal Poynikia tik Siria. Wan kitajtan ma kishti ne nawal itech ne isiwakunew, 27 wan Yeshu kilwij:
—Achtu ma ishwikan ne kukunet, ika te yek ma tikwikakan ne tamal pal ne kukunet pal tiktamutiliat ne pejpelutzitzinmet.
28 Ne siwat kilwia:
—Kia Tajtzin; melka uni, hasta ne pelutzitzinmet itan ne mesaj kikwat ne mujmumushu pal ne kukunet.
29 Wan yaja kilwij:
—Ika tinak uni, shiawa, ne nawal walkistuka itech ne musiwakunew.
30 Wan kwak yajki ichan, né kiajsik ne kunet wetztuk ijpak ne tapech wan ne nawal walkistuya.
Kipajtia se tenpupuluka
31 Wan ukseujti walkiski ne tal nepa Tzor wan panuk ijtik Tzidon hasta ajsik ne weyat pal Galilaya, tik itajku ne tajtal ipal ne Majtaktitechan. 32 Wan kalwikat itech yaja se te welituya takaki wan tenpupuluka, wan mutajtaweliat ma kitali ne imey ijpak. 33 Wan kikwij ka ikwaj wejka ne miaktal wan kitalij ne imapipil ijtik ne inakas, wan tachijchak wan kimatukak ne inenepil, 34 wan ajkutachiak ka ilwikak wan ijiumik wan kilwij:
—Epataj!
kineki ina: Shimupelu! 35 Wan tapuik ne itakakilis wan nemanha musutun ne ilpika tik ne inenepil wan welituya taketza yek. 36 Wan kintuktij ma te kilwikan aka. Wan melka kintuktia, yejemet tanajnawatiat katka nujme, 37 wan sujsul ishpuyawit katka, inat:
—Yaja kichiwtuk muchi yek, wan kichiwa ka takakit ne te welit takakit wan ka taketzat ne te welit taketzat.
Ne Bibliaj Tik Nawat · © 2008, 2012 Jan Morrow