Revised Common Lectionary (Semicontinuous)

Pinagaling ni Jesus ang Bulag na Pulubi^(A)

³⁵ Nang malapit na sila sa Jerico, isang lalaking bulag ang nakaupong namamalimos sa tabi ng daan. ³⁶ Nang marinig niyang nagdaraan ang mga tao, tinanong niya kung ano ang nangyayari. ³⁷ At sinabi nila sa kanya na dumaraan si Jesus na taga-Nazareth. ³⁸ Kaya sumigaw siya, “Jesus! Anak ni David! Mahabag po kayo sa akin!” ³⁹ Sinaway siya ng mga nasa unahan at siya ay pinatahimik. Ngunit lalo pa siyang sumigaw, “Anak ni David! Mahabag po kayo sa akin!” ⁴⁰ Kaya't tumigil si Jesus at nag-utos na ilapit ang lalaki sa kanya. Paglapit ng bulag ay tinanong siya ni Jesus, ⁴¹ “Ano ang nais mong gawin ko?” Sumagot ang lalaki, “Panginoon, gusto ko po sanang muling makakita.” ⁴² At sinabi sa kanya ni Jesus, “Makakakita kang muli. Pinagaling ka ng iyong pananampalataya.” ⁴³ At agad siyang nakakitang muli at sumunod kay Jesus na nagpupuri sa Diyos. Nang makita ito ng lahat ng mga tao, sila ay nagpuri sa Diyos.