Revised Common Lectionary (Semicontinuous)

Nítorí ohun rere ni láti máa kọrin ìyìn sí Ọlọ́run wa,
    ó yẹ láti kọrin ìyìn sí i!

² Olúwa kọ́ Jerusalẹmu;
    Ó kó àwọn Israẹli tí a lé sọnù jọ.
³ Ó wo àwọn tí ọkàn wọ́n bàjẹ́ sàn
    ó sì di ọgbẹ́ wọ́n.
⁴ Ó ka iye àwọn ìràwọ̀
    ó sì pe ọ̀kọ̀ọ̀kan wọn ní orúkọ
⁵ Títóbi ni Olúwa wa ó sì pọ̀ ní agbára
    òye rẹ̀ kò sì ní òpin.
⁶ Olúwa wa pẹ̀lú àwọn onírẹ̀lẹ̀
    bẹ́ẹ̀ ni ó rẹ̀ àwọn ènìyàn búburú sílẹ̀.

⁷ Fi ọpẹ́ kọrin sí Olúwa
    fi ohun èlò orin olókùn yin Ọlọ́run.

⁸ Ó fi ìkùùkuu bo àwọ̀ sánmọ̀
    ó rọ òjò sí orílẹ̀ ayé
    ó mú kí koríko hù lórí àwọn òkè
⁹ Ó pèsè oúnjẹ fún àwọn ẹranko
    àti fún àwọn ọmọ ẹyẹ ìwò ní ìgbà tí wọ́n bá ń ké.

¹⁰ Òun kò ní inú dídùn nínú agbára ẹṣin
    bẹ́ẹ̀ ni Òun kò ní ayọ̀ sí ẹ̀ṣẹ̀ ọkùnrin
¹¹ Olúwa ni ayọ̀ nínú àwọn tí ó bẹ̀rù rẹ̀,
    sí àwọn tí ó ní ìrètí nínú àánú rẹ̀.

Ẹ fi ìyìn fún Olúwa.

⁵ “Kíyèsi i, Ọlọ́run ni alágbára, òun kò i sì
    gàn ènìyàn; ó ní agbára ní ipá àti òye.
⁶ Òun kì í dá ẹ̀mí ènìyàn búburú sí,
    ṣùgbọ́n ó fi òtítọ́ fún àwọn tálákà.
⁷ Òun kì í mú ojú rẹ̀ kúrò lára olódodo,
    ṣùgbọ́n àwọn ọba ni wọ́n wà lórí ìtẹ́;
    àní ó fi ìdí wọn múlẹ̀ láéláé, a sì gbé wọn lékè.
⁸ Bí ó bá sì dè wọ́n nínú àbà, tí a
    sì fi okùn ìpọ́njú dè wọ́n,
⁹ Nígbà náà ni ó ń sọ àwọn ohun tí wọn ti ṣe fún wọn,
    wí pé wọ́n ti ṣẹ̀ pẹ̀lú ìgbéraga wọn.
¹⁰ Ó sí wọn létí pẹ̀lú sí ọ̀nà ẹ̀kọ́,
    ó sì pàṣẹ kí wọn kí ó padà kúrò nínú àìṣedédé.
¹¹ Bí wọ́n bá gbàgbọ́ tí wọ́n sì sìn ín,
    wọn ó lo ọjọ́ wọn ní ìrọ̀rùn,
    àti ọdún wọn nínú afẹ́.
¹² Ṣùgbọ́n, bí wọn kò bá gbàgbọ́,
    wọ́n ó ti ọwọ́ idà ṣègbé,
    wọ́n á sì kú láìní òye.

¹³ “Ṣùgbọ́n àwọn àgàbàgebè ní ayé kó ìbínú jọ;
    wọn kò kígbe fún ìrànlọ́wọ́ nígbà tí ó bá wọ́n wí.
¹⁴ Nígbà náà ni ọkàn wọn yóò kú ní èwe,
    ní àárín àwọn ọkùnrin alágbèrè ojúbọ òrìṣà.
¹⁵ Òun gba òtòṣì nínú ìpọ́njú wọn,
    a sì sọ̀rọ̀ sí wọn ní etí nínú ìnira wọn.

¹⁶ “Bẹ́ẹ̀ ni pẹ̀lúpẹ̀lú ó fa wọn yọ láti inú ìhágágá sí ibi gbòòrò,
    sí ibi tí ó ní ààyè tí kò ní wàhálà nínú rẹ̀,
    ohun tí a sì gbé kalẹ̀ ní tábìlì rẹ̀ jẹ́ kìkì ọ̀rá oúnjẹ tí ó fẹ́.
¹⁷ Ṣùgbọ́n ìwọ kún fún ìdájọ́ àwọn búburú;
    ìdájọ́ àti òtítọ́ dì ọ́ mú.
¹⁸ Nítorí ìbínú ń bẹ, ṣọ́ra kí òtítọ́ rẹ máa bá a tàn ọ;
    láti jẹ́ kí títóbi rẹ mú ọ ṣìnà.
¹⁹ Ọrọ̀ rẹ pọ̀ tó, tí wàhálà kì yóò fi dé bá ọ bí?
    Tàbí ipa agbára rẹ?
²⁰ Má ṣe ìfẹ́ òru, nígbà tí a ń ké
    àwọn orílẹ̀-èdè kúrò ní ipò wọn.
²¹ Máa ṣọ́ra kí ìwọ ki ó má yí ara rẹ̀ padà sí búburú;
    Nítorí èyí tí ìwọ rò pé ó dára jù ìpọ́njú lọ.

²² “Kíyèsi i, Ọlọ́run ni gbéga nípa agbára rẹ̀;
    ta ni jẹ́ olùkọ́ni bí rẹ̀?
²³ Ta ni ó là ọ̀nà iṣẹ́ rẹ̀ sílẹ̀ fún un,
    tàbí ta ni ó lè wí pé ìwọ ti ń ṣe àìṣedéédéé?