Revised Common Lectionary (Semicontinuous)

¹ हे परमेस्सर, राजा क मदद करा ताकि उ भी तोहरी तरह स विवेक स भरिके निआउ करइ।
    राजपुत्र क सहायता करा ताकि उ तोहार धार्मिक भावना क जानि सकइ।
² राजा क सहायता करा कि तोहरे मनवइयन क उ निस्पच्छ निआउ करइ।
    सहायता करा कि उ दीन जनन क संग उचित बेउहार करइ।
³ पहाड़न क सबइ बरे सान्ति लिआवइ द्या।
    समूचइ भुइँया बरे सान्ति अउर निआउ लिआवइ द्या।
⁴ राजा निर्धन लोगन बरे निआउ स भरा रहइ।
    उ बेसहार लोगन क मदद करइ।
    उ सबइ लोग सजा पावइँ जउन ओनका सतावत होइँ।
⁵ मोर इ कामना अहइ कि जब तलक सूरज अकास मँ चमकत ह, अउर चन्द्रमा अकासे मँ अहइ।
    लोग राजा क डर मानइँ।
    मोर आसा अहइ कि लोग ओकर डर सदा मनिहीं।
⁶ राजा क मदद, धरती प पड़इवाली बरसात बनावइ मँ करा।
    ओकर मदद करा कि खेतन मँ पड़इवाली बौछार बनइ।
⁷ जब तलक उ राजा अहइ, भलाइ फूलइ-फरइ।
    जब तलक चन्द्रमा अहइ, सान्ति बनी रहइ।
⁸ ओकर राज्ज समुद्दर स समुद्दर तलक
    अउ परात नदी स लइके सुदूर तलक फइलि जाइ।
⁹ रेगिस्ताने क लोग ओकरे अगवा निहुरइँ।
    अउर ओकर सबइ दुस्मन ओकरे अगवा औधे मुँह भहरान भए धरती पइ निहुरइँ।
¹⁰ तर्सीस क राजा अउ दूर देसन क राजा ओकरे बरे उपहार लिआवइँ।
    सेबा क राजा अउ सबा क राजा ओका उपहार देइँ।
¹¹ सबइ राजा हमरे राजा क अगवा निहुरइँ।
    सबहिं रास्ट्र ओकर सेवा करत रहइँ।
¹² हमार राजा बेसहारन क सहायक अहइ।
    हमार राजा दीनन पइ अउर बेसहारा लोगन क सहारा देत ह।
¹³ दीन, बेसहारा लोग ओकरे सहारे अहइँ।
    इ राजा ओनका जिअत रखत ह।
¹⁴ इ राजा ओनक ओन लोगन स बचावत ह, जउन क्रूर अहइँ अउर जउन ओनका दुःख देइ चाहत हीं।
    राजा बरे ओन दीनन क जीवन बहोतइ महत्वपूर्ण अहइ।
¹⁵ राजा लम्बी उमर क होइ!
    अउर सेबा स सोना प्राप्त करइ।
राजा बरे सदा पराथना करत रहा,
    अउर तू हर दिन ओका असीस द्या।
¹⁶ खेत भरपूर फसल देइ। पहाड़ियन फसलन स ढकि जाइँ।
    इ सबइ खेत लबानोन क खेतन स उपजाऊ होइ जाइँ।
सहर लोगन क भीड़ स भरि जाइ,
    जइसेन खेत घनी घासे स भरि जात हीं।
¹⁷ राजा क जस सदा बना रहइ।
    लोग ओकरे नाउँ क सुमिरन तब तलक करत रहइँ, जब तलक सूरज चमकत ह।
ओकरे कारण सारी प्रजा धन्य होइ जाइ
    अउ उ पचे सबहिं ओका असीसइँ।

“बोर क पूत बिलाम क इ सब्द अहइँ।
    इ सबइ सब्द उ मनई क अहइँ जउन चीजन क साफ साफ लखि सकत ह।
¹⁶ मइँ परमेस्सर स इ सँदेसा सुनेउँ ह।
    मइँ गियान पाएउँ ह जउन सर्वोच्य परमेस्सर दिहेस ह
जेका सर्वसक्तीमान परमेस्सर दिहेस ह।
मइँ उ निहारेउँ ह।
    मइँ दण्डवत कइके कहत हउँ जउन मइँ निहारेउँ ह।

⁶⁸ “इस्राएल क पर्भू परमेस्सर क आसीस होइ
    काहेकि उ आपन मनइयन क मदद बरे आवा
    अउर ओनका आजाद कराएस।
⁶⁹ उ हमरे बरे आपन सेवक दाऊद क परिवार स
    एक उद्धारकर्ता दिहस।
⁷⁰ जइसा कि उ बहोत पहिले
    आपन पवित्त नबी स वचन देवॉएस।
⁷¹ उ हमका हमार दुस्मनन स अउर ओन सब क हथवन स,
    जउन हम स घिना करत रहेन, हमका छोड़ावइ क वचन दिहस।
⁷² हमरे पूर्वजन प दाया देखावइ क
    अउर आपन पवित्तर बचन क याद रखइ क।
⁷³ ओकर बचन रहा एक उ सपथ जउन हमरे पूर्वजन इब्राहीम क संग लीन्ह गइ रहिन,
⁷⁴     कि हमार दुस्मनन क हथवन स हमार छुटकारा
अउर बेडर क पर्भू क सेवा करइ क हुकुम दीन।
⁷⁵     अउर आपन जिन्नगी भर हर रोज ओकरे समन्वा हम पचे पवित्तर अउर धर्मी रहि सकी।