Revised Common Lectionary (Semicontinuous)

121  He waiata; he pikitanga. Ka anga atu oku kanohi ki nga maunga; no reira nei te awhina moku.

² No Ihowa te awhina moku, no te kaihanga o te rangi, o te whenua.

³ E kore ia e tuku i tou waewae kia nekehia; e kore tou kaitiaki e moe.

⁴ Ina, e kore te kaitiaki o Iharaira e parangia, e moe.

⁵ Ko Ihowa tou kaitiaki, ko Ihowa tou whakamarumaru i tou matau.

⁶ E kore koe e pakia e te ra i te awatea, e te marama ranei i te po.

⁷ Ma Ihowa koe e tiaki i roto i nga kino katoa; mana e tiaki tou wairua.

⁸ Ma Ihowa e tiaki tou haerenga atu, me tou haerenga mai aianei a ake tonu atu.

13  A i korero a Ihowa ki a Mohi, i mea,

² Whakatapua maku nga mea matamua katoa; nga mea katoa a nga tama a Iharaira e oroko puta mai ana i te kopu, a te tangata, a te kararehe, maku.

³ A i mea a Mohi ki te iwi, Kia mahara ki tenei ra i haere atu ai koutou i Ihipa, i te whare pononga; he kaha hoki te ringa i whakaputaina ai koutou e Ihowa i konei: kaua hoki te taro rewena e kainga.

⁴ Ko te ra tenei i haere atu ai koutou, ko Apipi te marama.

⁵ Na ka kawea koe a mua e Ihowa ki te whenua o nga Kanaani, o nga Hiti, o nga Amori, o nga Hiwi, o nga Iepuhi, i oati ai ia ki ou matua ka hoatu ki a koe, he whenua e rerengia ana e te waiu, e te honi, ko reira koe mahi ai i tenei mea, i tenei mara ma ano.

⁶ E whitu nga ra e kai ai koe i te taro rewenakore, a hei te ra whitu te hakari a Ihowa.

⁷ E whitu nga ra e kainga ai te taro rewenakore: aua hoki te taro rewena e kitea ki a koe; aua ano e kitea ki a koe he rewena i ou rohe katoa.

⁸ A mau e korero ki tau tama i taua ra, e mea, Mo ta Ihowa i mea ai ki ahau tenei, i toku haerenga mai i Ihipa.

⁹ Hei tohu ano tena ki a koe i tou ringa, hei whakamahara hoki ki waenganui i ou kanohi; kia mau ai te ture a Ihowa i roto i tou waha: he kaha hoki te ringa i whakaputaina ai koe e Ihowa i Ihipa.

¹⁰ Na kia mau ki tenei tikanga i tona wa ano, i tenei tau, i tenei tau.

¹⁸ Na, i te ata, i a ia e hoki ana ki te pa, ka hiakai ia.

¹⁹ A, i tona kitenga i tetahi piki i te taha o te ara, ka haere ia ki taua rakau, heoi kihai i kitea tetahi mea i runga, he rau anake; ka mea ia ki te rakau, Kei whai hua koe a ake ake. A maroke tonu ake te piki.

²⁰ A, no te kitenga o nga akonga, ka miharo, ka mea, I peheatia i hohoro ai te maroke o te piki nei?

²¹ Na ka whakahoki a Ihu, ka mea ki a ratou, He pono taku e mea nei ki a koutou, Me he whakapono to koutou, kahore i ruarua te whakaaro, e kore e meatia e koutou ko tenei anake i meatia nei ki te piki, engari ahakoa mea noa koutou ki tenei maunga, Kia ranga atu koe, kia whakataka ki te moana; ka meatia.

²² Ko nga mea katoa hoki e tono ai koutou ina inoi, ki te whakapono, ka riro i a koutou.