Revised Common Lectionary (Semicontinuous)

—Ay anmejemet, tajkwiluanimet wan Parishayujmet: antensasalmet, ika ankitentzakwat ne tatekimakalis ipal ne ilwikak pal muchi, ka nian ankalakit anmejemet, nian ankiajkawat kalakit ne kalakit. ⁽¹⁴⁾ .

¹⁵ Ay anmejemet, tajkwiluanimet wan Parishayujmet: antensasalmet, ika anpanut at wan tal pal ma walmupata se, wan kwak walmupata, ankikwepat miktankunet mas que anmejemet!

¹⁶ Ay anmejemet! Melka anpupuyumet ankinekit kilwitiat ne seki ne ujti! Anhinat:

    "Ká ne kichiwa jurar ipanpa ne teupantzin, inte tatka kichijki; asu kichiwa jurar ipanpa ne teukwit ipal ne teupantzin, ma tashtawi."

¹⁷ Anmelemet, anpupuyumet! Ika katiawel nemi achtu, ne teukwit o ne teupantzin ne kiteuchiwa ne teukwit? ¹⁸ Wan nusan anhinat:

    "Ká ne kichiwa jurar ipanpa ne tikashit inte tatka kichijki; asu kichiwa jurar ipanpa ne tay mutakulijtuk ijpak ne tikashit, ma tashtawi."

¹⁹ Pupuyumet! Ika katiawel nemi achtu, ne tetakulis ipal ne Teut o ne tikashit ne kiteuchiwa ne tetakulis? ²⁰ Yajika asu aka kichiwa jurar ipanpa ne tikashit, kichiwa jurar ipanpa yaja wan muchi tay nemi ijpak, ²¹ wan asu kichiwa jurar ipanpa ne teupantzin, kichiwa jurar ipanpa yaja wan tay nemi kalijtik, ²² wan asu kichiwa jurar ipanpa ne ilwikak, kichiwa jurar ipanpa ne ikuijpal ne Teut wan ne nemi muetztuk ijpak.

²³ Ay anmejemet, tajkwiluanimet wan Parishayujmet: antensasalmet, ika ankimakat ne teupan ne majtaktakutun ipal ne yerbabuenaj wan ne anisilloj wan ne cominoj, wan ankielkawat ne mas etek ipal ne tajtuli: tamelakchiwalis, tetasujtatakulis wan tayulmatilis. Yaja tay nemituya pal ankichiwat, wan ma inte muelkawakan ne sejseuk. ²⁴ Anpupuyumet wan ankinekit kilwitiat ne seki ne ujti! Anmejemet melka ankishtiat ne sayulin iwan se kwachtzin, ankituluat se camelloj!

²⁵ Ay anmejemet, tajkwiluanimet wan Parishayujmet: antensasalmet, ika ankipupuat tatenpan ne atiluni wan ne kashit, wan kalijtik mupusuniat iwan techtekilis wan taelewilis. ²⁶ Parishayuj pupuyut, achtu shikpupu ne atiluni ka ijtik pal ma mupupu nusan tatenpan!

²⁷ Ay anmejemet, tajkwiluanimet wan Parishayujmet: antensasalmet, ika kenhat ken shajshaput nejneshpaktuk ne muitat ijishyektzin tatenpan melka kalijtik nemit tejtentuk wan ujumit pal mijmiktuk wan muchi tay nemi susul. ²⁸ Ijkiuni tel anmejemet nusan ka anmutenpan anmuitat yejyek, melka ka ijtik annemit tejtentuk wan teshijshikulis wan muchi tay inte yek.