Revised Common Lectionary (Semicontinuous)
4 Melka naja niweliskia nikyulmati ne tuweyka: su seki ina ka anka kiyulmati ne tuweyka, naja mas! 5 Shikelnamikikan ka naja nimuyawaltek iwan chikwey tunal; ni Israeltakat ipal ne tribuj ipal Ben-Yamin, ni Ebrayuj ikunew Ebrayujmet, itan ne tajtuli ni Parishayuj, 6 niktalultia katka ne tusennemit iwan kwalan, wan te nikchijtuya tatka tay teyek ken ina wan tatuktia ne tutajtuli!
7 Wan muchi tay nikpiatuya pal niyek, uni nikmati ipal ne Mawaltijtuk ken puliwilis. 8 Mas yek, hasta muchi nusan nikmati ken puliwilis, ika mas wey ne tamatilis ipal ne Mawaltijtuk Yeshu, nutajtzin: ka imaku naja nikpulujtuk muchi, wan nina ka kupajsul ika niaw nikpia ne Mawaltijtuk 9 wan niaw nimuajsi ijtik yaja. Naja nusel te niyek ipanpa ne tajtuli, sema ika nikyulmati ne Mawaltijtuk; sema ne Teut nechekchiwa ipanpa ne tayulmatilis, 10 pal nikishmati yaja, wan ne itajpal ika yaja muyulkweptuk, wan ne tasentepewalis ipal ne itaekulis, muchijtuk ken ne imikilis, 11 su niakeman niweli niajsi nalmuketza kwak nimiktuk.
12 Te nina ka nikajsituka o niuksituka. Niktemua pal nikita su nikitzkia, ika ne Mawaltijtuk Yeshu nusan nechitzkijtuk. 13 Nukniwan, naja te nikishkejketza ka nikitzkijtuka. Sema ini: nikelkawa tay nemi nuipan wan nimumelawa ka nuishpan, 14 nimutalua niaw hasta niajsi kanka muneki pal nikana tay niktemua: ma nechnutza ne Teut ka ikajku itech ne Mawaltijtuk Yeshu.
Ne talchiwanimet tik ne shukumekamil
33 [Wan inak:]
—Shitakakikan seuk casoj: Nemik se takat kipia tajtal, wan kitukak se ishukumekamil, wan kiyawaluj uni shukumekamil iwan se kulal, wan nusan kikuyun ne shaput kan weli mupachua ne itakil ne shukumekat pal muishtia ne iayu pal muchiwa kushushaj, wan kiketzki se tepekal pal tapachiwiat, wan kiajkaw ne mil tik inmejmey talchiwanimet wan yajki wejka. 34 Kwak ajsiket ne tujtunal pal muana ne itakil, kintuktij itejtekitini pal kalkwit tay ipal. 35 Ne talchiwanimet kitzkijket uni tekitinimet, wan se kichalujket, seuk kimiktijket wan ukseuk kitejteminket. 36 Senpa kintuktij miak tekitini, wan ijkiasan kinchiwilijket. 37 Kwakuni kituktij ne itelpuch, ka inak: "Kitakamatisket ne nutelpuch." 38 Kwak ne talchiwanimet kitaket ne piltzin, muilwijket:
"Yajini yawi itekuyu muchi ipalwan kwak yawi miki tutekuyu! Tikmiktikan tel wan muchi yawi tupal!"
39 Wan kitzkijket wan kishtijket tik ne shukumekamil wan kimiktijket. 40 Kwak ajsi ne itekuyu ipal ne mil, tay yawi kichiwa iwan uni talchiwanimet?
41 Kilwiat:
—Yawi kinwilewa tetekia sea, wan yawi kinmaka ne mil sejseuk talchiwani ká kikwepilisket ne itajtakil kwak nemit pal kimakat.
42 Ne Yeshu kinhilwia:
—Niakeman ankitaket ka nemi tajkwilujtuk:
"Ne tet ne kitejtenejket ne kalketzanimet
mukwepki n' itzinteu kal!
Tutajwan yajasan kichijki,
wan titachiat wan tishpuyawit."
43 Neka nimetzinhilwia ka yawit metzinhishtiliat ne itatekimakalis ne Teut pal kimakat se techan tamaka itajtakil. 44 Muchi ká wetzi pak uni tet yawi keluni, wan asu ne tet wetzi ijpak se, yawi kikwechua.
45 Wan kwak ne weypalejmet wan ne Parishayujmet kikakket ini cajcasoj ne kinhilwij, kimatket ka ina inpanpa 46 wan tatejtemuat pal kitzkiat. Melka uni majmawket ika muchi inat ka yaja se taketzani ipal ne Teut.
Ne Bibliaj Tik Nawat · © 2008, 2012 Jan Morrow