Revised Common Lectionary (Semicontinuous)
Ne teulyujmakalis
6 Tay tinasket tel? Anka tiawit tinakat titateyekchiwat pal ma tepewi ne teutasujtalis? 2 Intesu! Su timiktiwit ipal ne tateyekchiwalis, ken tiawit timukwepat tiyujyultuk ijtik yaja?
3 Inte ankimatit ka muchi tejemet ká timumakaket ulyuj tik ne Mawaltijtuk Yeshu timuulyujmakaket tik ne imikilis? 4 Timusentalpachujket iwan, ika timumakaket ulyuj tik ne mikilis, pal kiane kenha ken muyulkwepki ne Mawaltijtuk kwak miktuk, ipanpa ne itawilyu ne Teteku, nusan tejemet tiawit tiyulyankwikisat, 5 ika su tisentakatit iwan ne tachialis ipal ne imikilis, kenhaya tiawit timuchiwat iwan ne ipal ne imuyulkwepalis.
6 Tikmatikan ka ne takat o siwat ká tupal katka ikman musencruzpiluj iwan, pal puliwi ne iweyka ne tateyekchiwalis, ma intea keman titekitikan ipal ne tateyekchiwalis. 7 Ika ká ne mikik mumelakchijtuk, intea kipia tateyekchiwalis.
8 Asu timiktiwit iwan ne Mawaltijtuk, tikmatit ka nusan tiawit tiyujyultuk iwan, 9 ika tikmatit ka kwak ne Mawaltijtuk muketzki kwak miktuk, intea miki: ne mikilis intea weli tatuktia ijpak. 10 Ika ken mikik, mikik ipal ne tateyekchiwalis pal senpa; hasta kan yultuk, yultuk ipal ne Teut. 11 Anmejemet kenhaya, shikishketzakan ka anmiktiwit ipal ne tateyekchiwalis, melka anyujyultuk ipal ne Teut itech ne Mawaltijtuk Yeshu.
24 Se mumachtiani inte nemi ijpak ne tamachtiani,
nian se tekitini ijpak ne itekuyu:
25 techajsi ma muchiwa ne mumachtiani ken itamachtiani
wan ne tekitini ken itekuyu.
Asu kinutzket itekuyu ne kal Bal-Zebul, keski mas ne imiakwan!
26 Yajika maka shimajmawikan, ika muchi tay minashtuk yawi muneshtia wan muchi tay mutzaktuk yawi muishmati. 27 Tay ne nimetzinhilwia tik kunyua, shinakan anmejemet tik tawil, wan tay ne antakakit tik anmutakakilis shitejkukan itzunpan ne kajkal ankinajnawatiat. 28 Wan maka shimajmawikan inpanpa ne kimiktiat anmuweyka wan te welit kimiktiat anmualmaj. Mas yek shimajmawikan ipanpa yajane ká weli kiwilewa ne ujume tik miktanshaput, anmualmaj wan anmuweyka.
29 Ankimatit ka munamakat ume gorrion ka se centavojchin; wan se yejemet inte wetzi talchi su ne Anmuteku inte kineki! 30 Hasta mupujtiwit ne tzujtzunkaltzitzin ipal ne anmutzuntekun. 31 Yajika maka shimajmawikan: anmejemet mas anmupatiw que miak gorriontzitzin!
32 Yajika, muchi ká ina ishpan takamet ka yaja nupal, naja nusan niaw nina ishpan Nuteku ka ikajku ka yaja nupal; 33 wan muchi ká ina ishpan takamet ka yaja inte nupal, naja nusan niaw nina ishpan Nuteku ka ikajku ka yaja inte nupal.
34 Maka shikejketzakan ka niwalaj pal nejmachnemi ne tal! Inte niwalaj pal nalwika nejmachnemilis asunte majmachej! 35 Ika niwalaj pal ma mutejtenewakan itzalan se takat wan iteku, itzalan se siwat wan inan, itzalan se siwamunti wan ne inan ishulejyu; 36 wan ne imiakwan se yawit kinekit kijtakuat.
37 Ká ne kitasujta iteku wan ne inan mas que naja inte ipani nupal, wan ká ne kitasujta itelpuch wan isiwakunew mas que naja inte ipani nupal; 38 wan ká ne inte kikwi icruz pal yawi nuipan inte ipani nupal. 39 Ká kiajsiskia ne ialmaj yawi kipulua, wan ká kipuluskia ne ialmaj ka numaku yawi kiajsi!
Ne Bibliaj Tik Nawat · © 2008, 2012 Jan Morrow