Revised Common Lectionary (Semicontinuous)
6 Ne musentepejtiwit kitajtaniliat:
—Tajtzin, tik ini tujtunal tiaw tikektalia ne tatekimakalis ipal Israel?
7 Kinhilwij:
—Inte anmutekiw ma shikmatikan ne tujtunal wan shijshiwit tay ne Teteku weli wey kitalijtuk pal muchiwa; 8 san ankikwisket anmutajpal kwak ejkutuk anmutech ne Ijiutzin, wan anmuchiwasket sejse pal kimatit tik Yerushalem wan ijtik muchi Yudaya wan Shamarea wan nujme ne tal.
9 Wan kwak tamik ina ini, muajkukij tik intachialis wan se mishti kitejkultij wan tea kitaket, 10 wan kwak nakat tachiat kan yajtuk ka ilwikak, né innawak kisket ume takat kipiat inkwajkwach istak, 11 wan inaket:
—Takamet ipal Galilaya, taika annemit tachiat ilwikak? Ini Yeshu ká mukwijtuk ka ikajku ilwikak anmuishpan, ijkiuni yawi witz ken ankitztiwit yawi ilwikak.
12 Kwakuni kisket ne tepet inawak Yerushalem itukay Olivajtepet wan mukwepket Yerushalem, se ujti ipal Sewilis, 13 wan kwak kalakket tejkuket tik ne cuartoj kan ne muchantiat katka Pedro wan Yojan wan Yakob wan Andreas Pilipo wan Tomas Bar-Tolmay wan Matay Yakob Halpay wan Shimon ne Zelotes wan Yuda ikunew Yakob. 14 Muchi yejemet ken sesan mutalijket kichiwat teutajtanilis iwan ne siwatket, wan ne Maryam ne inan Yeshu, wan ne iikawan.
12 Nuyejyektasujtatuk, maka shishpuyawikan ipanpa ne kutit pal metzinhejekua ken su panuskia se tay yankwik, 13 asunte shipakikan ika anmejemet ikunpawan iwan ne Mawaltijtuk tik itajtaekulisyu; shipakikan pal anwelit pajpakit sujsul mas kwak yawi muneshtia ne itzitzinakalis. 14 Su metzinhijilwiat tik itukay ne Mawaltijtuk, suertej ankipiat! Ika ne iijiu ipal tzitzinakalis wan ipal ne Teut anmujpak mukawa.
6 Shimutemultikan, tel, itankupa ne imey chikawak ne Teut pal yaja yawi metzinhajkukia kwak ajsi ne tunal. 7 Shiktamutilikan muchi ne anmumujmukakasulis, ika yaja metzintasujta.
8 Shinejmachnemikan, shikishpelwikan! Ne anmukujkul, ne Tenewani, ken se tekwani tzajtzi, kiyawalua kan tinemit kitemua ká weli kitulua. 9 Shinankilikan iwan tayulmatilis, wan shikmatikan ka sejse kiekuat kenha nujme ijtik ne anmukniwan.
10 Ne Teut ipal muchi tetasujtalis, ká metzinnutzki pal ankipiat ne itzitzinakalis wey pal senpa itech ne Mawaltijtuk Yeshu kwak tamit antaekuat achi, yaja metzinpalewis, metzinmakas fuerzaj, kichiwas ma chikawayakan anmuyujyulu, metzintetzilnajtalilis; 11 yajasan kipia itajpal pal senpa, amen.
Yeshu kinujnutza ne Teut
17 Yeshu tamik ina muchi ini, wan ajkutachishki wan inak:
—Nuteku: walajtuk ne horaj.
Shikweychiwa ne mukunew pal ne kunet metzweychiwa,
2 ijkiuni ken tikmakak tatuktilis ijpak muchi ká kipiat inweyka,
ma kichiwa ma yujyultuk senpa muchi ká tikintemakak.
3 Ma yujyultuk senpa pal kiane metzishmatit:
sema tajasan ti Teut yekkaya, wan ká ne tiktuktij:
Yeshu Mawaltijtuk.
4 Naja ninak ka tiwey pak ne tal;
niktamij ne nutekiw tinechmakak ma nikchiwa.
5 Wan ashan shinechweychiwa, Nuteku, munawak,
ma niwey ken katka kwak inteuk muchijki ne taltikpak.
6 Nikinneshtilijtuk mutukay ne taltikpaktakamet tikintemakak;
yejemet mupal katka wan tinechmakak, wan mupalabraj kitajpishtiwit.
7 Ashan kimatit ka muchi tay tinechmakak mutech witz,
8 ika tay ne tinechmachtij nikinmachtijtuk, wan yejemet kikwijtiwit
wan kishmattiwit ka mutech nikistuk,
wan kiyulmattiwit ka taja tinechtitanij.
9 Naja nimetztajtani ka inmaku,
inte ipanpa ne taltikpak,
nitajtani inpanpa ká tikintemakak nuwan
ika yejemet mupal.
10 Wan muchi tay nupal mupal,
wan tay mupal nupal,
wan muchi nechmatit wey inpanpa.
11 Intea ninemi tik ne taltikpak,
wan yejemet tik ne taltikpak nemit
wan naja niaw mutech. Tekutzin,
ká ne nechmakak shikintajpia tik mutukay
ma muchiwakan sesan, ken tejemet.
Ne Bibliaj Tik Nawat · © 2008, 2012 Jan Morrow