Revised Common Lectionary (Semicontinuous)
22 Pawlo nakak ejkatuk tatajku ne Arestepet wan inak:
—Nukniwan ipal Atenas: nikita ka ijtik muchi ankipiat wey teumatilis. 23 Kwak niajki nitajtachia wan nimetzinhitak mutankwaketzat, nusan nikajsik se tepatznaj kan nemi tawawasujtuk: "Ipal ne Teut ne Inte Tikishmatit". Yek, tay ne inte ankishmatit, yajaya nimetzinneshtilia.
24 Ne Teut ne kichijki ne taltikpak wan muchi tay nemi ijtik yaja, ká ne itekuyu ne ilwikak wan ne tal, inte muchantia tik teujteupantzitzin tay ne tujtumey kichijtiwit. 25 Nusan inte welit kipajtiat ne inmejmey takamet ika inte muneki tatka Yaja ká kinmaka muchi ne yulkwilis wan muchi tay kipiat.
26 Wan itech sesan kishtij muchi ne tejtechan pal muchantiat nujme ne tal. Yajaya tatuktijtuk ne tujtunal pal tinemit wan ne ijishku ipal ne tumuchantilis, 27 ma kitemukan ne Teut melka semaya kichijchimit yawit, wan ma kiajsikan. Yaja inte nemi wejka kan tinemit, 28 ika ijtik Yaja timuyulkwit wan timukekelutzat wan tinemit. Ken nusan inatiwit sejse pal ne anmutajtakwikani: "ika nusan itech tinestiwit".
29 Yajika, asu tinestiwit itech ne Teut, ma inte tikejketzakan ka ne Teut kenha ken se takutun teukwit, nian tumin, nian tet, wawasujtuk iwan artej ken weli ne iyulu takamet.
30 Ikman melka ne tukniwan inte kimatit tatka, ne Teut inak ka yek nemi. Ashan kintuktia muchi ne takamet wan siwatket nujme ma muyulpatakan, 31 ika kitalijtuk se tunal kwak yawi muita tay tikchijtiwit muchi, ne yek wan ne inteyek, itech se takat ne Yaja kituktijtuk, wan pal kintalilia tayulmatilis muchi kiyulkwiltijtuk kwak miktuk.
13 Wan ká yawi metzintateyekchiwilia asu senpa ankitemuat ne tay yek? 14 Wan asu nusan antaekuat ika ankichijtiwit tay yek, suertej! Maka shimajmawikan inpanpa, maka shikakasiwikan. 15 Shinakan ijtik anmuyulu ka wey ne Tajtzin Mawaltijtuk, wan shimuekchiwakan pal annankiliat senpa kwak metzintajtaniliat ipanpa ne anmutejchialis. 16 Shinankilikan iwan yulyamanikayu, nejnejmach, wan shikpiakan se yek tasenmatilis, pal kiane, kwak metzintejtenewat, ma ishpinawakan ne metzinhijilwiat ipanpa anmumuwikalis yek itech ne Mawaltijtuk, 17 ika mas yek ma shikchiwakan tay yek, su ne itaelewilis ne Teut kineki, que su ankichiwat tay teyek.
18 Ika nusan ne Mawaltijtuk seujti taekuj ipanpa ne tajtateyekchijtuk,
ne yek ka inmaku ne te yejyek,
pal metzinwika itech ne Teut,
wan melka mumiktijtuk anmuweyka
muyulkweptuk anmuijiu.
19 Wan yajika nusan yajki kinnajnawatia ne nawalmet tzajtzaktuk, 20 ne niakeman te tetakamattiwit, kwak ne Teut tejchia katka iwan weytejchialis tik ne tujtunal ipal Noa kwak muajshitij se takukal kan chiupi mumakishtijket itech ne at, semaya chikwey almaj. 21 Wan ashan ne at metzinmakishtia, ini ne teulyujmakalis, tesu ika kishtia ne puknaj sute yaja kineki ina ne yek tasenmatilis iwan Teut ika Yeshu Mawaltijtuk muyulkwepki, 22 wan yajki ka ilwikak, wan nemi ka imayekkan ne Teut, wan tanawatianimet wan tatuktianimet wan ne welit sujsul wey kitakamatit.
Yawi witz se walnutztuk
15 (Wan inak:)
—Asu annechtasujtat, shitajpiakan tay ne nitatuktijtuk, 16 wan naja niaw niktajtani ne Nuteku wan yawi metzinmaka ukse walnutztuk pal senpa naka anmuwan: 17 ne iijiu ne tejkia, ká ne taltikpak inte weli ina ka yek ika inte kita nian kishmati; anmejemet kishmatit ika naka anmutech wan nemi anmuwan. 18 Inte niaw nimetzinhajkawa anmusel ken iknupipil; niaw nalmukwepa anmutech. 19 Kinekiuk chiupichin wan ne taltikpak intea yawi nechita. Anmejemet kia san nechitasket, ika naja niyultuk wan anmejemet anyawit yujyultuk. 20 Tik uni tunal, yawit ankimatit ka ninemi ijtik ne Teteku, wan anmejemet ijtik naja, wan naja ijtik anmejemet. 21 Ká kipia tay nitatuktijtuk wan tajpia, yajaya ne nechtasujta. Ká ne nechtasujta, ne nuteku yawi kitasujta, wan naja nusan niaw niktasujta, wan niaw nimuneshtia ipal.
Ne Bibliaj Tik Nawat · © 2008, 2012 Jan Morrow