Revised Common Lectionary (Semicontinuous)

Sema ne tayulmatilis weli techpalewia

²¹ Ashan muneshtijtuk ne itamelakchiwalis Teut, inte ijtik ne tajtuli asunte ukse ujti tay ipanpa taketzat ne tajtuli wan ne taketzanimet: ²² ne itamelakchiwalis Teut ne witz ika tikyulmatit Yeshu Mawaltijtuk. Yaja ipal muchi ne tayulmatit, inte sema sejse wan sejse inte. ²³ Ika muchi tateyekchijtiwit wan kinchiwa faltaj ne itawilyu ne Teut, ²⁴ ma inakan ka yejyek melka inte kipiat taika, ipanpa ne itetasujtalis, ika kinmakishtia ne Mawaltijtuk Yeshu, ²⁵ ká ne Teut techtalilij ken se mutemaka wan miki ka tumaku, ijtik tayulmatilis, pal kilwitia ne itamelakchiwalis ika techtapupulwia melka titateyekchijtiwit ikman. ²⁶ Yaja ipanpa ne itasejselilis ne Teut. Kiane, ashan kilwitia ne itamelakchiwalis, pal ma yek wan pal tinakan ka yek ká ne kiyulmati Yeshu.

²⁷ Yajika, kan nemi ne muweymatilis? Te kanaj! Uni ipanpa se tajtuli? Ken uni tajtuli? Se tajtuli ne techilwia tay tinemit pal tikchiwat? Inte. Se tajtuli ne techilwia ma titayulmatikan. ²⁸ Tinat tel ka muilwitia ka yek se ipanpa ne itayulmatilis, inte ipanpa tay kichiwa tay ina ne tajtuli. ²⁹ Yaja ne Teut ipal ne Yudayujmet isel? Anka yaja inte nusan ipal ne tejtechan? Kiane, nusan ipal ne tejtechan; ³⁰ su sema sechin ne Teut, wan ipal ne Teut yek ne tayawaltekilis ipanpa tayulmatilis, wan kenhaya yek ne tzuntepul ika tayulmati. ³¹ Kwakuni, tikpuluat ne tajtuli iwan ne tayulmatilis? Intesu! Tiketzat ne tajtuli!