Revised Common Lectionary (Semicontinuous)
20 Yajika, titanawatiat ipanpa ne Mawaltijtuk, ken su ne Teut mutajtaweliskia tutech. Titajtanit ipanpa ne Mawaltijtuk: shimupatakan ipal ne Teut. 21 Ne te kishmatki tateyekchijtuk, kikweptuk tateyekchijtuk tupanpa, pal tejemet timuchiwat tamelakchiwalis ipal Teut ijtik yaja.
6 Tisentekitit, wan timetzintajtanit ma te shikwikan ne teutasujtalis ken su te tatka, 2 ika ina:
"Tik ne shiwit yek nimetzkakik, tik ne tunal ipal tamakishtilis nimetzpalewij."
Nemia ashanchin ne shiwit kwak yek, nemia ashanchin ne tunal ipal tamakishtilis!
3 Inte tikchiwiliat aka tatka pal ma mutasa, ma te inakan tatka ipanpa ne tutekitilis; 4 tik muchi tikilwitiat ka tiyejyek ken itejtekitini Teut: iwan wey tanejmachselilis, iwan uijkayu, tik tajtapachulis, tik ijiumikilis, 5 melka techwitekit, melka techtzakwat, tik kumunilis, tik kujkutialis, su tikishpelwiat, su tikseliat mayan; 6 tiyujyulchipawak wan tikpiat taishmatilis; titejchiat wey wan sea tiyajyamanik; iwan ne Ijiutzin, iwan yekkaya tetasujtalis; 7 iwan ne tejkia, iwan itajpal Teut, iwan ne tajtaiwan ipal ne tamelakchiwalis ijtik ne se tumey wan ne seuk; 8 su inat ka tiyejyek o ka te, su tupanpa taketzat teyek o yek: ka titashijshikuat, melka tinat ne tejkia; 9 ka te aka techishmati, melka techishmatit muchi; ka timikit, melka ashan tiyujyultuk; ka techwitekit, melka te techmiktiat; 10 ka timutechtiat, melka senpa tipakit; ka timunekit, melka tiktepewiliat miak; ka te tikpiat tatka, melka muchi nemi tik ne tumey.
Ken nemi pal tiknutzat ne Teut
6 (Wan Yeshu inak:)
—Shiktalikan cuidadoj ma inte shikchiwakan tay yek ishpan muchi pal ma metzinhitakan, ika asu ijkiuni inte ankikwisket anmupatiw itech Anmuteku ka ikajku.
2 Yajika, kwak titasujtatakulia maka shu-shitatzutzuna muishpan ken kichiwat ne tensasalmet tik ne kalsennemit wan tik ne ujti pal muchi kimatit; kia nimetzinhilwia ka yejemet kipiata ne inpatiw. 3 Taja kwak titasujtatakulia, ma inte kimati ne se mumey tay kichiwa nemi ne seuk, 4 pal ma shitasujtatakuli ichtaka, wan ne Muteku ne kita muchi yawi metztashtawia.
5 Wan kwak ankinutzat ne Teut, maka shipanukan ken ne tensasalmet ne kinhajwiak tanujnutzat tik ne kalsennemit wan tik ne ujujti pal muchi tachiat. Kia nimetzinhilwia, kipiata ne inpatiw. 6 Taja kwak tiknutza ne Teut, shimutentzakwa ijtik ne mucuartoj wan shiknutza ichtaka Muteku ka ikajku, wan Muteku ne kita muchi yawi metzmaka tay tiktajtani.
16 Kwak ankisejseliat mayan, ma inte muita ne anmutachialis pobrejchin ken ne tensasalmet, ne mutaliat ishshujshupilnaj pal kilwitiat ka majmayanat nemit. Kia nimetzinhilwia ka yejemet kipiata ne inpatiw. 17 Taja kwak tikselia mayan, shiktzikwasti mutzunkal wan shimuishpaka 18 pal te mumati ka timayana, sema ne Muteku ká inte tikitat yawi kimati wan Muteku ne kita muchi metztashtawis.
19 Maka shikanakan chajchalchiwit ijpak ne tal kan mayat wan kwilin kipuluat wan kan techtekinimet kaltapanat wan kichtekit; 20 shikanakan chajchalchiwit tik ne ajku kan nian mayat nian kwilin kipuluat, wan kan techtekinimet inte kaltapanat nian techtekit, 21 ika kan nemi anmuchalchiw, unisan nemi anmuyulu.
Ne Bibliaj Tik Nawat · © 2008, 2012 Jan Morrow