Revised Common Lectionary (Semicontinuous)

Kanka witz ne iyeknawatilis Pawlo?

2 Tipan panuket majtakti-nawi shiwit wan senpa niajki tik Yerushalem iwan Bar-Naba. Nikwikak Titus nuwan nusan. ² Niajki ipanpa se taneshtilis. Wan nikinhilwij ken ne yeknawatilis ne niknajnawatia ijtik ne tejtechan, ka ikwaj iwan ne wejwey inpatiw. Te niknekituya ma te kipia ipatiw pal tatka muchi tay nikujkutia wan nikujkutiatuk. ³ Melka uni, te kilwijket ma muyawalteki nian Titus, ne nemituya nuwan, ká Greciajtakat. ⁴ Ipanpa ne tesankakniwan ká kinkalaktijket ichtaka, ne kalakket pal ichtakatachiat ne tutamakishtilis ne tikpiat ipanpa ne Mawaltijtuk Yeshu, pal kiane ma techilpikan. ⁵ Inte timuajkawket nian se chiupi melka kinekituyat techtuktiat, pal ne tejkia ipal ne yeknawatilis naka anmutech.

⁶ Ne muitat ka wejwey inpatiw (maka shitajtanikan ká yejemet, ika ne Teut inte kishkejketza ká se takat), naja tel, ne wejwey inte nechnawatijket tatka; ⁷ inte ijkiuni! Kitaket ka yaja nutekiw ma nikinmaka ne yeknawatilis ne tzuntepulmet, ijkiunisan ken Pedro ne yajyawaltektuk, ⁸ ika ne ká tekiti katka ijtik Pedro ken titanijtuk ipal ne yajyawaltektuk, yaja nusan tekiti ijtik naja ipal ne tejtechan; ⁹ wan kwak Yakob wan Kepas wan Yojan, ká muitat ka ne tajtaketzal wey, kimatket ne nupatiw ne nikwijtuk, yejemet techmakaket naja wan Bar-Naba ne inmayekkan ipal tasentepewalis, pal tejemet ma tiajsikan itech ne tejtechan, yejemet itech ne yajyawaltektuk; ¹⁰ sema ma tikelnamikikan ne te kipiat tatka, wan ijkia nimutatemulijtuk pal nikchiwa uni.