Revised Common Lectionary (Semicontinuous)

Pilipo tik Shamarea

⁴ Yejemet tel yajket nujme tamakat ne yeknawatilis ipal ne palabraj, ⁵ wan Pilipo ajsik ne techan ipal Shamarea kinnawatia ipanpa ne Mawaltijtuk ⁶ wan muchi kikejketzket tay ina katka Pilipo kwak kikakket wan kitaket muchi tay yaja kichiwa katka pal muishmati, ⁷ ika miak ká kipiatuyat nawalmet teyek tzajtzit katka wan walkisat; miak ká inte welituyat mijkwanit wan metzkelumet mupajtijket. ⁸ Muchijki wey pakilis tik uni techan.

⁹ Achtu, nemituya tik ne techan se takat itukay Shimon kichiwa katka magiaj wan ne techan ipal Shamarea ishpuyawi katka wan inat katka ka yaja se wey. ¹⁰ Muchi, chijchikitik wan wejwey, kikakit katka yajuni wan inat ka uni ne itajpal ne Teut ne muilwia wey. ¹¹ Kichiwiliat katka casoj ika ikman ishpuyawit katka iwan ne imagiaj.

¹² Kwak kiyulmatket ne Pilipo ká tayeknawatia katka ipanpa ne itatekimakalis ne Teut wan ne itukay Yeshu Mawaltijtuk, mumakaket ulyuj takamet wan siwatket. ¹³ Ini Shimon nusan kiyulmatki wan kwak mumakak ulyuj nakak iwan Pilipo. Wan kwak kita tay muchiwa pal muishmati wan ne itajtajpal wey, ishpuyawik.