Revised Common Lectionary (Semicontinuous)

5 Muchi ká kimatit ka Yeshu ne Mawaltijtuk nestiwit itech ne Teut, wan muchi ká kitasujtat ne ká kichijki kitasujta nusan ne itech nestuk. ² Ijkini ken tikishmatit ka tiktasujtat ne ikukunew ne Teut: kwak tiktasujtat ne Teut wan tikchiwat tay yaja tatuktijtuk. ³ Ika ini ne itetasujtalis ne Teut, ma titajpiakan ne tay tatuktij, wan ne tay tatuktij inte etek, ⁴ ika muchi tay nestuk itech ne Teut weli mas que ne taltikpak, wan ini ne victoriaj ne weli ijpak ne taltikpak: ne tutayulmatilis.

⁵ Ká ne weli ijpak ne taltikpak? Ne kimati ka Yeshu ne ikunew ne Teut, yaja ne! ⁶ Ini ne witz itech at wan esti, Yeshu Mawaltijtuk; inte semaya itech at, asunte ne at wan ne esti; wan ne Iijiu ne ina tejkia, ika ne Iijiu ne tejkia. ⁷ Ika nemit yey ká inat tejkia: ⁸ ne Iijiu wan ne at wan ne esti, wan ne yey nemit ijtik ne sechin. ⁹ Asu tikakit ne takamet, mas tinemit pal tikakit ne Teut ika ini tay ina ne Teut ká inatuk tay ipal ne ikunew. ¹⁰ Ká ne kiyulmati ne ikunew ne Teut kipia ne tejkia ijtik yajasan. Ká ne inte kiyulmati ne Teut, ina ka Yaja ina sanka, ika inte kimati tik iyulu tay inatuk ne Teut ipal ne ikunew.

¹¹ Wan tay inatuk, ka ne Teut techmakatuk ma tiwelikan tiyujyultuk pal senpa, wan yaja ipanpa ne ikunew: ¹² ká kipia ne ikunew yawi yultuk; ká inte kipia ne ikunew, inte yawi yultuk.