Revised Common Lectionary (Semicontinuous)

—Ini tay nimetzinhilwia: ne telpuch inte weli kichiwa tatka isel, sema tay ne kita ne iteku kichiwa, ika tay ne kichiwa yajuni, ne itelpuch nusan kichiwa kenha. ²⁰ Ika ne teteku kitasujta ne ikunew wan muchi tay kichiwa kilwitilia, wan kenhayuk mas wejwey kilwitilis ma shiishpuyawikan anmejemet. ²¹ Ika kenha ken ne teteku kinketza ne miktiwit wan kinyulkwiltia, ijkiuni nusan ne telpuch kiyulkwiltia ká kineki. ²² Nian kitenewa aka ne Teteku ipanpa tay kichijtuk, asunte temakatuk iwan ne ikunew muchi pal kita ká yejyek wan ká inte, ²³ pal kiane ma kitakamatikan muchi ne Telpuch ijkiunisan ken kitakamatit ne Teteku. Ká ne inte kitakamati ne Telpuch inte kitakamati ne iteku ká kituktijtuk. ²⁴ Ini tay nimetzinhilwia: ká ne takaki tay nina wan kiyulmati ne nechtuktia, yawi yultuk senpa wan te yawit kitat su yek ush inte, asunte melka miktuk yawi yultuk. ²⁵ Ini tay nimetzinhilwia: witz se horaj wan ashan nemia kwak ne miktiwit yawit kikakit taketza ne itelpuch ne Teut wan ne takakit yawit yujyultuk.

²⁶ Kenha ken ne Teteku nemi yultuk yajasan isel, ijkiuni nusan kimaka ne Ikunew ma nemi yultuk yajasan isel; ²⁷ wan kimakak tatuktilis pal ina ká yek wan ká inte ika yaja ne Itelpuch ne Takat. ²⁸ Maka shiishpuyawikan ika witz se horaj keman muchi ne mikinimet ijtik ne shajshaput yawit kikakit, ²⁹ wan ne kichijtiwit tay yek san kisasket wan muyulkwepasket pal yujyultuk. Ne kichijtiwit tay inte yek kisasket wan muyulkwepasket pal muchiwat juzgar.