Revised Common Lectionary (Semicontinuous)
Pedro wan Yojan iishpan ne Kalpuli
4 Kwak nemituyat kinutzat ne techan, ne palejmet wan ne teupantatuktiani wan ne Tzadukayujmet ajsiket intech 2 wan kintekukujmati tay ne kimachtiat ne techan, ika tanawatiat katka ka Yeshu muyulkwepki kwak miktuk, 3 wan kinhitzkijket wan kintzakket hasta ukse tunal ika teutaka. 4 Miak ká kinkakket tayulmatket, wan yejemet achka cinco mil.
5 Wan ne seuk tunal, musentepejket ne intajtatuktiani wan ne noymet wan ne tajkwiluanimet tik Yerushalem, 6 wan Hanan ne weypalej, wan Kayapa wan Yojan wan Aleksandro wan muchi ne weypalejtal. 7 Wan kintalijket tatajku wan kintajtaniliat:
—Iwan katiawel anmutajpal ankichijtiwit ini anmejemet, wan tik itukay ká?
8 Kwakuni Pedro temik iwan ne Ijiutzin wan kinhilwij:
—Tatuktianimet ipal ne techan wan noymet: 9 asu techtajtaniliat tik ini tunal ipanpa tay tikchijtiwit yek iwan se takat kukuya pal mupajtia, 10 ma shikmatikan muchi anmejemet wan muchi ne techan ipal Israel ka tik itukay Yeshu Mawaltijtuk ne Nazarayuj, ká ne ankicruzpilujket, ká ne Teut kiyulkwepki kwak miktuk, tik itukay yajuni naka yek anmuishpan ini takat. 11 Ini ne tet ne anhinat ka inte tatka ipatiw anmejemet ne kalketzanimet, wan mukweptuk itzinteu kal, 12 wan te kanaj seuk ká weli tamakishtia, nian muajsi ijtik takamet itan muchi ne ilwikak ukse itukay ká ipanpa tinemit pal timupalewiat.
Ne Bibliaj Tik Nawat · © 2008, 2012 Jan Morrow