Revised Common Lectionary (Semicontinuous)

⁷ Tukikos yawi metzinhilwia ken ijtuk nuwan. Yaja ne tuiknew tasujtatuk wan se yek tekitini wan sentekitini tik ne Tajtzin. ⁸ Niktuktijtuk anmutech pal kichiwa kenha, pal ankimatit ken ijtuk tuwan wan pal mupalewiat ne anmuyujyulu, ⁹ iwan Onesimos, tuiknew yek wan tasujtatuk, ká ne se anmejemet. Yawit metzinneshtiliat muchi tay muchiwa ka nikan.

¹⁰ Metzintajpalua Aristarkos, ká nuwan nemi ilpituk, wan Marcus ne iiknew Bar-Naba; ipanpa yajuni ankikwijtiwit tatuktilis, su ajsi anmutech shikwikan; ¹¹ wan Yeshu ne itukay Yustus. Yejemet insel, ká yajyawaltektuk, sentekitinimet ipal ne itatekimakalis ne Teut wan muchijtiwit nutejtepalewiani. ¹² Metzintajpalua Epapras, se anmejemet ká itekitini ne Mawaltijtuk Yeshu. Senpa mutatejtemuilia anmumaku kwak kitajtani ne Teut, ma shinakakan yejyek wan yejyekawtuk ijtik muchi tay kineki ne Teut. ¹³ Niweli nimetzinhilwia ka yaja muejekua sujsul ka anmumaku wan ka inmaku ne tukniwan tik Laodikea wan tik Yerapolis. ¹⁴ Metzintajpalua Lukas ne tapajtiani tasujtatuk, wan Demas.

¹⁵ Shiktajpalukan ne tukniwan tik Laodikea, wan Numpas wan ne sennemit ka ichan. ¹⁶ Wan kwak tamit ankitat ne tajkwilul, shikchiwakan ma muita tik ne sennemit ipal Laodikea nusan, wan ne tajkwilul kisa tik Laodikea nusan ma shikitakan anmejemet. ¹⁷ Wan shikilwikan Arkipos: "Shiktalili cuidadoj ne tekitilis ne tikwijtuk ipanpa ne Tajtzin pal tiu-tikchiwa yek."