Revised Common Lectionary (Semicontinuous)

1 Naja ni Pawlo, itekitini Teut; ititanijtuk Yeshu Mawaltijtuk, iwan tayulmatilis ipal ne ijishpejpentuk ipal Teut wan taishmatilis ipal ne tejkia ipal ne yek, ² iwan tejchialis ma tiyujyultuk senpa ken inak ne Teut, ká te keman tashijshikua, kwak intea pejtuya muchi; ³ taneshtijtuk kwak ajsik ne tunal ne ipalabraj iwan tanajnawatilis, wan nechmakaket pal niktajpia ika ne tutamakishtiani Teut ijkiuni tatuktij; ⁴ naja niktuktia ini tajkwilul itech Titus nukunew yekkaya ipal tutayulmatilis. Ma metzinmakakan ne Teut tuteku wan ne Mawaltijtuk Yeshu tutamakishtiani tetasujtalis wan nejmachnemilis.

⁵ Ipanpa uni nimetznaktij tik Creta pal tiktalia yek tay kinekiuk wan ma shiktali noymet pal tatuktiat tik muchi ne tejtechan ken naja nimetzilwij, ⁶ asu nemi se ká te kichijtuk tatka tay teyek, ishulejyu sanse isiwaw, kipia ipilawan tayulmatit, wan te aka kijilwijtuk ka muwika ken inte nemi yek o ka inte tetakamati.

⁷ Ika se tapachiwiani, ken ikalpiani Teut, muneki ma te kichijtuk tatka tay teyek: tesu se ká kichiwa muchi tay ipal yajasan ajwiak, tesu kwalanini, tesu tawanani, tesu tasumani, tesu tuminhishtemuani, ⁸ sute se ká muwika yek iwan ne ejkunimet, kineki tay yek, kipia itzuntekun yek, yulmelawak, yulchipawak, kipia itajpal, ⁹ ne tajpia ne yek palabraj ipal ne tamachtilis pal kiane weli kinpalewia sejseuk iwan ne yek tamachtilis wan nusan weli kinhajajwa ne techishtenewat.