Revised Common Lectionary (Semicontinuous)
7 Neka ijkiunisan ken ina ne Ijiutzin ipal Teut:
Ashkan asu ankikakiskiat ikupak, 8 ma inte takwawayakan ne anmuyujyulu ken tik ne teajwalis ipal ne taejekulis tik ne kojtan 9 kan ne anmutejteku taejekujket pal tachiat ken ijtuk wan kitaket ne nutekiw 10 tik ume pual shiwit; neka nikwalanik iwan muchi yejemet, wan ninak: "Senpa mushijshikuat inyujyulu. Yejemet inte kishmattiwit ne nujnuuj." 11 Wan nikchijki jurar tik nukwalan: "Inte kalakisket ijtik ne nusewilis!"
12 Shiktalikan cuidadoj, nukniwan, ma nian se anmejemet kipia tik iyulu ne inteyek ipal inte-tayulmatilis ne kiajkawa ne Teut yultuk, 13 asunte shimutajtanikan anmejemetsan mujmusta, senpa ka munutza ne tunal pal ashkan, ma inte takwawaya se anmejemet wan ma inte mushijshikua iwan tay inteyek, 14 ika tikpiat ne Mawaltijtuk senpa asu tikmatit yek tik tuyulu hasta ma tami muchi, 15 wan asu tinat:
"Ashkan asu ankikakit ne ikupak,
ma inte takwawaya anmuyujyulu ken tik ne teajwalis."
16 Ika kámet takakket wan teajwaket? Anka inte muchi ne kisket tik Egipto ipanpa Moshe? 17 Ká iwan kwalanik tik ume pual shiwit? Anka te ne tateyekchiwanit ne mikiket tik ne kojtan? 18 Ká ipanpa kichijki jurar ka inte kalakisket tik ne isewilis, asunte ne inte tayulmatket? 19 Tikitat tel ka yejemet inte weliket kalakit ika inte tayulmatket.
4 Yajika timajmawikan, ken kiajkaw se promesaj ka tiawit tikalakit tik ne isewilis, ma inte ina nian se anmejemet ka yawi kichiwa faltar, 2 ika melka tejemet techmakaket ne yeknawatilis kenha ken yejemet, ne palabraj ne kikakket yejemet inte kinpalewij, ika inte mupikik iwan ne intayulmatilis ne takakinimet. 3 Ika tejemet ne titayulmatit tikalakit tik ne sewilis, ijkiunisan ken inatuk:
Ken nikchijki jurar tik nukwalan, te yawit kalakit tik ne nusewilis.
Muchi ne itekiw muchijkia kwak mutzintij ne taltikpak, 4 ika tik se inatuk ijkini ipanpa ne tunal chikume: "Ne Teut musewij tik ne tunal chikume kwak tamik muchi itekiw ne kichijki." 5 Wan tik ini, seuk: "Inte yawit kalakit tik ne nusewilis." 6 Ken muita tel, sejse kalakisket kalijtik, wan te kalakisket ne achtu muyeknawatijket ika inte tayulmatket. 7 Ukseujti kitukaytia se tunal: "Ashkan," ina itech Dawid kwak panutuk wey tiempoj, ken inatuya ikman:
Ashkan asu ankikakiskiat ikupak, ma inte takwawayakan ne anmuyujyulu.
8 Ika asu Yeshu kinmakatuskia sewilis, inte tanutztuskia ipanpa ukse tunal tipan. 9 Kiane, naka se sewilis ipal ne itechan ne Teut, 10 ika ká ne kalaki tik ne isewilis, yajane musewij kwak tamik kichiwa itekiw, kenha ken musewij ne Teut kwak tamik tay kichijki.
11 Yajika timutatemuilikan pal tikalakit ijtik uni sewilis, ma inte aka yawi wetzi tik inte-tayulmatilis ijkiuni,
Ne Bibliaj Tik Nawat · © 2008, 2012 Jan Morrow