Revised Common Lectionary (Semicontinuous)

¹⁷ Ipanpa tayulmatilis Abraham kalwikak Itzak kwak muejekuj wan yaja ká kikwijtuya ne projpromesaj yajki kitakulia ne ipiltzin ne isel kipishtuya, ¹⁸ wan ne Teut kilwij ka "ne mushinach mupuas itech Itzak". ¹⁹ Tikishkejketzat ka ne Teut weli tayulkwiltia hasta kwak se miktuka, yajika nusan kalkwij, ma tinakan.

²⁰ Ipanpa tayulmatilis, Itzak nusan kinteuchij Yakob wan Esaw ipal ne musta.

²¹ Ipanpa tayulmatilis, kwak Yakob yawi miki, kinteuchij muchi ne ipilawan Yosep wan mutankwaketzki ijpak itzun ne itupil. ²² Ipanpa tayulmatilis, kwak Yosep mikik, kielnamik ne ajkewilis ipal ne ipilawan Israel wan tatuktij ipanpa ne iujumiu.

²³ Ipanpa tayulmatilis, kwak nesik Moshe, ne itejteku kinashket yey metzti ika ne kunetzin sujsul yektzin wan te mumutijket ipanpa ne itatuktilis ne tatuktiani. ²⁴ Ipanpa tayulmatilis, kwak weytiak Moshe, inte kinekik ina ka yaja ipiltzin ne isiwapiltzin ne Parao; ²⁵ kishpejpen mas yek taekua kenha ken ne itechan ne Teut, wan tesu ma mukwesu iwan ne tay inteyek ijtik se ratoj, ²⁶ ika kishkejketzki ka ne ikwalan ne Mawaltijtuk mas wey que muchi ne tumin ipal Egipto; ika yaja kikejketza katka ne tashtawilis. ²⁷ Ipanpa tayulmatilis yaja kiajkaw Egipto; inte majmawki ipanpa ne ikwalan ne tatuktiani, ika yaja achka kita katka ne ká inte weli muita, wan chikawayak.

²⁸ Ipanpa tayulmatilis kichijki ne Paskwaj wan kishinij ne esti pal te kinmatuka ne ká kinmiktia katka ne ajachtupunijtuk.