Revised Common Lectionary (Semicontinuous)

Ken ijtuk iwan Israel

9 Nina ne tejkia itech ne Mawaltijtuk, te nitashijshikua, ijkiuni ina ne nutasenmatilis itech ne Ijiutzin: ² nina ka sujsul wey ne numutechtilis wan te tami nechkukua nuyulu, ³ ika nitajtaniskia ma najasan nimuchiwa maldictar itech ne Mawaltijtuk ka inmaku nukniwan ká nuechkawan itech tunakayu, ⁴ ne Israeltakamet. Yejemet kipiat ne kunetalilis, wan ne wey tzitzinakalis, wan ne sejsentaketzat, wan ne tajtulmakalis, wan ne tekitilis, wan ne projpromesaj. ⁵ Israeltakamet ne tetekuwan, wan ijtik yejemet ne Mawaltijtuk itech inakayu. Yektenejtuk pal senpa ne ká nemi ijpak muchi, ne Teut, amen!

⁶ Inte kineki ina ka inte yekawtuk ne ipalabraj ne Teut, ika inte Israel muchi ne kistiwit itech Israel. ⁷ Nusan ika ishinach Abraham, yaja inte muchi ipilawan, asunte "itech Itzak munutzas mushinach". ⁸ Kineki ina tel, inte ne ikukunew ne inakayu yejemetsan ikukunew ne Teut; sema ne ikukunew ne ká ne sentaketzat muishketzat ipal ishinach, ⁹ ika ne sentaketzat ina: "Tik ini metzti niwalas, wan ne Sara kipias se ipiltzin."