Revised Common Lectionary (Semicontinuous)
Se teutajtanilis
14 Yajika nimutankwaketza iishpan ne Teteku 15 ká itech kisket wan mutukaytiat muchi ne tejtechan tik ne ilwikak wan pak ne tal, 16 ma kichiwa, ken yaja kipia muchi itawilyu, ma shichikawayakan iwan itajpal ipanpa ne iijiu tik ne takat o siwat ne tikpiat ijtik tejemet, 17 pal kiane yawi muchantia ne Mawaltijtuk, ipanpa tayulmatilis, ijtik anmuyujyulu wan yawi kipia inelwayu wan itetzilnaj tik tetasujtalis, 18 pal welit ankishkejketzat yek, iwan muchi ne tayulmatit, ken yaja patawak, wan weyak, wan kojtik wan miktan, 19 wan pal welit ankishmatit ne itetasujtalis ne Mawaltijtuk ne inte weli mumati ken wey, pal ma shitemikan iwan muchi ne itepewilis ne Teut.
20 Ne weli muchi wan weli kichiwa sujsul mas que tay ne tiktajtaniliat wan tiyultaketzat iwan ne tutajpal ne tekiti ijtik tejemet, 21 ma tzitzinaka tik ne sennemit wan tik ne Mawaltijtuk Yeshu ashan wan senpa. Amen!
Yeshu kitakwaltia se miaktal
6 Tipan ne Yeshu yajki sentapal ne weyat ipal Galilaya, ne ipal Tiberias. 2 Se wey miaktal yajket iipan ika kitaket muchi tay kichiwa katka iwan ne kukuyat. 3 Tejkuk Yeshu ijtik ne tepet wan ikuni mutalij iwan ne mumachtianimet. 4 Witzaya ne Paskwaj, ne ilwit ipal ne Yudayujmet. 5 Kwakuni ne Yeshu ajkutachishki wan kitak ka sujsul miak ajsit itech. Wan kilwia Pilipo:
—Kanka tiawit tikuat tajtamal pal ma takwakan?
6 Inak uni pal kiejekua, ika yaja kimatiaya tay yawi kichiwa. 7 Nankilij ne Pilipo:
—Ume tzunti tumin tajtamal inte techajsit pal takwat muchi yejemet chiupi.
8 Se pal ne mumachtianimet, Andreas ne iikaw Shimon Pedro, kilwia:
9 —Nemi ka nikan se takapiltzin ne kipia makwil tamal ipal cebadaj wan ume michin. Tay uni ipal muchi ne tukniwan?
10 Yeshu inak:
—Ma mutalikan talchi ne tukniwan.
Ika nemituya wey sakat ka né. Mutalijket tel, wan yejemet achka cinco mil. 11 Ne Yeshu kitzkij ne tajtamal wan inak panpadiush, wan kinmajmakak ne mutalijtiwit, wan kenhaya ne mijmichin, keski kinekituyat. 12 Kwak ishwitiwit, kinhilwia ne mumachtianimet:
—Shiktepewakan ne pusul ma inte puliwi tatka.
13 Kitepewket tel wan kitenket majtakti-ume chikiwit iwan pusul naktuk kwak tamiket kikwat ne makwil tamal ipal cebadaj. 14 Kwakuni kwak muchi kitaket tay ne kichijtuk pal muishmati, inat katka ka ijkia ka yajini ne taketzani ne yawi witz tik ne taltikpak. 15 Kwakuni ken Yeshu kimati katka ka yawit witzet kitzkiat pal kichiwat ma yaja tatuktiani, yajki senpa yaja isel tik ne tepet.
Yeshu nejnemi ijpak ne at
16 Kwak tayuakik waltemuket ne mumachtianimet ka tenhat, 17 wan kalakket tik se barcoj wan yawit sentapal ne weyat, ka Kaparnajum. Wan kunyuaya wan ne Yeshu inteuk walaj, 18 wan kishpitza wey ejekat wan ne at pejki kumuni. 19 Kwakuni, kwak yajtiwita achka makwil ush chikwasen kilometroj ijtik ne at, kitaket ne Yeshu nejnemi witz ijpak ne at wan yawi ajsi inawak ne barcoj, wan majmawit. 20 Yaja kinhilwij:
—Naja ne! Maka shimajmawikan!
21 Kwakuni kinekiket kikwit tik ne barcoj wan nemanha ajsik ne tal kanka yasnekit.
Ne Bibliaj Tik Nawat · © 2008, 2012 Jan Morrow