Revised Common Lectionary (Semicontinuous)
13 Ne Teut tamakak ipromesaj ka muchi ne tal yawi ipal Abraham wan ne ishinach inte ipanpa ne tajtuli asunte ipanpa ne tamelakchiwalis ipal tayulmatilis, 14 ika asu yawi inpal ipanpa ne tajtuli, ne tayulmatilis te tatka ipatiw, wan ne promesaj pulijtuskia, 15 ika ne tajtuli kalwika kwalan. Kan te kanaj tajtuli, te aka weli mutenewa ika kichijki tay ina ne tajtuli ka te weli muchiwa. 16 Yajika, ipanpa tayulmatilis, pal kiane ipanpa tetasujtalis. Wan kiane, yek ne promesaj ipal muchi ne ishinach: te sema ipal ne kipiat ne tajtuli, nusan ne kipiat ne itayulmatilis Abraham, ne tuteku ipal muchi tejemet. 17 Ken nemi ijkwilujtuk:
"Nimetztalijtuk inteku miak techan."
Wan Abraham kiyulmatki, ika ne Teut kinyulkwepa ne miktiwit wan kinutza ne te kanaj wan nemia. 18 Abraham tejchishki kwak te welituya muita ken weliskia tejchia. Tayulmatki ka yaja yawi muchiwa inteku miak techan, ika inatuya:
"Yawi ijkiuni ne mushinach."
19 Wan ipanpa itayulmatilis kimatki, melka yaja chulet, ne iweyka achka miktuka ka kipiaya sentzunti shiwit, wan melka ne ishinach Sara nusan palantuya. 20 Kwak ne Teut kichijki uni promesaj, yaja te inak ka te weli, nian ka te kimati ka ijkiuni: chikawayak ipanpa itayulmatilis wan inak ka wey ne Teut; 21 temik iyulu wan kimati katka ka weli muchiwa ken ne Teut kilwij. 22 Neka mupujki ipal Abraham ken tamelakchiwalis.
23 Inte muijkwiluj ka mupujki ken tamelakchiwalis semaya ipal Abraham. 24 Nusan muijkwiluj tupanpa, ka nusan yawi mupua tupal su tejemet tikmatit ka Yeshu, ne tutajtzin, muketzki kwak miktuk, 25 ka mutemakak ipanpa tay tikchijtiwit teyek wan muyulkweptuk ipanpa ne tutamelakchiwalis.
Asu aka kineki yawi iipan Yeshu...
31 Wan pejki kinmachtia ka ne Itelpuch ne Takat nemi pal taekua wey, wan ne noymet wan ne weypalejmet wan ne tajkwiluanimet yawit kitejtenewat, wan yawit kimiktiat, wan kwak panut yey tunal yawi muketza, 32 wan taketza katka melaknaj. Wan Pedro kinutzki wan pejki kiajwa. 33 Yeshu muishkwepki kita ne mumachtianimet wan kiajwak Pedro, ina:
—Shiawa ka nuteputz, Tenewani, ika inte tikejketza tay ipal ne Teut asunte tay ipal ne takamet.
34 Wan kwak kalnutzki ne miaktal wan ne mumachtianimet, kinhilwij:
—Asu aka kineki yawi nuipan, ma kinakti muchi tay ipal wan ma kiana ne icruz wan ma yawi nuipan. 35 Ika ká tajpiaskia ne ialmaj yawi kipulua, wan ká kipuluskia ne ialmaj ka numaku wan imaku ne yeknawatilis yawi tajpia. 36 Ika ken kipalewia se asu muchi ne taltikpak ipal wan puliwi ne ialmaj? 37 Ika tay weli tamaka se ipatka ialmaj? 38 Ika ká ishpinawa nupanpa wan ipanpa ne nupajpalabraj tik ini tujtunal pal mawiltianimet wan tateyekchiwanimet, ne Itelpuch ne Takat nusan yawi ishpinawa ipanpa yaja kwak tzitzinaka witz ka imaku ne Iteku itzalan ne itajtanawatiani.
Ne weykapatalis
2 Wan kwak panuket chikwasen tunal, Yeshu kinwika Pedro wan Yakob wan Yojan, wan tejkuket ijpak se kojtik tepet ka insel, wan muweykapatak ishpan yejemet, 3 wan ne ikwajkwach pejket tajtawiat wan istakisket ken te tatka weli istakisa ijtik ne taltikpak. 4 Nusan kiski inhishpan Eliya wan Moshe, wan tajtaketzket iwan Yeshu. 5 Wan ne Pedro kilwij Yeshu:
—Tajtzin, yek ma tinemikan nikan, tikchiwakan yey tawipanti, se mupal, se ipal Moshe wan se ipal Eliya.
6 Ika te kimati tay ina, ika sujsul majmawket. 7 Wan muchiwki se mishti wan ne mishti kinkimilua, wan ijtik ne mishti mukakik:
—Ini nutelpuch yektasujtatuk, shikakikan!
8 Wan kwak tajtachiaket te nemituya aka; sema Yeshu kitaket inwan. 9 Wan kwak temuket yajket katani, kintuktij ma te kineshtilikan aka tay kitztiwit sute hasta kwak ne Itelpuch ne Takat miktuk wan muyulkwijtuk.
Ne Bibliaj Tik Nawat · © 2008, 2012 Jan Morrow