Revised Common Lectionary (Semicontinuous)

³ —Naja nitakat Yudayuj, nestuk tik Tarsos, Kilikia. Melka uni, nimuskalijtuk tik ini techan itech ne ijikshi Gamaliel; nimumachtijtuk yek ne itajtuli ne tatanoymet wan nitajpishtuk tay ipal ne Teut, kenha ken muchi anmejemet ashan, ⁴ wan ninejnenki tik uni ujti hasta mikilis, wan nikilpia katka wan niktzakwa katka takamet wan siwatket, ⁵ ken kimati ne weypalej ka tejkia, wan muchi ne noymet. Wan yejemet nechmakaket ajamat ipal ne tukniwan tik Damashek, wan niajki nikwika, wan ne ijilpituk ka ikuni nalinwikak ka Yerushalem pal muwitekit. ⁶ Kwakuni, kwak nitzinkisa niaw Damashek, ka tajkutunal, tik ne ilwikak nemanhachin waltemuk se wey tawil wan nechyawaluj; ⁷ wan niwetzki talchi, wan nikakik se nechilwia:

    "Shaul Shaul, taika tinechtalultia?"

⁸ Naja ninankilij:

    "Ká taja, Tajtzin?"

Nechilwij:

    "Naja ni Yeshu ne Nazarayuj ká ne tiktalultia."

⁹ Ne nuwan nemituyat, melka kitaket ne tawil, inte kikakket ne nechnutza. ¹⁰ Ninak:

    "Tay muneki ma nikchiwa, Tajtzin?"

Nechilwij:

    "Shimuketza wan shu ka Damashek, wan ikuni san metzilwisket muchi tay nemi pal tikchiwa."

¹¹ Ken inte welituya nitachia ika sujsul tzitzinakak uni tawil, ne nuwan nemit nechwikaket itech numey pal niajsi ka Damashek. ¹² Nemituya se takat itukay Hananya, ká kitakamati katka tay nemi tuktijtuk tik ne tajtuli, wan muchi ne Yudayujmet ne muchantiat ka né kishmatit katka. ¹³ Yaja walaj wan nakak nutech wan nechilwij:

    "Shaul nuiknew, shitachia."

Wan kwakuni nitachishki ka ikajku wan nikitak. ¹⁴ Inak yaja:

    "Ne Teut ipal ne tunoywan metzishpejpentuk ma shikmati ne itaelewilis wan ma shikita ne Yek wan ma shikaki itech ne iten, ¹⁵ ika tiaw tikishmati pal tikilwia muchi tay ne tikitztuk wan tikaktuk. ¹⁶ Wan ashan, maka shishtuna! Shimuketza, shimumaka ulyuj wan shimuishpaka muchi tay tikchijtuk teyek, wan shiknutza ne itukay."